Delhi Elections : భారీ మెజార్టీతో గెలిచిన బీజేపీ.. వెంటనే ఢిల్లీ సెక్రటేరియట్ సీజ్.. ఎందుకంటే ?

Delhi Elections : ఢిల్లీ అసెంబ్లీ ఎన్నికల ఫలితాలు వెలువడ్డాయి. ఈ సారి ఆప్ ఆశలు గల్లంతు అయ్యాయి. బీజేపీకే ఢిల్లీవాసులు పట్టం కట్టారు. అధికార మార్పు నేపథ్యంలో ప్రభుత్వ పత్రాల భద్రతపై ప్రత్యేక చర్యలు తీసుకోవాలని ఢిల్లీ ప్రభుత్వ సాధారణ పరిపాలనా శాఖ (జనరల్ అడ్మినిస్ట్రేషన్ డిపార్ట్‌మెంట్(GAD)) ఒక అధికారిక నోటీసును విడుదల చేసింది. ఎలాంటి అనుమతి లేకుండా ఫైళ్లను, పత్రాలను, కంప్యూటర్ హార్డ్వేర్‌ను ఢిల్లీ సచివాలయం వెలుపలికి తీసుకెళ్లకూడదని స్పష్టంగా పేర్కొంది. అన్ని శాఖల అధికారులు తమ కార్యాలయాల్లో ఉన్న డేటాను సురక్షితంగా ఉంచేలా చర్యలు తీసుకోవాలని ఆదేశించింది.

27 ఏళ్ల తర్వాత ఢిల్లీలో బీజేపీ పునరాగమనం?
ఢిల్లీ అసెంబ్లీ ఎన్నికల ఫలితాల ప్రకారం, గత 10 ఏళ్లుగా అధికారంలో ఉన్న ఆమ్ ఆద్మీ పార్టీ (AAP) భారీ ఓటమి ఎదుర్కొంటోంది. 70 స్థానాలున్న అసెంబ్లీలో భారతీయ జనతా పార్టీ (BJP) 48 స్థానాల్లో ఆధిక్యంలో ఉండగా, ఆప్ కేవలం 22 స్థానాలకు పరిమితమవుతోంది. గత 27 సంవత్సరాల తర్వాత ఢిల్లీలో బీజేపీ తిరిగి అధికారంలోకి రాబోతున్న పరిస్థితి కనబడుతోంది.

ఆప్ ఓటమికి మద్యం విధానమే కారణమా?
ఈ ఎన్నికల ఫలితాల మధ్య ప్రముఖ సామాజిక కార్యకర్త అన్నా హజారే ఆప్ పార్టీపై తీవ్ర విమర్శలు చేశారు. 2011లోని అవినీతివిరుద్ధ ఉద్యమం ద్వారా రాజకీయ రంగ ప్రవేశం చేసిన ఆప్ ఇప్పుడు ఓటమిపాలవడానికి ప్రధాన కారణం మద్యం విధానమేనని అన్నా హజారే వ్యాఖ్యానించారు. ప్రజా సేవ కంటే డబ్బునే ప్రాధాన్యతనిచ్చినందువల్ల ఆమ్ ఆద్మీ పార్టీ నష్టపోయిందని ఆయన తెలిపారు.

కేజ్రీవాల్, సిసోడియాలకు పరాభవం
ఈ ఎన్నికల్లో ఢిల్లీ ముఖ్యమంత్రి అరవింద్ కేజ్రీవాల్ తన సొంత స్థానం న్యూ ఢిల్లీ నుంచి ఓటమి పాలవ్వగా, ఆప్ సీనియర్ నేత మణీష్ సిసోడియా జంగ్‌పురా నుంచి ఓడిపోయారు. మరోవైపు, ఆప్ నేత ఆతిషి మాత్రం విజయం సాధించారు.

ఆమ్ ఆద్మీ పార్టీ పతనం వెనుక కారణాలు
2012లో ఆప్ పార్టీ ఏర్పాటు చేసినప్పుడు అన్నా హజారే కేజ్రీవాల్ నుంచి దూరంగా ఉన్నారు. త్యాగ స్వభావం, ప్రజాసేవను మరిచిపోవడం వల్లే ఆప్ పార్టీకి ఈ స్థితి వచ్చిందని ఆయన విమర్శించారు. ముఖ్యంగా, ఢిల్లీ మద్యం విధానం వివాదం ఆప్ ప్రభుత్వానికి పెను దెబ్బతీసింది. 2021-22లో అమలులోకి వచ్చిన ఈ విధానం అనేక అవినీతి ఆరోపణలకు గురయ్యి, చివరికి రద్దు చేయాల్సి వచ్చింది.

అధికార మార్పునకు సచివాలయం భద్రతకు చర్యలు
ఢిల్లీ అసెంబ్లీ ఎన్నికల ఫలితాలు స్పష్టమవుతున్న వేళ, ప్రభుత్వ పత్రాలు, డేటా భద్రతపై ప్రత్యేక దృష్టి సారించాలని సాధారణ పరిపాలనా శాఖ నిర్ణయించింది. అధికార మార్పు సమయంలో ఎలాంటి పత్రాలూ సచివాలయం వెలుపలికి వెళ్లకుండా చర్యలు తీసుకోవాలని ఆదేశాలు జారీ చేసింది.