America Green Card: అగ్రరాజ్యం అమెరికాలో ఉపాధి ఆధారిత గ్రీన్కార్డు కోసం వేచి ఉన్న వారి సంఖ్య ఏటా పెరుగుతోంది. జాతీయ అమెరికన్ పాలసీ ఫౌండేషన్ (ఎన్ఎఫ్ఏపీ) ప్రకారం, ఈ బ్యాక్లాగ్లో భారతీయులు అత్యధిక భాగం ఉన్నారు. నైపుణ్యం ఉన్న వ్యక్తులు, వారి కుటుంబాలతోపాటు అమెరికా కంపెనీలపైనా ప్రభావం చూపుతుంది.
బ్యాక్లాగ్లో భారతీయులే ఎక్కువ..
డిసెంబర్ 2025 నాటికి ఉపాధి ఆధారిత మొదటి మూడు వర్గాల్లో (ఈబీ–1, ఈబీ–2, ఈబీ–3) మొత్తం బ్యాక్లాగ్ దాదాపు 12.6 లక్షల మందికి చేరుకుంది. వీరిలో దాదాపు 10 లక్షల మంది భారతీయులే. ఇది ఇతర దేశాల అభ్యర్థులతో పోలిస్తే భారీగా ఉంది. ఏప్రిల్ 2020 నుంచి డిసెంబర్ 2025 మధ్య భారతీయుల బ్యాక్లాగ్ మరింత పెరిగింది. మొత్తం ఉపాధి బ్యాక్లాగ్ కూడా 20 శాతం పైచిలుకు పెరగడం గమనార్హం.
గరిష్టంగా 179 ఏళ్లు పడుతుంది..
అధునాతన డిగ్రీలు లేదా అసాధారణ ప్రతిభ ఉన్న వారికి సంబంధించిన ఈబీ–2 వర్గంలోనే సమస్య తీవ్రంగా కనిపిస్తోంది. ఈ వర్గంలోనే లక్షలాది భారతీయులు వేచి ఉన్నారు. 2026 జనవరి లేదా తర్వాత దరఖాస్తు చేసిన భారతీయ అభ్యర్థులకు ఈ వర్గంలో సుమారు 179 సంవత్సరాలు పడుతుందని అంచనా. ఈబీ–3 (నైపుణ్య కార్మికులు, ప్రొఫెషనల్స్)లో ఇది సుమారు 38 సంవత్సరాలు పడుతుంది. ఇక ఈబీ–1 (అసాధారణ సామర్థ్యం, బహుళజాతి ఎగ్జిక్యూటివ్లు)లో 4 నుంచి 5 సంవత్సరాలు మాత్రమే.
ఎందుకు ఇంత సుదీర్ఘ నిరీక్షణ..
సుదీర్ఘ కాలం వేచి చూపుకు ప్రధాన కారణాలు రెండు ఉన్నాయి. ఒకటి సంవత్సరానికి ఉపాధి ఆధారిత గ్రీన్కార్డుల పరిమితి. రెండోది ఏ దేశం నుంచి వచ్చినా 7 శాతం కంటే ఎక్కువ వీసాలు ఇవ్వకూడదనే దేశవారీ పరిమితి. భారత్ నుంచి అధిక సంఖ్యలో అభ్యర్థులు వచ్చినా, చిన్న దేశాలతో సమానంగా ఈ పరిమితి వర్తిస్తుంది. ఫలితంగా క్యూ క్లియర్ అయ్యే కంటే వేగంగా పెరుగుతోంది. అనేకమంది హెచ్–1బీ వంటి తాత్కాలిక వీసాలపై ఉండి గ్రీన్కార్డు కోసం ఏళ్ల తరబడి వేచి ఉంటున్నారు. ఇది కుటుంబాలపై ఒత్తిడి, ఉద్యోగ మార్పుల్లో ఇబ్బందులు, భవిష్యత్తు అనిశ్చితిని కలిగిస్తోంది.
నిపుణులపై ప్రభావం..
ఈ పరిస్థితి అమెరికా కంపెనీలకు నైపుణ్యం ఉన్న టాలెంట్ను ఆకర్షించడం, నిలుపుకోవడంలో ఇబ్బంది కలిగిస్తోంది. భారతీయ నిపుణులు సైన్స్, ఇంజనీరింగ్, టెక్నాలజీ రంగాల్లో కీలక పాత్ర పోషిస్తున్న నేపథ్యంలో ఇది మరింత ముఖ్యం. చట్ట సవరణలు లేకపోతే 2040 నాటికి మొత్తం బ్యాక్లాగ్ 20 లక్షలు దాటే అవకాశం ఉందని అంచనా. కొందరు అభ్యర్థులు క్యూ నుంచి తప్పుకోవడం లేదా ఇతర దేశాలకు మళ్లడం జరగవచ్చు.
ఈ బ్యాక్లాగ్ అమెరికా ఇమ్మిగ్రేషన్ వ్యవస్థలోని పాత నిబంధనలు, పెరుగుతున్న డిమాండ్ మధ్య అసమతుల్యతను ప్రతిబింబిస్తోంది. దేశవారీ పరిమితులు సడలించడం లేదా వార్షిక కోటా పెంచడం వంటి సంస్కరణలు లేకుండా పరిస్థితి మారే అవకాశం తక్కువ.
