Telangana Excise Department: బీరు ప్రియులకు తెలంగాణ సర్కార్ అదిరిపోయే న్యూస్ చెప్పింది. దసరా పండుగ వేళ.. మైక్రో బ్రూవరీల ఏర్పాటుకు అనుమతులను సులభతరం చేస్తూ, రాష్ట్రంలో బీరు పరిశ్రమను విస్తరించే దిశగా అడుగులు వేస్తోంది. ఈ కొత్త విధానం ద్వారా రూ.లక్ష కోట్ల ఆదాయ లక్ష్యంతో, బార్లు, క్లబ్లు, హోటళ్లు, రెస్టారెంట్లు, పర్యాటక స్థలాలతోపాటు ఆరు మున్సిపల్ కార్పొరేషన్లలో మైక్రో బ్రూవరీల స్థాపనకు ఎక్సైజ్ శాఖ నోటిఫికేషన్ జారీ చేసింది. ఈ విధానం రాష్ట్రంలో బీరు అందుబాటును కూల్ డ్రింక్స్ స్థాయికి తీసుకురావడంతోపాటు, స్థానిక ఉద్యోగావకాశాలు, పర్యాటక రంగాన్ని ప్రోత్సహించడానికి దోహదపడనుంది.
Also Read: కెసిఆర్, జగన్ కు ‘జాతీయ’ శత్రువులు ఎవరు?
సులభ నిబంధనలతో మైక్రో బ్రూవరీలు..
తెలంగాణ ఎక్సైజ్ శాఖ 2015లో తొలిసారిగా మైక్రో బ్రూవరీలకు అనుమతులు ఇస్తూ నిబంధనలను రూపొందించింది. అయితే, అప్పటి నిబంధనలు కఠినంగా ఉండటం, అధిక పెట్టుబడి అవసరం కారణంగా కేవలం 18 మైక్రో బ్రూవరీలు మాత్రమే హైదరాబాద్లో ఏర్పాటయ్యాయి. ఈసారి, సీఎం రేవంత్ రెడ్డి నేతృత్వంలోని ప్రభుత్వం నిబంధనలను సడలించి, మరింత మంది వ్యాపారవేత్తలను ఆకర్షించేందుకు చర్యలు తీసుకుంది. ఇందులో భాగంగా గతంలో 1,000 చదరపు మీటర్ల స్థలం, 300 చదరపు మీటర్ల బ్రూవింగ్ ప్లాంట్ అవసరం ఉండగా, ఇప్పుడు కేవలం 100 చదరపు మీటర్ల స్థలం ఉంటే సరిపోతుందని నిబంధన సడలించింది. ఇక లైసెన్స్ ఫీజు ఏడాదికి రూ. 5 లక్షలతోపాటు, దరఖాస్తు కోసం రూ.లక్ష చెల్లించాలి. ఈనెల 25వ తేదీ వరకు దరఖాస్తులు స్వీకరించేందుకు ఎక్సైజ్ శాఖ సిద్ధంగా ఉంది. గతంలో జీహెచ్ఎంసీ పరిధిలో మాత్రమే అనుమతించబడిన మైక్రో బ్రూవరీలు, ఇప్పుడు ఆరు మున్సిపల్ కార్పొరేషన్లు, పర్యాటక స్థలాల్లో కూడా స్థాపించబడనున్నాయి.
సానుకూలతలు, సవాళ్లు..
ఫ్రూట్ ఆధారిత లిక్కర్లు, క్రాఫ్ట్ బీర్ల ఉత్పత్తి స్థానిక వ్యవసాయ ఉత్పత్తుల వినియోగాన్ని పెంచుతుంది. ఇది రైతులకు అదనపు ఆదాయ మార్గాన్ని అందిస్తుంది. మైక్రో బ్రూవరీల స్థాపన, నిర్వహణలో నైపుణ్యం కలిగిన కార్మికులు, కెమిస్ట్లు, సర్వీస్ సిబ్బందికి డిమాండ్ పెరుగుతుంది. అయితే మైక్రో బ్రూవరీల విస్తరణ అనేక అవకాశాలను అందిస్తున్నప్పటికీ, కొన్ని సవాళ్లు కూడా ఉన్నాయి. ఉత్పత్తి చేసిన బీరును 36 గంటల్లోపు వినియోగించాలన్న నిబంధన, బాట్లింగ్ లేదా బయటకు విక్రయించే అవకాశం లేకపోవడం వంటివి వ్యాపారులకు సవాలుగా మారవచ్చు. మద్యం వినియోగం పెరగడం వల్ల సామాజిక, ఆరోగ్య సమస్యలు తలెత్తే అవకాశం ఉంది. ఈ సమస్యలను ఎదుర్కోవడానికి ఎక్సైజ్ శాఖ అవగాహన కార్యక్రమాలను నిర్వహించాల్సి ఉంటుంది.
తెలంగాణ ఎక్సైజ్ శాఖ ఈ కొత్త విధానం ద్వారా బీరు పరిశ్రమను విస్తరించడమే కాక, రాష్ట్ర ఆర్థిక, పర్యాటక రంగాలకు కొత్త ఊపిరి లభిస్తుంది. సరైన నిర్వహణ, నిబంధనల అమలుతో ఈ విధానం రాష్ట్రానికి గణనీయమైన ప్రయోజనాలను అందిస్తుంది.
