How to prevent Phone overheating: స్మార్ట్ఫోన్ ఇప్పుడు ప్రతి ఒక్కరి జీవితంలో కీలక భాగంగా మారిపోయింది. అయితే వేసవికాలంలో లేదా ఎక్కువసేపు ఎండలో ఫోన్ ఉపయోగించినప్పుడు ఫోన్ వేడెక్కడం పెద్ద సమస్యగా మారుతోంది. చాలా మంది దీనిని చిన్న విషయంగా తీసుకుంటారు. కానీ ఫోన్ ఎక్కువగా వేడెక్కడం వల్ల బ్యాటరీ పనితీరు తగ్గడం నుంచి డివైస్ పూర్తిగా డ్యామేజ్ అయ్యే వరకు అనేక సమస్యలు తలెత్తే అవకాశం ఉంటుంది. ఈ సమస్యలు ఎదురుకాకుండా ఉండాలంటే ఈ టిప్స్ పాటించాలి.
ఎండలో ఫోన్ వేడెక్కడానికి ప్రధాన కారణాల్లో సూర్యరశ్మి నేరుగా పడటం, ఎక్కువసేపు వీడియోలు చూడటం, గేమ్స్ ఆడటం, మొబైల్ డేటా లేదా GPS నిరంతరం ఆన్లో ఉంచడం ముఖ్యమైనవి. ముఖ్యంగా 40 డిగ్రీలకుపైగా ఉష్ణోగ్రత ఉన్న సమయంలో ఫోన్ను బయట ఉపయోగిస్తే అంతర్గత ప్రాసెసర్పై ఒత్తిడి పెరిగి వేడి మరింత అధికమవుతుంది.
ఫోన్ వేడెక్కడం వల్ల మొదట ప్రభావం పడేది బ్యాటరీపైనే. అధిక ఉష్ణోగ్రత కారణంగా బ్యాటరీ త్వరగా డ్రెయిన్ అవుతుంది. కొన్ని సందర్భాల్లో బ్యాటరీ ఉబ్బిపోవడం లేదా దీర్ఘకాలంలో బ్యాటరీ లైఫ్ పూర్తిగా తగ్గిపోవడం జరుగుతుంది. దీంతో ఫోన్ను తరచూ ఛార్జ్ చేయాల్సిన పరిస్థితి వస్తుంది. ఫోన్ ఓవర్హీట్ అయితే పనితీరు కూడా తగ్గిపోతుంది. యాప్స్ నెమ్మదిగా ఓపెన్ అవడం, ఫోన్ హ్యాంగ్ అవడం, స్క్రీన్ స్పందించకపోవడం వంటి సమస్యలు కనిపిస్తాయి. ఎందుకంటే వేడి పెరిగినప్పుడు ప్రాసెసర్ ఆటోమేటిక్గా తన స్పీడ్ తగ్గించుకుంటుంది. దీనిని ‘థర్మల్ థ్రోట్లింగ్’ అంటారు. కొన్ని సందర్భాల్లో ఫోన్ కెమెరా కూడా సరిగా పనిచేయదు. ఎక్కువ వేడి కారణంగా కెమెరా యాప్ ఆటోమేటిక్గా క్లోజ్ అవ్వడం లేదా వీడియో రికార్డింగ్ ఆగిపోవడం జరుగుతుంది. అలాగే ఫోన్లోని సెన్సార్లు, డిస్ప్లే భాగాలు కూడా దీర్ఘకాలంలో దెబ్బతినే ప్రమాదం ఉంటుంది.
ఫోన్ వేడెక్కకుండా ఉండాలంటే కొన్ని జాగ్రత్తలు తప్పనిసరిగా పాటించాలి. ముందుగా ఎండలో ఫోన్ను నేరుగా ఉంచకూడదు. ముఖ్యంగా బైక్ డాష్బోర్డ్పై లేదా కారులో సూర్యరశ్మి పడే చోట పెట్టడం ప్రమాదకరం. సాధ్యమైనంత వరకు ఫోన్ను చల్లని ప్రదేశంలో ఉంచడం మంచిది.ఫోన్ వేడిగా ఉన్నప్పుడు వెంటనే ఛార్జింగ్ పెట్టకూడదు. కొద్దిసేపు ఫోన్ చల్లబడే వరకు ఆపి, తర్వాత మాత్రమే ఛార్జ్ చేయాలి. అలాగే చౌక నాణ్యతలేని ఛార్జర్లు వాడితే కూడా వేడి ఎక్కువ అవుతుంది. అందుకే ఒరిజినల్ ఛార్జర్ ఉపయోగించడం సురక్షితం.
అవసరం లేని యాప్స్ బ్యాక్గ్రౌండ్లో రన్ అవుతుంటే ఫోన్ వేడి పెరుగుతుంది. అందువల్ల ఉపయోగించని యాప్స్ను క్లోజ్ చేయడం, బ్లూటూత్, GPS, హాట్స్పాట్ వంటి ఫీచర్లను అవసరం లేకపోతే ఆఫ్ చేయడం మంచిది. స్క్రీన్ బ్రైట్నెస్ను కూడా తక్కువగా ఉంచితే వేడి తగ్గుతుంది. వేసవిలో గేమింగ్ లేదా హెవీ వీడియో ఎడిటింగ్ వంటి పనులను ఎక్కువసేపు చేయకుండా మధ్యలో విరామం ఇవ్వడం మంచిది. ఫోన్కు మందమైన కవర్లు ఉపయోగిస్తే వేడి బయటకు వెళ్లకుండా అడ్డుకుంటాయి. కాబట్టి అధిక వేడి సమయంలో కవర్ తొలగించడం కూడా ఉపయోగకరంగా ఉంటుంది.
ఫోన్ వేడెక్కడం సాధారణ విషయం అనిపించినా దీన్ని నిర్లక్ష్యం చేస్తే డివైస్ పనితీరు, బ్యాటరీ లైఫ్, భద్రతపై ప్రభావం పడుతుంది. చిన్నచిన్న జాగ్రత్తలు పాటించడం ద్వారా ఫోన్ను సురక్షితంగా, ఎక్కువకాలం ఉపయోగించుకోవచ్చు.
