Vishal: కలియుగ ప్రత్యక్ష దైవం శ్రీవెంకటేశ్వర స్వామిని దర్శించుకోవడం మహాభాగ్యంగా భక్తులు భావిస్తుంటారు. ఈ క్రమంలోనే హీరోలు, సినీ తారలు కూడా ప్రత్యేక సమయాల్లో, తమ సినిమా రిలీజ్కు ముందుకు స్వామివారి దర్శనార్థం తిరుమలకు వస్తుంటారు. తాజాగా స్టార్ హీరో విశాల్ వెంకటేశుడిని దర్శించుకునేందుకు వచ్చారు. అలిపిరి నుంచి కాలినడకన తిరుమలకు చేరుకొని శ్రీవారిని దర్శించుకున్నారు. మెట్ల మార్గాన తిరుమలకు చేరుకున్న విశాల్ను చూసిన ఆయన అభిమానులు సెల్ఫీలు దిగేందుకు పోటీపడ్డారు. అయితే, విశాల్ కూడా అందరితో కలిసిపోయి సరదాగా గడిపారు. ప్రస్తుతం ఈ వీడియోలు నెట్టింట వైరల్గా మారాయి.
తిరుమలేశుడి దర్శనం అనంతరం నగిరి ఎమ్మెల్యే రోజాను కలిశారు విశాల్. ఆ తర్వాత మీడియాతో మట్లాడిన ఆయన.. తాను నటించిన ఎనిమి సినిమా దీపావళి కానుకగా విడుదల కానుందని తెలిపారు. ఈ చిత్రం తప్పకుండా ప్రేక్షకులను ఆకట్టుకుంటుందని అన్నారు. మరోవైపు, దివంగత నటుడు పునీత్రాజ్కుమార్ గురించి మాట్లాడారు విశాల్ పునీత్ తమ ఇంట్లో మనిషని అన్నారు. తాను ఇళ్లు కొనాలని దాచుకున్న డబ్బును పునీత్ చదివిస్తున్న 1800 మంది విద్యార్ధులకు ఖర్చు చేయనున్నట్లు తెలిపారు.
ఇటీవలే ఆయన ప్రీ రిలీజ్ ఈవెంట్లో స్పందించిన విశాల్.. పునీత్ ఎంతో గొప్పవ్యక్తిగా పేర్కొన్నారు. ఆయన మరణం సినీ ఇండస్ట్రీతో పాటు, అభిమానులకు తీరని లోటని అన్నారు. ఈ క్రమంలోనే పునీత్ చేస్తున్న సామాజిక సేవ ఎంతో గొప్పదని కొనియాడారు. ఈ సందర్భంలోనే ఆయన ఉచితంగా చదివిస్తున్న 1800 పిల్లలను తాను చూసుకుంటానని మాట ఇచ్చారు. దీంతో హీరో విశాల్ సహృదయానికి ఆయన అభిమానులు ఫిదా అయ్యారు.