CM Vijay: ఒంటికి నల్లకోటు.. కళ్ళకు కళ్ళజోడు.. మంచి లెదర్ షూస్.. డెనీమ్ జీన్స్.. ఇది తమిళనాడు ముఖ్యమంత్రి విజయ్ ఆహార్యం.. తమిళనాడు ముఖ్యమంత్రి అయిన తర్వాత విజయ్ తన స్టైల్ మొత్తం మార్చేశారు. గడ్డంతో కనిపిస్తున్నారు. జుట్టు కూడా పెంచేశారు. ప్రజలను కలిసే విధానం.. తోటి నాయకులతో మాట్లాడే విధానం.. పథకాలు ప్రవేశపెట్టే విధానం.. సంచలన నిర్ణయాలు తీసుకునే విధానం.. ఇలా ప్రతిదాంట్లో విజయ్ తన మార్క్ చూపిస్తున్నారు.
సంక్షేమ పథకాల విషయంలో విజయ్ వెనకడుగు వేయడం లేదు. అలాగని అడ్డగోలుగా పంచుడు పథకాలు ప్రవేశపెట్టడం లేదు. బడ్జెట్ చూసుకొని.. ప్రభుత్వ ఆర్థిక పరిస్థితిని అంచనా వేస్తూ.. నిర్ణయాలు తీసుకుంటున్నారు. కొంతమంది దీనిని విమర్శిస్తున్నప్పటికీ.. మెజార్టీ ప్రజలు స్వాగతిస్తున్నారు. ఇది విజయ్ పరిపాలనలో సరికొత్త కోణాన్ని చూపిస్తోంది. ఇటీవల ఒక గ్రాము బంగారం పథకాన్ని ప్రవేశపెట్టారు విజయ్.ఈపథకాన్ని ప్రజలు స్వాగతిస్తున్నారు.
ఇటీవల ఎలక్ట్రిసిటీ బోర్డులో ఉద్యోగాల భర్తీకి సంబంధించి నోటిఫికేషన్ విడుదల చేసిన ప్రభుత్వం.. వెంటనే ప్రక్రియ చేపట్టింది. వారికి ముఖ్యమంత్రి నియామక ఉత్తర్వులు అందజేశారు. ఈ క్రమంలో ఒక గర్భిణీ ఉత్తర్వు అందుకోవడానికి వేదిక పైకి రాలేక పోతే.. విజయ్ కిందికి వచ్చి ఆమెకు నియామక పత్రాన్ని అందించారు. ఇలా చెప్పుకుంటూ పోతే విజయ్ తన పరిపాలనలో.. తాను అనుసరించే విధానంలో అనేక రకాల మార్పులు తీసుకొస్తూ.. సరికొత్త ముద్ర వేసుకుంటున్నారు. జాతీయ మీడియాలో కూడా కీలకమైన వ్యక్తిగా కనిపిస్తున్నారు.
తాజాగా విజయ్ ఆర్టీసీ బస్సులో ప్రయాణించారు. కాన్వాయ్ వదిలిపెట్టి సాధారణ ప్రయాణికుడి మాదిరిగా బస్సులో ప్రయాణించారు. చెన్నైలోని సెక్రటేరియట్ వద్ద 127 కోట్ల విలువైన 300 కొత్త బస్సులను ఆయన ప్రారంభించారు. అనంతరం పెరంబుర్ వెళ్లే ఓ బస్సులో ఆయన కూర్చున్నారు. ఆ మార్గంలో టికెట్ ధర ఎంత ఉంటుందో.. అంత చిల్లర తీసుకొని.. టికెట్ కొనుగోలు చేశారు. రోడ్డు వెంట బస్సు వెళ్తున్నప్పుడు ప్రజలకు అభివాదం చేశారు. అంతేకాదు స్వయంగా వీడియో తీసుకున్నారు. ప్రజలతో కలిసిపోయి.. ప్రజలతో మమేకమై.. వారి బాధలను తెలుసుకుంటూ విజయ్ తమిళనాడులో సరికొత్త పరిపాలనకు శ్రీకారం చుడుతున్నారు.
