Maruti Suzuki Sales : దేశీయ కార్ల మార్కెట్లో మారుతి సుజుకి మరోసారి తన సత్తా చాటింది. 2026 సెప్టెంబర్‌లో కంపెనీ మొత్తం అమ్మకాలు గణనీయంగా పెరిగాయి. గత ఏడాది ఇదే నెలతో పోలిస్తే ఏకంగా 24.44 శాతం వృద్ధిని నమోదు చేసింది. సెప్టెంబర్ 2026లో మారుతి సుజుకి మొత్తం 2,36,013 యూనిట్లను విక్రయించింది. 2025 సెప్టెంబర్‌లో ఈ సంఖ్య 1,89,665 యూనిట్లుగా ఉంది. అంటే ఏడాది వ్యవధిలో 46,348 వాహనాలు అదనంగా అమ్ముడయ్యాయి.
ముఖ్యంగా దేశీయ ప్యాసింజర్ వెహికల్ అమ్మకాలు మారుతి సుజుకి వృద్ధికి ప్రధాన కారణంగా నిలిచాయి. సెప్టెంబర్‌లో దేశీయ ప్యాసింజర్ వాహనాల అమ్మకాలు 1,81,838 యూనిట్లకు చేరుకున్నాయి. గత ఏడాది ఇదే నెలలో 1,32,820 యూనిట్లు మాత్రమే అమ్ముడయ్యాయి. దీంతో ఈ విభాగంలో 36.91 శాతం వృద్ధి నమోదైంది. ఆగస్టు 2026లో నమోదైన 1,76,971 యూనిట్లతో పోల్చినా సెప్టెంబర్ అమ్మకాలు 4,867 యూనిట్లు ఎక్కువగా ఉన్నాయి.
యుటిలిటీ వాహనాలకు భారీ డిమాండ్
మారుతి సుజుకి అమ్మకాల్లో యుటిలిటీ వెహికల్స్ కీలక పాత్ర పోషించాయి. ఈ విభాగంలో సెప్టెంబర్‌లో 78,911 యూనిట్లు అమ్ముడయ్యాయి. 2025 సెప్టెంబర్‌లో 48,695 యూనిట్లుగా ఉన్న అమ్మకాలు ఇప్పుడు 62.05 శాతం పెరిగాయి. అంటే ఒక్క ఏడాదిలోనే 30,216 యూనిట్ల అదనపు అమ్మకాలు నమోదయ్యాయి.
ఈ విభాగంలో బ్రెజ్జా, ఎర్టిగా, ఈ విటారా, ఫ్రాంక్స్, గ్రాండ్ విటారా, ఇన్విక్టో, జిమ్నీ, విక్టోరిస్, XL6 వంటి మోడళ్లు ఉన్నాయి. ముఖ్యంగా SUVలకు పెరుగుతున్న డిమాండ్ కంపెనీ మొత్తం అమ్మకాలపై గణనీయమైన ప్రభావం చూపుతోంది.
చిన్న, కాంపాక్ట్ కార్లకూ మంచి స్పందన
మారుతి సుజుకి మినీ, కాంపాక్ట్, మిడ్‌సైజ్ కార్ల అమ్మకాలు కూడా మెరుగుపడ్డాయి. ఈ విభాగంలో సెప్టెంబర్‌లో 91,887 యూనిట్లు అమ్ముడయ్యాయి. గత ఏడాది ఇదే నెలలో 74,090 యూనిట్ల అమ్మకాలతో పోలిస్తే 24.02 శాతం వృద్ధి నమోదైంది. ఆల్టో, బాలెనో, సెలెరియో, సియాజ్, డిజైర్, ఇగ్నిస్, ఎస్-ప్రెస్సో, స్విఫ్ట్, వ్యాగన్‌ఆర్ వంటి మోడళ్లు ఇందులో ఉన్నాయి.
ఈకో వాన్ అమ్మకాలు కూడా 10.01 శాతం పెరిగి 11,040 యూనిట్లకు చేరుకున్నాయి. మరోవైపు ఎగుమతులు 4.77 శాతం పెరిగి 44,219 యూనిట్లుగా నమోదయ్యాయి. అయితే ఇతర OEMలకు, ముఖ్యంగా టయోటాకు సరఫరాలు 44.32 శాతం తగ్గి 6,542 యూనిట్లకు పరిమితమయ్యాయి.
ఆరు నెలల్లో భారీ వృద్ధి
2026 ఏప్రిల్ నుంచి సెప్టెంబర్ వరకు మారుతి సుజుకి మొత్తం అమ్మకాలు 13,79,378 యూనిట్లకు చేరుకున్నాయి. గత ఏడాది ఇదే కాలంలో 10,78,735 యూనిట్లు అమ్ముడయ్యాయి. దీంతో మొదటి ఆరు నెలల్లో కంపెనీ 27.87 శాతం వృద్ధిని నమోదు చేసింది.
H1 FY27లో హ్యాచ్‌బ్యాక్ అమ్మకాలు 41 శాతం పెరిగాయి. ఎంట్రీ హ్యాచ్‌బ్యాక్ విభాగం 86 శాతం, మిడ్ హ్యాచ్‌బ్యాక్ విభాగం 40 శాతం వృద్ధి సాధించాయి. సెప్టెంబర్‌లో మినీ కార్ల అమ్మకాలు 39.8 శాతం పెరిగాయి. కొత్తగా అప్‌డేట్ చేసిన బాలెనో మొదటి నెలలోనే 25,000 యూనిట్ల అమ్మకాలను నమోదు చేసింది. సరఫరా పరిమితులు ఉన్నప్పటికీ డిజైర్ మొదటి అర్ధభాగంలో మారుతి సుజుకి బెస్ట్ సెల్లింగ్ మోడల్‌గా నిలిచింది.
SUVల విషయంలోనూ కంపెనీ దూసుకెళ్తోంది. H1 FY27లో SUV అమ్మకాలు 56 శాతం పెరిగాయి. ప్రస్తుతం మారుతి నెలకు సుమారు 56,000 SUVలను విక్రయిస్తోంది. దేశీయ ప్యాసింజర్ వెహికల్ మార్కెట్లో SUVల వాటా సుమారు 57 శాతానికి చేరుకోవడం కూడా ఈ విభాగానికి పెరుగుతున్న ఆదరణను సూచిస్తోంది.
చిన్న కార్లపై GST రేట్లలో మార్పులు, కొత్తగా ప్రారంభించిన తయారీ ప్లాంట్ నుంచి పెరిగిన సరఫరాలు కూడా అమ్మకాల వృద్ధికి దోహదం చేశాయని మారుతి సుజుకి పేర్కొంది. మొత్తంగా చూస్తే, SUVలు, హ్యాచ్‌బ్యాక్‌లు, కాంపాక్ట్ కార్లకు పెరుగుతున్న డిమాండ్‌తో మారుతి సుజుకి 2026-27 ఆర్థిక సంవత్సరంలో బలమైన వృద్ధి బాటలో కొనసాగుతోంది.
