ISKCON Bangladesh: ఆయనేమీ అవినీతికి పాల్పడలేదు. అక్రమానికి శ్రీకారం చుట్టలేదు. కోట్లకు కోట్లు వెనకేసుకోలేదు. ఆయన చేసింది కేవలం పోరాటం. అది కూడా తన వర్గం వారిని ఇబ్బంది పెడుతుంటే.. కళ్ళ ముందు చంపేస్తుంటే తట్టుకోలేక నిరసనకు దిగాడు. ఇలాంటి దారుణం ఇంకెన్నాళ్లు అంటూ ప్రభుత్వాన్ని ప్రశ్నించాడు. మాకు బతికే హక్కు లేదా అంటూ నినదించాడు. అటువంటి వ్యక్తిని ఇంకో సామాజిక వర్గం అయితే నెత్తిన పెట్టుకునేది. కానీ హిందువులు మర్చిపోయారు. చేసిన పోరాటానికి గుర్తింపు లేదు. చివరికి ఆయన పరిస్థితి శ్రీకృష్ణ జన్మస్థానానికి పరిమితమైపోయింది.
ఇంతటి స్థాయిలో ఇబ్బందిని ఎదుర్కొంటున్న ఆ వ్యక్తి పేరు బ్రహ్మచారి చిన్మయి కృష్ణదాస్. పేరుకు తగ్గట్టుగానే ఇతడు శ్రీకృష్ణుడికి విపరీతమైన భక్తుడు. బంగ్లాదేశ్లో ఇస్కాన్ టెంపుల్ లో పరిచారకుడిగా పని చేస్తున్నాడు. ఇతడికి హిందుత్వం అంటే చాలా ఇష్టం. శ్రీకృష్ణుని బోధనలను ఇతడు బంగ్లాదేశ్లో వినిపిస్తూ ఉంటాడు. అయితే బంగ్లాదేశ్లో షేక్ హసీనా ప్రభుత్వం కుప్పకూలిన తర్వాత.. అక్కడ పరిస్థితులు మారిపోయాయి. బంగ్లాదేశ్లో హిందువుల మీద దాడులు పెరిగిపోయాయి.
ఈ పరిస్థితిని కృష్ణ దాస్ తీవ్రంగా తప్పుపట్టాడు. బంగ్లాదేశ్లో ప్రధాన నగరాలలో ప్రభుత్వానికి వ్యతిరేకంగా నిరసనలు చేపట్టాడు. అతడు వ్యవహరిస్తున్న తీరు పట్ల బంగ్లాదేశ్ అధికారులు కాకుండా.. ఇస్కాన్ ఆగ్రహం వ్యక్తం చేసింది. మనము పనిచేయాల్సింది శ్రీకృష్ణ ఆలయాల పరిరక్షణ కోసం.. హిందూ ధర్మం కోసం కాదంటూ వ్యాఖ్యలు చేసింది. దీంతో కృష్ణ దాస్ పోరాటం ఉపయోగం లేనిదిగా మారిపోయింది. ఈ దశలో కృష్ణదాస్ తన పోరాటాన్ని తగ్గించలేదు. అయితే ఆ మధ్య బంగ్లాదేశ్లో సైఫల్ అలీఫ్ అనే వ్యక్తి హత్యకు గురయ్యాడు.. ఈ దారుణానికి కారణం కృష్ణ దాస్ అని బంగ్లాదేశ్ ప్రభుత్వం కేసులు పెట్టింది. ఈ కేసుకు సంబంధించి విచారణ లేదు. అతడిని దాదాపు 500 రోజులుగా జైల్లోనే బంగ్లాదేశ్ అధికారులు ఉంచుతున్నారు. ఇటీవల డాకా హైకోర్టులో అతడు బెయిల్ కోసం పిటిషన్ దాఖలు చేస్తే.. కోర్టు కొత్త వాదనను తెరపైకి తీసుకువచ్చింది. కృష్ణ దాస్ మీద అనేక రకాల కేసులు ఉన్నాయని.. అందువల్ల బెయిల్ ఇవ్వడం కుదరదని కోర్టు స్పష్టం చేసింది. దీంతో కృష్ణ దాస్ శ్రీకృష్ణ జన్మస్థానంలో.. శ్రీకృష్ణుడి గీతాలు ఆలపించుకుంటూ జీవితాన్ని గడిపేస్తున్నారు. హిందువుల కోసం అతడు పోరాడితే.. చివరికి ఆ హిందువులే అతడిని మర్చిపోయే పరిస్థితి నెలకొంది.
