TANA: కృష్ణా జిల్లా శోభనాద్రి పురంలో తాగునీటి సమస్యకు శాశ్వత పరిష్కారంగా ఉత్తర అమెరికా తెలుగు సంఘం (తానా) కీలక ముందడుగు వేసింది. గ్రామ ప్రజలకు రోజూ ఎదురవుతున్న నీటి కొరతను గమనించిన తానా, కొత్త బోర్వెల్తో పాటు వాటర్ లిఫ్టింగ్ పంప్ను ఏర్పాటు చేస్తూ రూ. 2 లక్షల విలువైన ప్రాజెక్ట్ను పూర్తి చేసింది. ఈ సదుపాయం ద్వారా సుమారు 300 ఇళ్లకు నిరంతర తాగునీటి అందుబాటు కలవనుంది.
తానా సేవా కార్యక్రమాలకు కొత్త ఒరవడి
గ్రామీణ అభివృద్ధి పట్ల తానా చూపుతున్న అంకితభావానికి ఇది మరో ఉదాహరణ. తానా అధ్యక్షుడు నరేన్ కొడాలి, ఎగ్జిక్యూటివ్ వైస్ ప్రెసిడెంట్ శ్రీనివాస్ లావు, ట్రెజరర్ రాజా కసుకుర్తి ప్రత్యేకంగా ముందంజ వేసి ఈ సేవా కార్యక్రమాన్ని అమలు చేశారు. ముఖ్యంగా ట్రెజరర్ రాజా కసుకుర్తి వ్యక్తిగతంగా రూ. 2 లక్షలు విరాళంగా అందించి బోర్వెల్ ఏర్పాటుకు సహకరించడం విశేషం.
ప్రజాప్రతినిధుల చేత ప్రారంభం
కొత్తగా నిర్మించిన బోర్వెల్ మరియు వాటర్ పంప్ సిస్టమ్ను గన్నవరం ఎమ్మెల్యే యార్లగడ్డ వెంకటరావు ప్రారంభించారు. ఈ సందర్భంగా స్థానిక ప్రజలు పెద్ద సంఖ్యలో హాజరై తానా నాయకత్వానికి హృదయపూర్వక కృతజ్ఞతలు తెలిపారు. “ఇంతకుముందు రోజూ మూడు మైళ్ళ దూరం నడిచి నీళ్లు తెచ్చుకునేవాళ్లం… ఇప్పుడు ఆ బాధలన్నీ తొలగిపోయాయి” అని గ్రామస్తులు ఆనందం వ్యక్తం చేశారు.
గ్రామస్తుల జీవితాల్లో వెలుగులు
డ్రింకింగ్ వాటర్ సమస్య తొలగడంతో గ్రామంలోని ఆరోగ్య పరిస్థితులు, శుభ్రత, రోజువారీ జీవన ప్రమాణాలు గణనీయంగా మెరుగుపడతాయని ప్రజలు భావిస్తున్నారు. పిల్లల నుంచి పెద్దల వరకు అందరినీ ఇబ్బంది పెట్టిన ఈ సమస్య పరిష్కారం గ్రామానికి పెద్ద ఆశీర్వాదంగా భావిస్తున్నారు.
వెనుకబడిన గ్రామాల కోసం తానా సంకల్పం
ఈ సందర్భంగా తానా అధ్యక్షుడు నరేన్ కొడలి, ఎగ్జిక్యూటివ్ వైస్ ప్రెసిడెంట్ శ్రీనివాస్ లావు, ట్రెజరర్ రాజా కసుకుర్తి మాట్లాడుతూ
“గ్రామీణ పేద కుటుంబాల సంక్షేమం కోసం, వారి ప్రాథమిక అవసరాలు తీర్చేందుకు తానా ఎల్లప్పుడూ ముందుంటుంది. ఆంధ్రప్రదేశ్లోని వెనుకబడిన గ్రామాలకు మరింత సేవలు అందించేందుకు మా ప్రయత్నాలు కొనసాగుతాయి” అని హామీ ఇచ్చారు.
