Professor Nageshwar Arrest: తెలుగు రాష్ట్రాల్లో రాజకీయ వివాదానికి కారణమయ్యారు ప్రొఫెసర్ నాగేశ్వర్. కేంద్ర హోం శాఖ మంత్రి అమిత్ షా తో ఏపీ డిప్యూటీ సీఎం పవన్ కళ్యాణ్ భేటీ సందర్భంగా చాలా రకాల పరిణామాలు చోటు చేసుకున్నాయని వివరించే ప్రయత్నం చేశారు నాగేశ్వర్. ఈ క్రమంలో పవన్ కళ్యాణ్ కు జగన్మోహన్ రెడ్డి విషయంలో అమిత్ షా క్లాస్ పీకినట్లు కూడా చెప్పుకొచ్చారు.. జగన్ నమ్మదగిన మిత్రుడు అని.. చంద్రబాబు తాత్కాలిక మిత్రుడు అన్నట్టు కూడా విశ్లేషించారు ప్రొఫెసర్ నాగేశ్వర్. అయితే ఏపీ రాజకీయాల్లో ఇది దుమారానికి దారితీసింది. పవన్ కళ్యాణ్ విరుచుకుపడ్డారు. టిడిపి శ్రేణులు కూడా మండిపడ్డాయి. పోలీస్ కేసులు కూడా నమోదయ్యాయి. ఈ నేపథ్యంలో తన వ్యాఖ్యలను వెనక్కి తీసుకున్నారు ప్రొఫెసర్ నాగేశ్వర్. అటు జనసేన సైతం ఇంతటితో ఈ వివాదానికి పుల్ స్టాప్ పెడతామని ప్రకటించింది. అయినా సరే వివాదం కొనసాగుతోంది. దీనిపై తాజాగా స్పందించారు పవన్ కళ్యాణ్. కీలక వ్యాఖ్యలు కూడా చేశారు.
* తెలంగాణ నేతల మద్దతు..
ప్రొఫెసర్ నాగేశ్వర్ అరెస్ట్ అంటూ పెద్ద ఎత్తున ప్రచారం నడుస్తోంది. అయితే ఆయనను అరెస్టు చేస్తే ఊరుకునేది లేదని తెలంగాణ నేతలు హెచ్చరిస్తున్నారు. మరోవైపు చాలామంది నాగేశ్వర్ కు మద్దతు ఇస్తున్నారు. యుద్ధం మీరు ప్రారంభించారు.. ముగింపు నేను ఇస్తానంటూ ప్రొఫెసర్ నాగేశ్వర్ సైతం సవాల్ చేశారు. హైదరాబాదులో ఏపీ పోలీసులు దిగారని.. ఈ క్షణంలోనైనా ప్రొఫెసర్ నాగేశ్వర్ అరెస్టు జరుగుతుందని పెద్ద ఎత్తున ప్రచారం నడిచింది. తాజా వివాదం నేపథ్యంలో తెలంగాణ పోలీసులు ప్రొఫెసర్ నాగేశ్వర్ కు రక్షణ కల్పిస్తున్నారు. అయితే అరెస్టులపై తెగ హడావిడి నడుస్తోంది హైదరాబాదులో. ఈ తరుణంలో ఏపీ డిప్యూటీ సీఎం పవన్ కళ్యాణ్ అరెస్టుపై స్పందించి మాట్లాడారు.
* వదిలేయండి అంటూ తేలిగ్గా..
రాజమండ్రి పర్యటనలో ఉన్న డిప్యూటీ సీఎం పవన్ కళ్యాణ్ జనసేన శ్రేణులతో వరుసగా సమావేశం అవుతూ వస్తున్నారు. ఇదే సమావేశంలోనే ప్రొఫెసర్ నాగేశ్వర్ తీరుపై తీవ్రస్థాయిలో విరుచుకుపడ్డారు పవన్ కళ్యాణ్. హద్దులు మీరు వ్యవహరిస్తే తాటతీస్తాం అంటూ హెచ్చరించారు. అయితే ఇప్పుడు ప్రొఫెసర్ నాగేశ్వర్ అరెస్టుపై పెద్ద ఎత్తున ప్రచారం నడుస్తున్న తరుణంలో మూడు రోజుల తర్వాత మళ్లీ స్పందించారు పవన్ కళ్యాణ్. ప్రొఫెసర్ నాగేశ్వర్ అరెస్టు సమాచారం తనకు వచ్చిందని.. వద్దని ఆదేశాలు ఇచ్చామని.. ఆయన సైతం మంచివాడు అని.. ఏదో ఆ సమయానికి అలా అనేసారు అంటూ చాలా తేలిగ్గా తీసుకున్నారు. దీంతో ప్రొఫెసర్ నాగేశ్వర్ వివాదానికి పవన్ కళ్యాణ్ ఫుల్ స్టాప్ పెట్టినట్లు భావించాలి.
