Ananth Sriram: మెగాస్టార్ చిరంజీవి, రామ్చరణ్ హీరోలుగా నటించిన సినిమా ఆచార్య. కొరటాల శివ దర్శకత్వంలో ప్రతిష్టాత్మకంగా తెరకెక్కుతోన్న సినిమా ఇది. ఇటీవల ఈ సినిమా నుంచి నీలాంబరి వేరెవ్వరే నీలా మరి అనే పాట విడుదలైంది. ప్రస్తుతం ఈ పాట సోషల్మీడియాలో తెగ వైరల్ అవుతోంది. ఈ సాంగ్ను ప్రముఖ రచయిత అనంత్ శ్రీరామ్ రాశారు. అయితే, ఈ పాట రాయడానికి అనంత్ శ్రీరామ్ చాలా కసరత్తులే చేశారట. ఇటీవల ఓ మీడియాకు ఇచ్చిన ఇంటర్వ్యూలో సినిమాతో పాటు, పాటకు సంబంధించి పలు ఆసక్తికర విషయాలు పంచుకున్నారు.
ఈ సినిమాలో హీరోయిన్ చలాకీగా కనిపించే అల్లరి అమ్మాయి, అలాగే హీరో ఓ పెద్దాయన పెరిగిన, బిడియంతో ఉండే అబ్బాయంటూ చెప్పుకొచ్చారు. అయితే, వీరిద్దరికి ప్రేమ పుట్టిన సమయంలో ఈ పాట వస్తుందని అన్నారు. ఈ క్రమంలోనే అమ్మాయి అందాన్ని, తన అల్లరి తనాన్ని వర్ణించే క్రమంలో ‘వేరెవ్వరే నీలా మరి… నీ అందమే నీ అల్లరి’ అంటూ పాటను ముందుకు తీసుకెళ్లినట్లు శ్రీరామ్ తెలిపారు. అయితే, ప్రస్తుతం ఈ సాంగ్ నెట్టింట వైరల్గా మారడం చాలా ఆనందంగా ఉందని అన్నారు. ఈ పాట విడుదలైన తర్వాత చిరంజీవి ఫోన్ చేశారని అన్నారు. పాట విన్నాక మణిశర్మకు కాల్ చేసి మాట్లాడినప్పటికీ సంతృప్తి కలగలేదని.. అందుకే నీకు కాల్ చేశానని చిరు అన్నట్లు తెలిపారు.
కొరటాల శివ దర్శకత్వంలో రానున్న ఈ సినిమా.. ఫిబ్రవరి 4న విడదల కానుంది. మణిశర్మ ఈ సినిమాకు స్వరాలు అందిస్తున్నారు. 140 కోట్ల రూపాయలతో భారీ బడ్జెట్తో ఈ సినిమా రూపొందిస్తున్నారు. మాట్నీ ఎంటర్టైన్మెంట్, కొనిదెల ప్రొడక్షన్స్ సంయుక్తంగా నిర్మిస్తోన్న సినిమా ఇది.