Jr NTR: చంద్రబాబు అరెస్టు వెనుక భారీ స్కెచ్ ఉందా? బిజెపి అగ్ర నేతలకు ఇది తెలిసే జరిగిందా? అన్నింటికీ మించి జూనియర్ ఎన్టీఆర్ కు ఏడాది ముందే తెలుసా? అందుకే ఆయన స్పందించడం లేదా? ఏపీ పొలిటికల్ సర్కిల్లో ఈ సరికొత్త వార్త ఒకటి చక్కర్లు కొడుతోంది. చంద్రబాబు అరెస్ట్ అయిన విషయం అందరికీ తెలిసినదే. అయితే అందరూ అనుకున్నట్టు.. దీని వెనుక పక్కా వ్యూహం ఉన్నట్లు తెలుస్తోంది. అప్పుడెప్పుడో ఈడి విచారణ జరగడం ఏమిటి? అసలు ఎఫ్ఐఆర్లో పేరు లేని చంద్రబాబును అరెస్టు చేయడం ఏంటి? కేంద్రం అనుమతి లేకుండా జగన్ అంత ధైర్యం ప్రదర్శించడమేంటి? ఇలా ఎన్నో రకాల అనుమానాలు ఉన్నాయి. అయితే అన్నింటికీ మించి ఏడాది కిందటే జూనియర్ ఎన్టీఆర్ కు చంద్రబాబు అరెస్టు విషయమై బిజెపి అగ్రనేత అమిత్ షా ఒక హింట్ ఇచ్చినట్లు ప్రచారం జరుగుతోంది.
తెలుగుదేశం పార్టీతో జూనియర్ ఎన్టీఆర్ ది సుదీర్ఘ సంబంధం. తనకు రాజకీయాల పట్ల ఆసక్తి లేదంటూనే.. పుష్కర కాలం కిందటేతెలుగుదేశం పార్టీ ప్రచార బాధ్యతలు తీసుకున్నారు జూనియర్ ఎన్టీఆర్. చంద్రబాబు కుటుంబంతో అరమరికలు ఉన్నా.. బాబాయ్ బాలకృష్ణ తో పాటు నందమూరి కుటుంబ సభ్యులతో సఖ్యత లేకున్నా.. తెలుగుదేశం పార్టీ విషయానికి వచ్చేసరికి తారక్ చాలా అనుకూలత ప్రదర్శించేవారు. అప్పట్లో తన మనిషిగా ముద్రపడిన కొడాలి నాని టిడిపిని వీడినప్పుడు తారక్ ప్రత్యేక ప్రకటన ఇచ్చారు. తన కట్టే కాలే వరకు టిడిపిలో కొనసాగుతానని స్పష్టం చేశారు. పార్టీ కష్టంలో ఉంటే తాను ఒక సామాన్య కార్యకర్తగా సేవలందిస్తానని చెప్పుకొచ్చారు. అందుకు తగ్గట్టుగానే పార్టీ సంక్షోభాలు, సమస్యల్లో ఉన్నప్పుడు స్పందించారు.
మొన్నటికి మొన్న ఎన్టీఆర్ హెల్త్ యూనివర్సిటీ పేరు మార్చినప్పుడు సైతం స్పందించారు. మేనత్త భువనేశ్వరిపై వైసీపీ నేతలు అనుచిత వ్యాఖ్యలు చేసినప్పుడు సైతం తారక్ ప్రత్యేక ప్రకటన చేశారు. తెలుగుదేశం పార్టీ శ్రేణులకు అవి ఆశించిన స్థాయిలో రుచించకపోయినా.. తెలుగుదేశం పార్టీలోనే ఉన్నాననే సంకేతాలు ఇచ్చారు. కానీ చంద్రబాబు అరెస్టు విషయంలో ఇంతవరకు స్పందించకపోవడం కాస్త విమర్శలకు తావిస్తోంది. చంద్రబాబు అరెస్ట్ అయి 15 రోజులు కావస్తున్నా తారక్ కానీ.. ఆయన సోదరుడు కళ్యాణ్ రామ్ కానీ స్పందించలేదు. దేశ విదేశాల నుంచి చంద్రబాబుకు స్పందనలు వెల్లువెత్తుతున్నా.. తోటి కుటుంబ సభ్యులు మద్దతు తెలిపినా.. తారక్ మాత్రం స్పందించక పోవడానికి ఓ శక్తి అడ్డంగా నిలుస్తుందన్న టాక్ ప్రారంభమైంది.
ఏడాది కిందట అమిత్ షా ను జూనియర్ ఎన్టీఆర్ కలిసిన సంగతి తెలిసిందే. ఆర్ఆర్ఆర్ సినిమాలో ఉత్తమ నటన గాను తారక్ ను అభినందించేందుకు అమిత్ షా పిలిపించుకున్నారని అప్పట్లో ప్రచారం జరిగింది. అయితే తాజాగా నాటి కలయికపై మరోలా ప్రచారం జరుగుతోంది. చంద్రబాబును అరెస్టు చేస్తారని అమిత్ షా తారక్ కు చెప్పారని.. ఆ సమయంలో చంద్రబాబు కానీ.. తెలుగుదేశం పార్టీకి కానీ సంఘీభావం తెలపొద్దని తారక్ వద్ద అమిత్ షా మాట తీసుకున్నారని టాక్ నడుస్తోంది. అందుకే చంద్రబాబు అరెస్టు విషయంలో జూనియర్ ఎన్టీఆర్ స్పందించలేదని సోషల్ మీడియాలో ప్రచారం జోరుగా సాగుతోంది. అయితే ఇందులో ఎంతవరకు వాస్తవం ఉందో చూడాలి.
