సాధారణంగా కొన్ని కూరగాయలు వాటి పరిమాణాన్ని మించి పెరుగుతుండటం గురించి మనం వినే ఉంటాం. వంకాయలు, గుమ్మడికాయలు వాటి పరిమాణం కంటే ఎక్కువగా పెరుగుతూ ఉంటాయి. అయితే సొరకాయ తక్కువ పరిమాణంలో మాత్రమే పెరుగుతూ ఉంటుంది. కానీ తెలంగాణ రాష్ట్రంలోని మహబూబ్ నగర్ జిల్లాలో మాత్రం వింత చోటు చేసుకుంది. దాదాపు మనిషి ఎత్తులో సొరకాయ ఉండటంతో దానిని చూసి షాక్ అవ్వడం గ్రామస్థుల వంతయింది.
గతంలో సొరకాయలు దాని పరిమాణం కంటే ఎక్కువగా పెరిగినట్టు వార్తలు రాలేదు. మహబూబ్ నగర్ జిల్లాలోని కొత్తగూడ మండలం, కొత్తపల్లి గ్రామంలో ఇంట్లో కూరగాయలను పండించే భూక్యా రాందన్ ఇంట్లో ఐదు అడుగుల సొరకాయ కాసింది. మొదట కొత్తపల్లి గ్రామస్తులు అది పొట్లకాయ అయి ఉంటుందని భావించారు. అయితే ఆ తరువాత పొట్లకాయ కాదు సొరకాయ అని తెలిసి షాక్ అయ్యారు.
5 అడుగుల సొరకాయ గురించి తెలిసి ఆ గ్రామంతో పాటు చుట్టుప్రక్కల గ్రామాల్లోని ప్రజలు సైతం ఆ సొరకాయను చూసేందుకు తరలివస్తున్నారు. ఎన్నో సంవత్సరాల నుంచి సేద్యం చేస్తున్నా తాము గతంలో అంత పెద్ద సొరకాయను చూడలేదని తెలుపుతున్నారు. నిపుణులు జన్యువులో మార్పుల వల్ల ఇలా జరుగుతుందని చెబుతున్నారు. పండించిన భూమి వల్ల కూడా ఇలాంటి మార్పులు చోటు చేసుకుంటాయని తెలుపుతున్నారు.
అరుదుగా అలాంటి సొరకాయలు పండుతాయని.. వాటిని చూసి పెద్దగా ఆశ్చర్యపోవాల్సిన అవసరం లేదని వెల్లడిస్తున్నారు. సోషల్ మీడియా వల్ల ఆ సొరకాయ నెట్టింట తెగ వైరల్ అవుతోంది. నెటిజన్లు ఆ వింత సొరకాయ గురించి ఫన్నీగా కామెంట్లు చేస్తున్నారు.
