Diwali 2024
Diwali 2024 : దీపావళి పండుగ దగ్గర పడింది. షాపింగ్‌ కారణంగా మార్కెట్‌లో రద్దీ కనిపిస్తోంది. పండుగ కారణంగా ఏర్పడిన డిమాండ్ అనేక ఉపాధి అవకాశాలను కూడా సృష్టించింది. ఈ పండుగల సీజన్‌లో లాజిస్టిక్స్, ఆపరేషన్స్, ఈ-కామర్స్ , టూరిజం రంగాలలో ఉద్యోగాల సంఖ్య వార్షిక ప్రాతిపదికన 20 శాతం పెరిగింది. ఈ సమయంలో మొత్తం 2.16 లక్షల అవకాశాలు నమోదయ్యాయని ప్రొఫెషనల్ నెట్‌వర్కింగ్ ప్లాట్‌ఫామ్ ‘అప్నా.కో’ ఈ సమాచారాన్ని తెలియజేస్తోంది. వినియోగదారుల వ్యయం మందగించిన తర్వాత పుంజుకోవాలని చూస్తున్న వ్యాపారాలకు ఈ సంవత్సరం పండుగ సీజన్ చాలా ముఖ్యమైనది.
70 శాతం పెరిగింది
ఇది కాకుండా వస్తువులను వేగంగా డెలివరీ చేసే తక్షణ వాణిజ్య పరిశ్రమ విస్తరణ కూడా రిక్రూట్‌మెంట్‌కు దోహదపడింది. ఈ కాలంలో లాజిస్టిక్స్, ఆపరేషన్స్ రంగంలో అవకాశాలు వార్షిక ప్రాతిపదికన 70 శాతం పెరిగాయి. మరోవైపు, రిటైల్, ఈ-కామర్స్ 30 శాతం వృద్ధి చెందగా.. రెస్టారెంట్, హాస్పిటాలిటీ రంగం 25 శాతం పెరిగింది. Rapido, Delhivery, eCart, Shiprocket వంటి కంపెనీలు వివిధ పోస్టుల కోసం 30,000 కంటే ఎక్కువ ఖాళీలను పోస్ట్ చేశాయి. అప్నా.కో వ్యవస్థాపకుడు, చీఫ్ ఎగ్జిక్యూటివ్ ఆఫీసర్ (CEO) నిర్తత్ పారిఖ్ మాట్లాడుతూ.. ‘మా భాగస్వాములకు ఈ సంవత్సరం చాలా ముఖ్యమైనదని.. వారు వినియోగదారుల డిమాండ్‌లో 20-25 శాతం వృద్ధిని సాధిస్తారని భావిస్తున్నారు.’ అని అన్నారు.
రూ.4 లక్షల కోట్ల వ్యాపారం
ఈ ఏడాది దీపావళి పండుగ సందర్భంగా రూ.4.25 లక్షల కోట్ల వ్యాపారం జరుగుతుందని అంచనా. దీపావళి, దాని సంబంధిత పండుగల కోసం ఢిల్లీ .. దేశంలోని ఇతర ప్రాంతాలలో సన్నాహాలు జోరందుకున్నాయి. వ్యాపారులు తమ వ్యాపారాన్ని పెంచుకోవడానికి మరింత ఎక్కువ మంది కస్టమర్లను ఆకర్షించాలని లక్ష్యంగా పెట్టుకున్నారు. దీపావళి, పండుగ సీజన్ కోసం ఢిల్లీ మార్కెట్లలో.. దేశవ్యాప్తంగా భారీ సన్నాహాలు జరుగుతున్నాయని చాందినీ చౌక్ ఎంపీ అండ్ కాన్ఫెడరేషన్ ఆఫ్ ఆల్ ఇండియా ట్రేడర్స్ (CAIT) ప్రధాన కార్యదర్శి ప్రవీణ్ ఖండేల్వాల్ తెలిపారు. రక్షా బంధన్, నవరాత్రి, కరవా చౌత్‌ల సందర్భంగా విక్రయాలు పెరగడంతో ఈ దీపావళి సీజన్‌లో దేశవ్యాప్తంగా దాదాపు రూ.4.25 లక్షల కోట్ల వ్యాపారం జరుగుతుందని వ్యాపారులు అంచనా వేస్తున్నారని, ఇందులో ఒక్క ఢిల్లీలోనే రూ.75,000 కోట్ల వ్యాపారం జరుగుతుందని ఆయన చెప్పారు.