Nana Patekar : ప్రముఖ బాలీవుడ్ నటుడు నానా పటేకర్ మృతి సినీ పరిశ్రమలో తీవ్ర విషాదాన్ని నింపింది. తన విలక్షణ నటన, గంభీరమైన స్క్రీన్ ప్రెజెన్స్‌తో ప్రేక్షకుల మనసుల్లో ప్రత్యేక స్థానాన్ని సంపాదించుకున్న నానా పటేకర్ అక్టోబర్ 8న కన్నుమూశారు. ఆయన వయసు 75 సంవత్సరాలు. గుండెపోటుతో ఆయన మరణించినట్లు సమాచారం. నానా పటేకర్ మరణవార్తతో బాలీవుడ్ ప్రముఖులు, అభిమానులు తీవ్ర దిగ్భ్రాంతికి గురయ్యారు.
నానా పటేకర్‌తో తనకున్న అనుబంధాన్ని ప్రముఖ ఫొటోగ్రాఫర్ అతుల్ కస్బేకర్ సోషల్ మీడియా వేదికగా గుర్తుచేసుకున్నారు. నానా పటేకర్‌తో కలిసి దిగిన ఓ నలుపు-తెలుపు ఫొటోను పంచుకున్న అతుల్.. ‘‘నానా సాహెబ్.. ఎలాంటి వ్యక్తి! ఎంతటి లోటు!’’ అంటూ భావోద్వేగ నివాళి అర్పించారు. తాము తరచుగా కలుసుకోకపోయినా, కలిసిన ప్రతిసారీ నిన్ననే కలిసినట్టుగా అనిపించేదని తెలిపారు.
నానా వ్యక్తిత్వాన్ని ‘‘అంచనా వేయలేని వ్యక్తి.. తీవ్రమైన స్వభావం.. తనదైన సిద్ధాంతాలతో జీవించే మనిషి’’గా అతుల్ అభివర్ణించారు. పుణెలోని నానా ఫామ్‌హౌస్‌లో ఫొటోషూట్ కోసం వెళ్లిన సందర్భాన్ని గుర్తుచేసుకుంటూ ఆయన ఎన్నో ఆసక్తికర విషయాలను వెల్లడించారు. తన సిబ్బంది, అసిస్టెంట్లు, స్పాట్‌బాయ్స్, డ్రైవర్లతో నానా వ్యవహరించిన తీరు తనను ఎంతగానో ఆకట్టుకుందని చెప్పారు.
ఫామ్‌హౌస్‌లో భోజనం సమయంలో సిబ్బంది అందరినీ ఒకే డైనింగ్ ఏరియాలో కూర్చోబెట్టి, నానా స్వయంగా వారికి రొట్టెలు, తనకు ఎంతో ఇష్టమైన మటన్ వడ్డించేవారని తెలిపారు. ఎలాంటి హోదా భేదాలు లేకుండా, ఎలాంటి హంగామా లేకుండా ఆయన చూపించిన ఆతిథ్యం అసాధారణమని పేర్కొన్నారు.
అదే సమయంలో నానా పటేకర్ తన ఫిట్‌నెస్ విషయంలోనూ ఎంత క్రమశిక్షణగా ఉండేవారో అతుల్ గుర్తుచేశారు. ఫామ్‌హౌస్‌లోని జిమ్‌కు తీసుకెళ్లి, ఎలాంటి వార్మప్ లేకుండానే ట్రైసెప్ డిప్స్ చేసిన నానా.. తన శారీరక దారుఢ్యంతో ఆశ్చర్యపరిచారని చెప్పారు.
అయితే నానా పటేకర్‌తో తనకు అత్యంత గుర్తుండిపోయిన సంఘటన మాత్రం ఆయన స్వయంగా తన అంత్యక్రియల కోసం సిద్ధం చేసుకున్న కట్టెలకు సంబంధించినదని అతుల్ వెల్లడించారు. తన అంత్యక్రియల కోసం ముందుగానే కట్టెలను సిద్ధం చేసి ఉంచుకున్నారని చెప్పారు. తడిగా ఉన్న కట్టెలు పొగ ఎక్కువగా ఇస్తాయని, ఆ పొగ కళ్లలోకి వెళ్లి ఏడుస్తున్నట్లు అనిపించకూడదనే ఉద్దేశంతో వాటిని పొడిగా ఉంచానని నానా సరదాగా చెప్పారట. తన అంత్యక్రియలను కూడా హాస్యంగా మార్చగలిగిన వ్యక్తి నానా పటేకర్ మాత్రమేనని అతుల్ పేర్కొన్నారు.
నానా మరణాన్ని ‘‘కడుపులో గుద్దినట్లుగా ఉంది’’ అంటూ అతుల్ భావోద్వేగానికి గురయ్యారు. ‘‘నానా సాహెబ్.. ప్రశాంతంగా విశ్రాంతి తీసుకోండి. మీలాంటి వ్యక్తి మరొకరు ఉండరు’’ అంటూ నివాళి అర్పించారు.
ఇక నానా పటేకర్ అంత్యక్రియలు పుణెలోని ఆయన డోంజే ఫామ్‌హౌస్‌లో నిర్వహించనున్నారు. నానా స్థాపించిన నామ్ ఫౌండేషన్ సీఈవో గణేశ్ థోరట్ వెల్లడించిన వివరాల ప్రకారం, ఆయన భౌతికకాయాన్ని సాయంత్రం 5 గంటల సమయంలో పుణెకు తీసుకురానున్నారు. అనంతరం అభిమానులు, సన్నిహితుల చివరి దర్శనం కోసం ఉంచుతారు. ఫామ్‌హౌస్ ప్రాంగణంలోనే అంత్యక్రియలు నిర్వహించనున్నారు. నానా పటేకర్ అంత్యక్రియలను ప్రభుత్వ లాంఛనాలతో నిర్వహించనున్నట్లు సమాచారం.
నటుడిగా మాత్రమే కాకుండా సామాజిక సేవకుడిగానూ గుర్తింపు పొందిన నానా పటేకర్.. నామ్ ఫౌండేషన్ ద్వారా నీటి సంరక్షణ, రైతుల సంక్షేమం వంటి కార్యక్రమాలకు తన వంతు సహకారం అందించారు. ఆయన మృతి భారతీయ సినీ పరిశ్రమకు తీరని లోటుగా మిగిలిపోనుంది.
