First phase of polling on April 19. Three seats in Congress pending
Congress : దేశవ్యాప్తంగా పార్లమెంట్ ఎన్నికల సందడి నెలకొంది. ఏప్రిల్ 19న తొలిదశ పోలింగ్ జరగనుంది. దీనికి సంబంధించి ఎన్నికల సంఘం ఏర్పాట్లు చేస్తోంది.. దీంతో అన్ని పార్టీలూ సమాయత్తమవుతున్నాయి. ఇప్పటికే అన్ని పార్టీలు అభ్యర్థులను ప్రకటించాయి.. రేపు మాపో ఎన్నికల మేనిఫెస్టో ప్రకటించేందుకు సర్వం సిద్ధం చేస్తున్నాయి. ఈ నేపథ్యంలో కాంగ్రెస్ పార్టీలో పార్లమెంట్ సీట్ల పంచాయితీ కొనసాగుతూనే ఉంది.. ముఖ్యంగా కాంగ్రెస్ పార్టీ అధికారంలో ఉన్న దక్షిణాది రాష్ట్రాల్లో తెలంగాణలో ఇలాంటి పరిస్థితి కొనసాగుతోంది. తెలంగాణ రాష్ట్రంలో మొత్తం 17 పార్లమెంటు స్థానాలున్నాయి. గత ఎన్నికల్లో ఈ రాష్ట్రంలో కాంగ్రెస్ పార్టీ మూడు స్థానాలు గెలుచుకుంది. ఇటీవలి అసెంబ్లీ ఎన్నికల్లో కాంగ్రెస్ పార్టీ అధికారంలోకి వచ్చింది.. ప్రస్తుతం రాష్ట్రంలో ఉన్న 17 స్థానాలకు 14 స్థానాలకు కాంగ్రెస్ పార్టీ అభ్యర్థులను ప్రకటించింది. మిగిలిన స్థానాలపై ఇంకా చర్చలు కొనసాగుతూనే ఉన్నాయి.
ముఖ్యంగా కరీంనగర్, ఖమ్మం సీట్లకు అభ్యర్థుల ఎంపిక ఇంకా ఒక కొలిక్కి రావడం లేదు. ఖమ్మం టికెట్ తన భార్యకు కేటాయించాలని ఉప ముఖ్యమంత్రి భట్టి విక్రమార్క తీవ్రంగా ప్రయత్నాలు చేస్తున్నారు. మరోవైపు మంత్రి శ్రీనివాసరెడ్డి తన సోదరుడు పొంగులేటి ప్రసాద్ రెడ్డి కోసం పోరాడుతున్నారు. వీరిద్దరు కాకుండా రామసహాయం రఘురాం రెడ్డికి టికెట్ ఇవ్వాలని కాంగ్రెస్ పార్టీ భావిస్తున్నట్టు తెలుస్తోంది. భట్టి, పొంగులేటి టికెట్ విషయంలో పట్టింపులకు పోతున్నారు. ఇద్దరూ బలమైన నాయకులు కావడంతో కాంగ్రెస్ పార్టీ పరిష్కార మార్గంగా రామ సహాయం రఘురాం రెడ్డి పేరును పరిశీలిస్తున్నట్లు తెలుస్తోంది. రఘురాం రెడ్డి శ్రీనివాస్ రెడ్డికి వియ్యంకుడవుతారు. పొంగులేటి కుమార్తెను రఘురాంరెడ్డి చిన్న కుమారుడికి ఇచ్చి వివాహం చేశారు. రఘురాం రెడ్డి పెద్ద కుమారుడు హీరో వెంకటేష్ కుమార్తెను వివాహం చేసుకున్నారు. మరోవైపు భట్టి విక్రమార్క తన సతీమణి మల్లు నందినికి టికెట్ కోరుతున్నారు.
ఇక కరీంనగర్ స్థానంపై కూడా పీఠముడి వీడడం లేదు. ఈ పార్లమెంటు స్థానం బరిలో అలిగి రెడ్డి ప్రవీణ్ రెడ్డి, రాజేందర్ రావు, తీన్మార్ మల్లన్న బరిలో ఉన్నారు. గత ఎన్నికల్లో ప్రవీణ్ రెడ్డి హుస్నాబాద్ స్థానాన్ని వదులుకున్న నేపథ్యంలో ఆయనకు టికెట్ ఇవ్వాలని అనుచరులు కోరుతున్నారు. కాంగ్రెస్ పార్టీ మాత్రం ఖమ్మంలో ఓసీ సామాజిక నేపథ్యం ఉన్నవారికి టికెట్ ఇస్తే.. కరీంనగర్లో బీసీ సామాజిక వర్గానికి చెందిన వారికి టికెట్ ఇవ్వాలని భావిస్తున్నట్టు తెలుస్తోంది. కరీంనగర్లో భారతీయ జనతా పార్టీ నుంచి బండి సంజయ్, భారత రాష్ట్ర సమితి నుంచి వినోద్ కుమార్ పోటీలో ఉన్నారు. బండి సంజయ్ ఇటీవల జరిగిన అసెంబ్లీ ఎన్నికల్లో ఓడిపోయారు. ఆ సానుభూతి ఎన్నికల్లో కలిసి వస్తుందని బిజెపి భావిస్తోంది. మరోవైపు బండిని తట్టుకొని నిలబడగలిగే అభ్యర్థిని ఎంపిక చేయాలని కాంగ్రెస్ పార్టీ భావిస్తోంది. అయితే మంత్రి పొన్నం ప్రభాకర్, సహా పార్లమెంట్ పరిధిలోని ఎమ్మెల్యేల సపోర్టు ఉన్న వెలిచాల రాజేందర్ రావుకు దాదాపుగా టికెట్ ఇచ్చే అవకాశం ఉందని కాంగ్రెస్ పార్టీలో ఓ వర్గం చెబుతోంది.. ఇక హైదరాబాద్ పార్లమెంటు స్థానానికి సంబంధించి ఫిరోజ్ ఖాన్ లేదా మరో బలమైన ముస్లిం నేతకు టికెట్ ఇస్తారని ప్రచారం జరుగుతున్నది.
