Maruti Swift, Maruti Dzire : భారత కార్ల మార్కెట్లో మారుతి సుజుకి మరో కీలక అడుగు వేసింది. ఇప్పటివరకు పెట్రోల్, CNG కార్లతో పాటు మాన్యువల్, ఆటోమేటిక్ ట్రాన్స్మిషన్ ఎంపికలను అందిస్తున్న సంస్థ.. తాజాగా ఫ్యాక్టరీ ఫిట్టెడ్ S-CNGతో AMT గేర్బాక్స్ను కలిపిన కొత్త వేరియంట్లను పరిచయం చేసింది. ఇందులో ప్రముఖ మోడళ్లైన స్విఫ్ట్, డిజైర్, బాలెనో ఉన్నాయి. దీంతో నగరాల్లో ట్రాఫిక్లో ఎక్కువగా ప్రయాణించే వారికి CNGతో పాటు రెండు పెడల్ డ్రైవింగ్ సౌకర్యం అందుబాటులోకి వచ్చింది.
మూడు మోడళ్ల ధరలు ఇలా..
మారుతి సుజుకి కొత్త S-CNG AMT కార్ల ప్రారంభ ఎక్స్-షోరూమ్ ధరలను ప్రకటించింది.
మారుతి స్విఫ్ట్ S-CNG AMT: రూ.7,92,400
మారుతి డిజైర్ S-CNG AMT: రూ.8,53,100
మారుతి బాలెనో S-CNG AMT: రూ.8,32,400
ఈ మూడు కార్లలోనూ 1.2 లీటర్, మూడు సిలిండర్ల Z12E పెట్రోల్ ఇంజిన్ను ఉపయోగించారు. ఈ ఇంజిన్లో Dual VVT, Idle Start Stop వంటి టెక్నాలజీలు ఉన్నాయి. CNG మోడ్లో ఇంజిన్ 69.75 PS పవర్, 101.8 Nm టార్క్ ఉత్పత్తి చేస్తుంది. పెట్రోల్ మోడ్లో 82.93 PS పవర్, 112.4 Nm టార్క్ అందిస్తుంది.
మైలేజీలో డిజైర్ ముందంజ
ఈ మూడు మోడళ్లలో డిజైర్ S-CNG AMT అత్యధికంగా 36.47 కిమీ/కేజీ సర్టిఫైడ్ మైలేజీని అందిస్తుంది. స్విఫ్ట్ S-CNG AMT 35.34 కిమీ/కేజీ, బాలెనో S-CNG AMT 34.47 కిమీ/కేజీ మైలేజీని అందిస్తాయి. ఈ సామర్థ్య గణాంకాలు సెంట్రల్ మోటార్ వెహికల్స్ రూల్స్, 1989లోని రూల్ 115 ప్రకారం సర్టిఫై చేయబడ్డాయి.
5-స్పీడ్ AMT గేర్బాక్స్
కొత్త వేరియంట్లలో మారుతి సుజుకి అభివృద్ధి చేసిన 5-స్పీడ్ AGS (AMT) ట్రాన్స్మిషన్ను అందించారు. ఇందులో క్లచ్ ఆపరేషన్, గేర్ మార్పులను ఆటోమేటిక్గా సిస్టమ్ నిర్వహిస్తుంది. అవసరమైన సందర్భాల్లో డ్రైవర్ గేర్ లివర్ ద్వారా మాన్యువల్గా కూడా గేర్ మార్చుకునే అవకాశం ఉంటుంది.
ఈ కార్లలో 37 లీటర్ల పెట్రోల్ ట్యాంక్తో పాటు 55 లీటర్ల వాటర్ ఫిల్లింగ్ కెపాసిటీ కలిగిన CNG ట్యాంక్ ఉంది. CNG ట్యాంక్ను వెనుక బూట్ ప్రాంతంలో అమర్చారు.
భద్రతకు ప్రాధాన్యం
మారుతి S-CNG సిస్టమ్లో Intelligent Injection System, స్టెయిన్లెస్ స్టీల్ పైపులు, ఇంటిగ్రేటెడ్ వైర్ హార్నెస్ వంటి ఫీచర్లను అందించింది. CNG నింపే సమయంలో ఇంజిన్ స్టార్ట్ కాకుండా మైక్రోస్విచ్ కూడా పనిచేస్తుంది. Idle Start Stop టెక్నాలజీ ట్రాఫిక్లో అవసరం లేని సమయంలో ఇంజిన్ను ఆపి ఇంధనాన్ని ఆదా చేయడంలో సహాయపడుతుంది.
ఇక కంపెనీ ప్రకారం, 2026 తొలి త్రైమాసికంలో S-CNG అమ్మకాలు గత ఏడాది ఇదే కాలంతో పోలిస్తే 58 శాతం పెరిగాయి. జూలై 2026లో ఏకంగా 83,000 S-CNG యూనిట్ల విక్రయాలు నమోదయ్యాయని మారుతి తెలిపింది. తాజా AMT వేరియంట్లతో నగర వినియోగదారులకు CNG తక్కువ నిర్వహణ వ్యయం, ఆటోమేటిక్ డ్రైవింగ్ సౌకర్యం రెండింటినీ ఒకే కారులో అందించాలని కంపెనీ లక్ష్యంగా పెట్టుకుంది.
