సమ్మర్ సీజనంతా ‘కరోనా’ సినిమానే..!

దేశంలోకి చైనా వైరస్ ఎంట్రీ ఇవ్వడంతో కేంద్రం లాక్డౌన్ విధించిన సంగతి తెల్సిందే. ప్రస్తుతం లాక్డౌన్ 4.0 కొనసాగుతోంది. మే 31వరకు లాక్డౌన్ కొనసాగనుంది. లాక్డౌన్ కారణంగా పేద, మధ్యతరగతి ప్రజలు, వలస కూలీలు అనేక ఇబ్బందులు పడ్డారు. వలస కూలీలు బాధలు వర్ణాణాతీతం. అయితే లాక్డౌన్ 3.0లో కేంద్రం సడలింపులు ఇవ్వడంతో ఒక్కో రంగం ఇప్పుడే పనులను ప్రారంభించేందుకు సిద్ధమవుతుంది. లాక్డౌన్ కారణంగా అత్యధిక నష్టపరిశ్రమ ఏదైనా ఉందంటే అది చిత్ర పరిశ్రమే. గత రెండునెలలుగా సినిమా షూటింగులు వాయిదా పడటంతో థియేటర్లు మూతపడ్డాయి. దీంతో ఈ రంగాన్నే నమ్ముకొని జీవిస్తున్న వేలాది మంది కార్మికులు ఉపాధిని కొల్పోయారు. అయితే తాజాగా టాలీవుడ్ పెద్దలు షూటింగులు ప్రారంభమయ్యేలా చొరవ చూపడంతో రెండు తెలుగు రాష్ట్రాలు గ్రీన్ సిగ్నల్ ఇచ్చారు. జూన్ రెండో వారం నుంచి షూటింగులు ప్రారంభం కానుంది. దీంతో టాలీవుడ్లో కొత్త సినిమాల సందడి మొదలు కానుంది.

ఇదిలా ఉంటే లాక్డౌన్ కారణంగా సినిమా బిజినెస్ దారుణంగా పడిపోయింది. ప్రతీయేటా వేసవి సెలవులను దృష్టిలో ఉంచుకొని పెద్ద సంఖ్యలో సినిమాలను రిలీజ్ చేసేందుకు దర్శక, నిర్మాతలు ప్లాన్ చేస్తుంటారు. అయితే ఈసారి చైనా వైరస్ కారణంగా సమ్మర్ బిజినెస్ అంతా నిల్ అయింది. రెండు నెలలు థియేటర్లు మూతపడ్డాయి. ప్రస్తుతానికి సినిమా షూటింగులు ప్రారంభమైనప్పటికీ థియేటర్లు మాత్రం ఇప్పట్లో తెరుచుకునే అవకాశాలు కన్పించడం లేదు. ఆగస్టు నాటికి థియేటర్ల రీ ఓపెనింగ్ పై ఓ క్లారిటీ వచ్చే అవకాశం ఉంది. దీంతో థియేటర్ల యజమానులు, డిస్ట్రిబ్యూటర్లు, నిర్మాతలు తీవ్రంగా నష్టపోవాల్సి వస్తోంది. అయితే ఈ సమ్మర్ ను క్యాష్ చేసుకోవాలని చాలా మంది నిర్మాతలు చూశారు. కానీ ఈ సమ్మర్ వారందరికీ పీడకలేనే మిగిల్చింది.

ఈ వేసవి కానుకగా నాని, సుధీర్ బాబు కలిసి నటించిన ‘వీ’. పవన్ కళ్యాణ్ రీ ఎంట్రీ మూవీ వకీల్ సాబ్. యాంకర్ ప్రదీప్ నటించిన 30రోజుల్లో ప్రేమించటం ఎలా?. రాజ్ తరుణ్-ఒరేయ్ బుజ్జిగా. అనుష్క- నిశ్శబ్ధం. వైష్ణవ్ తేజ్ డబ్యూ మూవీ-ఉప్పెన. రాజశేఖర్-అర్జున. శర్వానంద్- శ్రీకారం. రామ్-రెడ్. సాయిధరమ్ తేజ్-సోలో బ్రతుకే సో బెటరూ. రవితేజ-క్రాక్. తమిళ్ విజయ్-మాస్టర్ మూవీలను రిలీజు చేసేందుకు నిర్మాతలు ప్లాన్ చేసుకున్నారు. అయితే సడెన్ గా దేశంలో లాక్డౌన్ విధించడంతో ఈ సినిమాలన్నీ వాయిదా పడ్డాయి. మొత్తంగా 2020 సమ్మర్ సీజన్ సినిమా ఇండస్ట్రీకి ఏమాత్రం కలిసి రాలేదనే చెప్పొచ్చు. ఈ సినిమాలు ఎప్పుడు ప్రేక్షకుల ముందుకు వస్తాయో వేచి చూడాల్సిందే..!