Nandamuri Balakrishna: హిందూపురం ఎమ్మెల్యే నందమూరి బాలకృష్ణ కు చేదు అనుభవం ఎదురైంది. సొంత నియోజకవర్గంలోనే ప్రజలు చుక్కలు చూపించారు. స్థానికులు ఆయన రాకను అడ్డుకున్నారు. ఓ కార్యక్రమానికి హాజరైన ఆయనను ప్రజలు బాహటంగానే అడ్డుకోవడం విశేషం. ఇందుకు సంబంధించి వీడియో ఒకటి సోషల్ మీడియాలో వైరల్ అవుతోంది. ఎమ్మెల్యేగా గెలిచిన తర్వాత నియోజకవర్గ అభివృద్ధి లేదు కానీ… స్థానికంగా జరిగే శుభకార్యాలు, పండగలు, పెళ్లిళ్లకు వస్తున్నారు అంటూ స్థానికులు ఆగ్రహం వ్యక్తం చేశారు. అడ్డుకునే ప్రయత్నం చేయగా పోలీసులు సముదాయించి అక్కడ నుంచి పంపించారు.
హిందూపురం నందమూరి కుటుంబానికి పెట్టని కోట. టిడిపి ఆవిర్భావం తర్వాత నందమూరి తారక రామారావు, అటు తర్వాత హరికృష్ణ, ఇప్పుడు బాలకృష్ణ హిందూపురం నుంచి ప్రాతినిధ్యం వహిస్తున్నారు. 2014, 2019 ఎన్నికల్లో బాలకృష్ణ టిడిపి అభ్యర్థిగా పోటీ చేసి ఎమ్మెల్యేగా గెలుపొందారు. 2024 ఎన్నికల్లో పోటీ చేసి హ్యాట్రిక్ కొట్టాలని భావిస్తున్నారు. అయితే ఈ తరుణంలో ఆయన నియోజకవర్గ అభివృద్ధికి కృషి చేయడం లేదని రాజకీయ ప్రత్యర్థులు ఆరోపిస్తున్నారు. మరోసారి ఆయనకు అవకాశం ఇస్తే హిందూపురం నియోజకవర్గ అన్ని విధాలా నష్టపోతుందని హెచ్చరిస్తున్నారు. ఈ తరుణంలోనే ఆయనకు చుక్కెదురు కావడం విశేషం.
సుదీర్ఘ విరామం తర్వాత బాలకృష్ణ హిందూపురంలో అడుగు పెట్టారు. దాదాపు పది నెలల అనంతరం హిందూపురం మండల టిడిపి కన్వీనర్ అశ్వత్ రెడ్డి కుమార్తె పెళ్లి రిసెప్షన్ కు హాజరయ్యారు. ఈ క్రమంలో కొందరు బాలకృష్ణ చుట్టుముట్టారు. ఆయన వాహనాన్ని అడ్డుకునే ప్రయత్నం చేశారు. కేవలం పెళ్లిళ్లు, ఇతర కార్యక్రమాల్లో పాల్గొనడానికి కోసం మాత్రమే నియోజకవర్గానికి వస్తున్నారు అంటూ ఆగ్రహం వ్యక్తం చేశారు. దీంతో అక్కడ కొద్దిపాటి ఉద్రిక్త పరిస్థితులు నెలకొన్నాయి. పోలీసులు సముదాయించి.. అటు ఆందోళనకారులను, ఇటు బాలకృష్ణను పంపించారు. దీంతో వివాదం సద్దుమణిగింది.
— Vikatakavi (@vikatakavi1231) November 16, 2023
