Five New Flex Fuel Cars: భారత ఆటోమొబైల్ రంగం రాబోయే రోజుల్లో చారిత్రాత్మక మార్పుకు సాక్ష్యంగా నిలవబోతోంది. పెట్రోల్, డీజిల్పై ఆధారపడటాన్ని తగ్గించి, పర్యావరణహిత ఇంధనాల వినియోగాన్ని ప్రోత్సహించేందుకు కేంద్ర ప్రభుత్వం ఫ్లెక్స్-ఫ్యూయల్ వాహనాలకు ప్రాధాన్యం ఇస్తోంది. ఈ నేపథ్యంలో ఇప్పటికే మారుతి సుజుకీ కంపెనీ నుంచి వ్యాగన్ ఆర్ ఫ్లెక్స్ ఫ్యూయెల్ వాహనాన్ని అందుబాటులోకి తీసుకువచ్చారు. అయితే మిగతా కంపెనీలు సైతం ఈ ఇంధన వాహనాలను తీసుకొచ్చేందుకు సిద్ధం అవుతున్నాయి. వీటి రాకతో పెట్రోల్ కార్లతో పాటు ఎలక్ట్రిక్ కార్లకు గట్టి దెబ్బ పడే అవకాశం ఉందన్న చర్చ సాగుతోంది. మరి త్వరలో మార్కెట్లోకి రాబోయే ఆ ఫ్లెక్స్ ఫ్యూయెల్ కార్లు ఏవంటే?
E20, E85, E100 వంటి ఇంధన మిశ్రమాలకు అనుగుణంగా మారుతి సుజుకీ కంపెన నుంచి మొదటి ఫ్లెక్సీ ఫ్యూయెల్ కారు వ్యాగన్ ఆర్ ను ఇప్పటికే మార్కెట్లోకితీసుకువచ్చారు. అయితే ఇప్పుడు కొత్తగా ఈ కంపెనీకి చెందిన ఫ్రాంక్స్ను E85 ఇంధనానికి అనుగుణంగా రూపొందిస్తున్నారు. అంటే 85 శాతం ఇథనాల్, 15 శాతం పెట్రోల్ మిశ్రమంతో ఈ కారు నడవగలదు. ఇథనాల్కు తగిన విధంగా ఇంజిన్, ఫ్యూయల్ ఇంజెక్షన్ వ్యవస్థ, ఎలక్ట్రానిక్ కంట్రోల్ యూనిట్లో ప్రత్యేక మార్పులు చేయనున్నట్లు తెలుస్తోంది.
Toyota Innova Hycross ఇప్పటికే భారత మార్కెట్లో ప్రీమియం MPVగా గుర్తింపు పొందింది. దీనిని కూడా టయోటా ఫ్లెక్స్-ఫ్యూయల్ వెర్షన్లో తీసుకురావడానికి సన్నాహాలు చేస్తోంది. హైబ్రిడ్ టెక్నాలజీలో ముందంజలో ఉన్న టయోటా, ఇప్పుడు ఇథనాల్ ఆధారిత ఇంజన్తో మరో వినూత్న ప్రయోగానికి సిద్ధమవుతోంది. ఇది కుటుంబ వినియోగదారులకు పర్యావరణహిత ఎంపికగా మారే అవకాశం ఉంది.
Hyundai Creta కూడా త్వరలో ఇథనాల్ వెర్షన్లో రానున్న ప్రముఖ SUVలలో ఒకటి. హ్యుందాయ్ ఇప్పటికే పూర్తి 100 శాతం ఇథనాల్తో నడిచే క్రెటా ప్రోటోటైప్ను ప్రదర్శించింది. E100 ఇంధనంతో పనిచేసే ఈ మోడల్ విజయవంతమైతే, భారత మార్కెట్లో పూర్తిస్థాయి ఇథనాల్ కార్లకు మార్గం సుగమం కావచ్చు. దీంతో కాలుష్య నియంత్రణలో కూడా గణనీయమైన పురోగతి సాధించే అవకాశం ఉంది.
దేశీయ ఆటో దిగ్గజం Tata Motors తన తొలి ఫ్లెక్స్-ఫ్యూయల్ కారుగా Tata Punchను తీసుకురావడానికి సిద్ధమవుతోంది. ఈ మోడల్ను భారత్ మొబిలిటీ ఎక్స్పో 2025లో ప్రదర్శించగా మంచి స్పందన లభించింది. కాంపాక్ట్ SUV సెగ్మెంట్లో ఇప్పటికే పాపులర్గా ఉన్న పంచ్, ఇథనాల్ వెర్షన్తో మార్కెట్లోకి వస్తే మధ్యతరగతి వినియోగదారులను ఆకర్షించే అవకాశం ఉంది.
MG Hector కూడా ఫ్లెక్స్-ఫ్యూయల్ జాబితాలో చోటు దక్కించుకునే అవకాశాలు కనిపిస్తున్నాయి. భారత మార్కెట్లో మంచి క్రేజ్ కలిగిన హెక్టర్ను ఇథనాల్ ఇంజన్తో పరిచయం చేయాలని సంస్థ యోచిస్తున్నట్లు సమాచారం. అధునాతన ఫీచర్లు, విశాలమైన క్యాబిన్తో ఇప్పటికే ప్రత్యేక గుర్తింపు పొందిన ఈ SUV, కొత్త ఇంధన సాంకేతికతతో మరింత ఆకర్షణీయంగా మారవచ్చు.
