T20 World Cup Pakistan: అనుభవించండ్రా పాకిస్తాన్ క్రికెటర్లూ.. మీకు ఇది కావాల్సిందే

T20 World Cup Pakistan: ఫైవ్ స్టార్ హోటల్.. కట్టుదిట్టమైన భద్రత.. కోరుకున్న ఆహారం.. అత్యంత ఆధునిక సదుపాయాలు ఉన్న జిమ్.. అత్యంత విలాసవంతమైన బస్సు.. వీటన్నిటికీ మించి అభిమానుల సపోర్టు.. ఇన్ని సౌకర్యాలు ఉంటాయి కాబట్టి.. భారత జట్టుతో మ్యాచులు ఆడాలని విదేశీ ప్లేయర్లు ఉత్సాహపడుతుంటారు. చివరికి ఐపీఎల్ లో కూడా తమను కొనుగోలు చేయాలని.. తాము భారత గడ్డమీద ఆడాలని భావిస్తుంటారు.

కుక్క తోక వంకర అన్నట్టు.. ప్రపంచ జట్లలో ఆటగాళ్లు భారత గడ్డమీద అడుగు పెట్టాలని.. భారత జట్టుతో పోటీపడాలని భావిస్తుంటే.. పాకిస్తాన్ ప్లేయర్లు మాత్రం భిన్నంగా ఆలోచిస్తుంటారు. భారత గడ్డమీద భద్రత ఉండదని.. భారత జట్టుతో తాము ఆడబోమని చెబుతుంటారు. అంతేకాదు, టి20 వరల్డ్ కప్ లో టీం ఇండియాతో మ్యాచ్ ఆడేది లేదని నిన్నటి వరకు పాకిస్తాన్ క్రికెట్ బోర్డు చెప్పిన విషయం కూడా తెలిసింది. ఈ క్రమంలో ఒక వీడియో సోషల్ మీడియా ద్వారా విపరీతమైన ప్రాచుర్యంలో ఉంది. అది కాస్త పాకిస్తాన్ ప్లేయర్ల దుస్థితిని.. వారి దుర్బలత్వాన్ని బయటపెడుతోంది.

టి20 వరల్డ్ కప్ లో భాగంగా పాకిస్తాన్ జట్టు మొత్తం శ్రీలంకలోని కొలంబో వేదికగా మ్యాచ్ లు ఆడుతోంది. ఈ క్రమంలో శ్రీలంక క్రికెట్ బోర్డు పాకిస్తాన్ ప్లేయర్లకు కల్పించిన సౌకర్యాలకు సంబంధించిన వీడియో సోషల్ మీడియాలో విపరీతమైన ప్రాచుర్యంలో ఉంది. పాకిస్తాన్ క్రికెటర్లకు శ్రీలంక క్రికెట్ బోర్డు ఒక మామూలు హోటల్లో బస కల్పించింది. వారు ఒక బస్సులో గ్రౌండ్ వద్దకు వచ్చారు. అక్కడికి వారు వస్తున్న దృశ్యాలు చూస్తుంటే ఆందోళన కలుగుతోంది. వారంతా కూడా ఓ సిమెంట్ ఫ్యాక్టరీలో పనిచేసి వస్తున్నట్టుగా ఉంది. దీనిని బలపరిచే వీడియో సామాజిక మాధ్యమాలలో విస్తృతంగా దర్శనమిస్తోంది.

“భారత గడ్డమీద ఎన్నో సౌకర్యాలు ఉన్నాయి. భారత అండర్-19 జట్టుకు ఆడే ప్లేయర్లకు కూడా ఎన్నో సౌకర్యాలు ఉంటాయి. కనీసం ఆ స్థాయి సౌకర్యాలు కూడా శ్రీలంకలో లేవు. భారత గడ్డమీద ఆడాలని కోరితే లేని పోని పంతాలకు పోయారు. చివరికి ఒక మామూలు హోటల్లో ఉంటున్నారు. ఇంతకు మించిన దరిద్రం మరొకటి ఉండదు. పాకిస్తాన్ ప్లేయర్లూ.. మీకు ఇది కావాల్సిందే. అనుభవించండి” అంటూ సామాజిక మాధ్యమాలలో నెటిజన్లు విమర్శిస్తున్నారు.