Premature Grey Hair: ప్రస్తుత కాలంలో చాలామంది పోషకాహార లోపం, ఒత్తిడి, కాలుష్యం, కొన్ని ఆరోగ్య సమస్యలు ఎదుర్కొంటున్నారు. అయితే వీటి వల్ల చిన్న వయసులోనే జుట్టు తెల్లబడటం వంటి సమస్యను ఎదుర్కొంటున్నారు. గతంలో వృద్ధాప్యంలో మాత్రమే కనిపించే ఈ సమస్య ఇప్పుడు 20 నుంచి 30 ఏళ్ల వయసులోనే వస్తోంది. అయితే ఈ సమస్యలకు కారణాలేంటీ? ఈ సమస్యకు పరిష్కారం ఎలా?
మన జుట్టుకు రంగును ఇచ్చేది మెలనిన్ (Melanin) అనే సహజ వర్ణద్రవ్యం. ఇది హెయిర్ ఫాలికల్స్లో ఉండే మెలనోసైట్స్ అనే కణాల ద్వారా ఉత్పత్తి అవుతుంది. వయసు పెరిగే కొద్దీ ఈ కణాల పనితీరు తగ్గడం సహజం. అయితే కొందరిలో జన్యుపరమైన కారణాలు, పోషకాల లోపం లేదా జీవనశైలి కారణంగా చిన్న వయసులోనే మెలనిన్ ఉత్పత్తి తగ్గిపోవడంతో జుట్టు తెల్లబడుతుంది.
విటమిన్ బి-12, కాపర్, ఐరన్, ఫోలేట్, జింక్ వంటి పోషకాలు శరీరంలో తక్కువగా ఉంటే జుట్టు ఆరోగ్యంపై ప్రభావం పడుతుంది. ముఖ్యంగా కాపర్ లోపం వల్ల మెలనిన్ ఉత్పత్తి తగ్గే అవకాశం ఉంటుంది. అందుకే సమతుల ఆహారం తీసుకోవడం చాలా అవసరమని వైద్యులు సూచిస్తున్నారు. అధిక మానసిక ఒత్తిడి, నిద్రలేమి, ఆందోళన వంటి సమస్యలు శరీరంలో ఆక్సిడేటివ్ స్ట్రెస్ను పెంచుతాయి. దీని ప్రభావం జుట్టు కుదుళ్లపై పడటంతో జుట్టు త్వరగా తెల్లబడే అవకాశం ఉంది. ప్రతిరోజూ తగినంత నిద్ర, యోగా, ధ్యానం, వ్యాయామం వంటి అలవాట్లు ఒత్తిడిని తగ్గించడంలో సహాయపడతాయి.
జుట్టు ఆరోగ్యంగా ఉండాలంటే కాపర్ అధికంగా ఉండే నువ్వులు, జీడిపప్పు, డార్క్ చాక్లెట్, బాదం, పప్పుధాన్యాలు వంటి ఆహారాలను తీసుకోవాలి. అలాగే విటమిన్-సీ పుష్కలంగా ఉండే ఉసిరికాయ, నారింజ, జామ, అలాగే కరివేపాకు వంటి ఆహారాలను రోజువారీ డైట్లో చేర్చుకుంటే జుట్టు ఆరోగ్యానికి మేలు జరుగుతుంది. ధూమపానం చేయడం వల్ల శరీరంలో ఫ్రీ రాడికల్స్ పెరిగి జుట్టు కుదుళ్లు దెబ్బతినే ప్రమాదం ఉంటుంది. అలాగే అధికంగా జంక్ ఫుడ్ తీసుకోవడం, తరచూ హెయిర్ డైలు, కెమికల్ ట్రీట్మెంట్లు వాడడం కూడా జుట్టు నాణ్యతను దెబ్బతీస్తాయి. అందుకే సిగరెట్, మద్యం వంటి అలవాట్లకు దూరంగా ఉండాలని నిపుణులు సూచిస్తున్నారు.
చిన్న వయసులోనే అకస్మాత్తుగా ఎక్కువగా జుట్టు తెల్లబడడం, జుట్టు రాలడం కూడా ఎక్కువగా ఉంటే వైద్యులను సంప్రదించడం మంచిది. అవసరమైతే విటమిన్ బి-12, ఐరన్, కాపర్ వంటి పోషకాల స్థాయిలను పరీక్షించి, లోపం ఉంటే చికిత్స తీసుకోవాలి. స్వయంగా మందులు లేదా సప్లిమెంట్లు తీసుకోవడం కంటే వైద్యుల సలహాతోనే ఉపయోగించడం ఉత్తమం.
జుట్టు తెల్లబడిన తర్వాత దాన్ని సహజ రంగులోకి మార్చే శాస్త్రీయంగా నిర్ధారిత ఆహారం లేదా ఇంటి చిట్కా ప్రస్తుతం లేదు. అయితే సమతుల ఆహారం, పోషకాలు అధికంగా ఉండే డైట్, ఒత్తిడి నియంత్రణ, ధూమపానానికి దూరంగా ఉండటం వంటి ఆరోగ్యకరమైన అలవాట్లు పాటిస్తే జుట్టు ఆరోగ్యాన్ని కాపాడుకోవడంతో పాటు, మరింత వేగంగా తెల్లబడకుండా ఉండేందుకు కొంతవరకు సహాయపడే అవకాశం ఉందని వైద్య నిపుణులు చెబుతున్నారు.
