Akhanda: టాలీవుడ్లో నందమూరి బాలకృష్ణ ఫ్యాన్ ఫాలోయింగ్ గురించి ప్రత్యేకంగా చెప్పనక్కర్లేదు. ఆయన విజయాల్లో ముఖ్యంగా ఇద్దరు టాప్ డైరక్టర్ల హస్త ఉంది. గతంలో బాలయ్య బి. గోపాల్ కాంబినేషన్లో వచ్చే సినిమాలు బాక్సాఫీసు వద్ద చరిత్రను తిరగరాశాయి. వీరిద్దరి కలయికలో వచ్చిన చాలా హిట్లు ఉన్నాయి. లారీ డ్రైవర్, రౌజీ ఇన్స్పెక్టర్, సమరసింహారెడ్డి, నరసింహనాయుడు వంటి సూపర్ డూపర్ హిట్ చిత్రాలు ప్రేక్షకులను అలరించాయి. అయితే, అంతే భారీ అంచనాలతో వచ్చిన పల్నాటి బ్రహ్మనాయుడు సినిమా బాక్సాపీసు వద్ద నిరాశపరిచింది. ఈ సినిమా తర్వాత మళ్లీ వీరిద్దరి కాంబినేషన్లో సినిమా రాలేదు.
అయితే, ఇప్పుడు బి. గోపాల్ స్థానంలో బాలయ్యకు బోయపాటి శ్రీను దొరికినట్లు కనిపిస్తోంది. వరుస సినిమాలతో హిట్లు మీద హిట్లు అందిస్తున్నాడు. వీరిద్దరి కలయికలో వచ్చిన సింహా, లెజెండ్ చిత్రాలు ఇండస్ట్రీని షేక్ ఆడించాయి. తాజాగా, అఖండ సినిమా తెలుగు చిత్ర పరిశ్రమకు మళ్లీ పాతరోజులను గుర్తుచేస్తున్నారు. అఖండ సినిమా చూసిన వాళ్లంతా బాలయ్య ఈస్ బ్యాక్.. అంటూ నీరాజనాలు పడుతున్నారు. ఆయన నటన, డైలాగ్లు, యాక్షన్ సీన్లు ఇలా సినిమా మొత్తం పూనకాలు తెప్పించేలా ఉందని అంటున్నారు. ప్రస్తుత కాలంలో వెండితెరపై బాలయ్యను ఎలా చూపించాలో తెలిసిన ఏకైకన డైరెక్టర్ బోయపాటి ఒక్కరేనని సినీ విశ్లేషకులు అంటున్నారు. ఇప్పటికే సినిమా విడుదలైన తొలిరోజు మంచి కలెక్షన్లు రాబట్టింది.
కాగా ఈ సినిమాలో ప్రగ్యా జైస్వాల్ హీరోయిన్కాగా.. శ్రీకాంత్, జగపతిబాబు కీలకపాత్రల్లో కనిపించారు. థమన్ తన మ్యూజిక్తో సినిమాకు ప్రాణం పోశారు.
