Teenmar Mallanna : తీన్మార్ మల్లన్న తన ప్రసంగాల్లో ముఖ్యమంత్రి రేవంత్ రెడ్డి, మంత్రులు కోమటిరెడ్డి వెంకటరెడ్డి, ఉత్తమ్ కుమార్ రెడ్డి, సీనియర్ నేత జానారెడ్డి వంటి కాంగ్రెస్ నేతలపై తీవ్ర విమర్శలు చేశారు. మిర్యాలగూడలో జరిగిన బీసీ గర్జన సభలో రేవంత్ రెడ్డిని “చివరి ఓసీ సీఎం”గా వ్యాఖ్యానించడం, స్థానిక ఎమ్మెల్యే బత్తుల లక్ష్మారెడ్డిని ఓడించి బీసీలను గెలిపిస్తానని ప్రకటించడం కాంగ్రెస్ శ్రేణుల్లో ఆగ్రహానికి కారణమైంది. అంతేకాక, కుల గణన సర్వేను తప్పుబట్టి, దాని ప్రతులను దగ్ధం చేయాలని పిలుపునివ్వడం పార్టీ అధిష్ఠానాన్ని సీరియస్గా ఆలోచింపజేసింది.
పార్టీ క్రమశిక్షణ చర్యలు..
మల్లన్న వ్యవహార శైలిపై కాంగ్రెస్ అధిష్ఠానం తీవ్రంగా స్పందించింది. పార్టీ క్రమశిక్షణ కమిటీ ఆయనకు షోకాజ్ నోటీసు జారీ చేసి, వివరణ కోరింది. అయితే, మల్లన్న ఈ నోటీసుకు స్పందించకపోవడం, తాను ఎవరికీ వివరణ ఇవ్వనని ప్రకటించడం పార్టీలో మరింత చర్చకు దారితీసింది. రెడ్డి సామాజిక వర్గంపై అనుచిత వ్యాఖ్యలు చేసినందుకు రెడ్డి జాగృతి సంస్థ గాంధీ భవన్లో నిరసన తెలిపింది. పార్టీ నేతలు మల్లన్న తీరును “కూలి ఇచ్చి తన్నించుకోవడం”గా వ్యాఖ్యానిస్తూ, కఠిన చర్యలు తీసుకోవాలని డిమాండ్ చేస్తున్నారు.
మల్లన్న రాజకీయ నేపథ్యం..
తీన్మార్ మల్లన్న, మాజీ జర్నలిస్టుగా, తెలంగాణ ఉద్యమంలో చురుకైన పాత్ర పోషించారు. 2015లో కాంగ్రెస్ తరఫున ఎమ్మెల్సీ ఎన్నికల్లో పోటీ చేసి ఓడిపోయారు. 2019లో హుజూర్నగర్ ఉప ఎన్నికల్లో స్వతంత్ర అభ్యర్థిగా, 2021లో బీజేపీలో చేరి మరోసారి ఎమ్మెల్సీ ఎన్నికల్లో ఓటమి చవిచూశారు. 2022లో బీజేపీని వీడి సొంత పార్టీ స్థాపనకు ప్రయత్నించిన మల్లన్న, చివరకు కాంగ్రెస్లో చేరి 2024లో ఎమ్మెల్సీగా గెలిచారు. అయితే, ఆయన బీసీ నినాదంతో పాటు పార్టీ నేతలపై విమర్శలు చేయడం రాజకీయ వర్గాల్లో చర్చనీయాంశమైంది.
సామాజిక వర్గాల ప్రతిస్పందన..
మల్లన్న బీసీల కోసం పోరాడుతున్నామని చెప్పినప్పటికీ, ఆయన వ్యాఖ్యలు కుల విద్వేషాలను రెచ్చగొడుతున్నాయని కొందరు ఆరోపిస్తున్నారు. కాంగ్రెస్ నాయకత్వం మల్లన్నపై కఠిన చర్యలు తీసుకోవాలని భావిస్తోంది. టీపీసీసీ అధ్యక్షుడు మహేష్ కుమార్ గౌడ్ ఈ అంశాన్ని రేవంత్ రెడ్డి దృష్టికి తీసుకెళ్లినట్లు సమాచారం. సామాజిక మాధ్యమాల్లో మల్లన్న వ్యాఖ్యలు వైరల్ కాగా, కొందరు ఆయన బీసీ నినాదాన్ని సమర్థిస్తుండగా, మరికొందరు పార్టీకి వ్యతిరేకంగా మాట్లాడటాన్ని తప్పుబడుతున్నారు.
తీన్మార్ మల్లన్న వివాదాస్పద వ్యాఖ్యలు కాంగ్రెస్ పార్టీలో అంతర్గత కల్లోలాన్ని సృష్టిస్తున్నాయి. పార్టీ ఆయనకు ఎమ్మెల్సీ పదవి ఇచ్చి గౌరవించినప్పటికీ, సొంత నేతలపై విమర్శలతో మల్లన్న పార్టీకి సవాల్ విసురుతున్నారు. ఈ వివాదం పార్టీ ఐక్యతపై ఎలాంటి ప్రభావం చూపుతుంది, మల్లన్న తదుపరి రాజకీయ గమనం ఏ విధంగా ఉంటుందనేది రాబోయే రోజుల్లో తేలనుంది.
