Salt Battery : చైనాలో కొత్త టెక్నాలజీ.. ఉప్పుతో నడిచే స్కూటర్లు వచ్చేస్తున్నాయ్

Salt Battery : ఇప్పటివరకు మనం పెట్రోల్, డీజిల్, లిథియం బ్యాటరీలతో నడిచే స్కూటర్లను రోడ్లపై చూశాం. కానీ ఇప్పుడు కొత్త తరం రాబోతోంది. త్వరలోనే మీరు ఉప్పుతో నడిచే స్కూటర్లను (Salt Battery Scooters) చూడబోతున్నారు. చైనాలో ఇప్పటికే ఇలాంటి స్కూటర్లు రోడ్లపై కనిపిస్తున్నాయి. అవి సముద్రపు ఉప్పుతో (Sea-Salt) తయారుచేసిన సోడియం-అయాన్ బ్యాటరీలతో (Sodium-ion Battery) నడుస్తున్నాయి. ఈ సాల్ట్ బ్యాటరీ టెక్నాలజీ ఎలా పనిచేస్తుంది.. భారత్‌లో ఈ స్కూటర్లు ఎప్పుడు వస్తాయి అనే వివరాలు ఇక్కడ తెలుసుకుందాం.

Also Read : పేపర్ మీద ఎలాంటి రాతలు రాసినా ఈ పెన్ మాయం చేస్తుంది: వైరల్ వీడియో

సాల్ట్ బ్యాటరీ ఎలా పనిచేస్తుంది?
ఎక్కువగా ఎలక్ట్రిక్ స్కూటర్లలో ప్రస్తుతం లిథియం-అయాన్ బ్యాటరీలను (Lithium-ion Battery) వాడుతున్నారు. ఇవి ఖరీదైనవి, మరియు ఛార్జ్ అవ్వడానికి ఎక్కువ సమయం తీసుకుంటాయి. కానీ ఈ కొత్త టెక్నాలజీలో సోడియం (ఉప్పు) తో తయారుచేసిన బ్యాటరీలను ఉపయోగిస్తారు. ఇవి చవకైనవి మాత్రమే కాదు, చాలా త్వరగా ఛార్జ్ అవుతాయి. ఈ బ్యాటరీ కేవలం 15 నిమిషాల్లో 0 నుండి 80 శాతం వరకు ఛార్జ్ అవుతుందని చెబుతున్నారు. లిథియం బ్యాటరీలతో పోలిస్తే దీని ధర చాలా తక్కువగా ఉండవచ్చు. అంతేకాదు, ఇది పర్యావరణానికి కూడా సురక్షితమైన ఎంపిక. చైనాలో ఈ ఉప్పుతో నడిచే స్కూటర్లు రూ.35,000 నుండి రూ.51,000 మధ్య అమ్ముడవుతున్నాయి. అంటే, పెట్రోల్ లేదా ఖరీదైన ఎలక్ట్రిక్ స్కూటర్లతో పోలిస్తే ఇవి చాలా చాలా చవకైనవి.

ఈ టెక్నాలజీ ఎందుకు గేమ్ ఛేంజర్?
లిథియం కొరత, దాని ఖరీదైన ఉత్పత్తి ప్రపంచవ్యాప్తంగా ఆందోళన కలిగిస్తున్నాయి. లిథియంను ఎక్కువగా వాడడం పర్యావరణానికి కూడా హానికరం కావచ్చు. దీనికి బదులుగా, సోడియం (ఉప్పు) భూమిపై సులభంగా దొరుకుతుంది. సముద్రాలలో పుష్కలంగా ఉంది. అందుకే ఈ సోడియం బ్యాటరీలు చవకైనవి, ఎక్కువ కాలం మన్నికైనవి, పర్యావరణానికి హాని చేయనివి. అందుకే ఈ టెక్నాలజీని ‘గేమ్ ఛేంజర్’ (Game Changer) గా చూస్తున్నారు.

భారత్‌లో ఈ స్కూటర్లు ఎప్పుడు వస్తాయి?
భారతదేశంలో ఓలా (Ola), ఏథర్ (Ather), హీరో ఎలక్ట్రిక్ (Hero Electric) వంటి కంపెనీలు ఇప్పుడు ఈ కొత్త టెక్నాలజీపై దృష్టి సారిస్తున్నాయి. స్థిరమైన బ్యాటరీ టెక్నాలజీ (Sustainable Battery Technology) పై ప్రభుత్వం కూడా దృష్టి పెడుతోంది. ప్రస్తుతం ఈ టెక్నాలజీ ఇంకా పరిశోధన దశలోనే ఉంది. కానీ, రాబోయే కొన్ని సంవత్సరాలలో “ఉప్పుతో నడిచే స్కూటర్లు” భారతదేశ రోడ్లపై కూడా పరుగులు తీస్తాయని ఆశిస్తున్నారు.