Viral : ‘డ్రాయర్కి తెలియకుండా బనియన్ దొంగిలించాలి’.. అంటూ డీజే టిల్లులో హీరో సిద్ధు జొన్నలగడ్డ డైలాగ్ ఎంత పాపులర్ అయిందో తెలిసిందే. ఈ డైలాగ్ సరిగ్గా దొంగలకు అట్టినట్టు సరిపోతుంది. దొంగల విషయంలో అదే జరుగుతుంది. చాలా హుషారుగా కనిపిస్తూనే సెకన్లలో దోచేస్తుంటారు. తర్వాత ఎవరికీ తెలియకుండా సమ్మగా జారుకుంటారు. దొంగలు చాలా తెలివైనవారు. దొంగలు కేవలం దొంగతనం మీదే దృష్టి పెట్టరు.. ఏం దోచేస్తున్నారు.. దాని విలువ మేరకు ఎంత రిస్క్ అయినా తీసుకుంటారు. దొరికిపోకుండా ఉండేందుకు టక్కుటమారా విద్యలన్నీ వాడేస్తుంటారు. చిన్న దొంగతనం.. విలువైనదే దోచేస్తుంటారు. ఇక్కడ ఓ దొంగ “కొండను తవ్వి ఎలుకను పట్టినట్లు” ప్రవర్తించాడు. ఓ పెద్ద మద్యం దుకాణానికి పెద్ద గొయ్యి వేసి ఏం తీశాడో తెలిస్తే.. వీడెక్కడి దొంగరాబాబు అంటారు.
హైదరాబాద్ నగర శివార్లలోని శంషాబాద్ మండలం పాలమాకుల గ్రామంలో శ్రీ లక్ష్మీ నరసింహ వైన్ షాప్ ఉంది. నవంబర్ 29 తెల్లవారుజామున 3:45 గంటలకు ఈ వైన్ షాపులో చోరీ జరిగింది. ఓ దుండగుడు మద్యం షాపులో పెద్ద రంధ్రం చేసి షాపులోకి ప్రవేశించాడు. బాగా ప్రిపేర్ అయ్యి రంగంలోకి దిగిన ఈ దొంగ.. పై నుంచి కింది వరకు ఒకే రంగు ఉండేలా జాగ్రత్తలు తీసుకున్నాడు. సీసీ కెమెరాలకు చిక్కకుండా ఉండేందుకు హూడీ ధరించి, ముఖానికి కండువా కట్టుకున్నాడు. మరి వాడు మర్చిపోయాడో లేక కావాలని వేసుకున్నాడో తెలీదు కానీ చెప్పులు మాత్రం వేసుకోలేదు.
దుకాణంలోకి ప్రవేశించిన దొంగ ఎదురుగా ఉన్న గదిలోకి వెళ్లాడు. అక్కడ ఏమీ కనిపించకపోవడంతో షాపు పూర్తిగా తెలిసినవాడిలా నేరుగా క్యాష్ కౌంటర్ దగ్గరకు వెళ్లాడు. ప్రధాన కౌంటర్లో డబ్బులు లేవు. పక్కనే ఉన్న మరొకదానిలోకి చూశాడు. అందులో కూడా డబ్బులు లేవు. మరో డ్రాను కూడా తెరచి చూశాడు అక్కడా ఏమీ లేదు. దీంతో అతను చాలా నిరాశకు గురయ్యాడు. వెళ్లిపోదామనుకుని అంత కష్టపడి లోపలికి వచ్చి ఉత్తి చేతులతో ఎలా వెళ్ళిపోవాలి అనుకున్నాడో ఏమో ఓ అడుగు వెనక్కి వేశాడు.. కొన్ని మంచి బ్రాండ్ సరుకులను తీసుకుని బయటకు పోవాలని భావించాడు.
అక్కడున్న రాక్లో ఉన్న స్టాక్ని చూశాడు. అన్ని బ్రాండ్లు కనిపించాయి. అంతా టేస్ట్ చేసినట్లుగా చూశాడు. అక్కడ ఉన్న 8 PM ఫుల్ బాటిల్ తీసుకున్నాడు.. ఒక్కటి కూడా తీసుకుంటే బాగుంటుంది అనుకుని.. ఆ పైన మరో బాటిల్ తీసుకున్నాడు. కొంచం వెరైటీగా, ఇంకొంచెం అందంగా చేతిలో.. వెనుదిరిగి చూడకుండా తను చేసిన రంధ్రాన్ని వదిలేశాడు. ఈ దృశ్యాలన్నీ అక్కడి సీసీటీవీ కెమెరాల్లో రికార్డయ్యాయి. ఈ ఘటనపై షాపు యజమాని ఫిర్యాదు మేరకు పోలీసులు కేసు నమోదు చేసి దర్యాప్తు చేస్తున్నారు. అయితే సీసీటీవీ ఫుటేజీని చూసి పోలీసులు కూడా ఆశ్చర్యపోయినట్లు తెలుస్తోంది. చుట్టూ ఇంత సరుకు ఉన్నప్పటికీ, అతను కేవలం రెండు సీసాలను మాత్రమే దొంగతనం చేయడం ఏంటని అనుకున్నారు. నగదు లేకపోవడంతో అతను చాలా నిరాశకు గురైనందున అతను సరుకుల పట్ల అంత ఆసక్తి చూపలేదని కొందరు అంటున్నారు.
