Sanju Samson Viral Video: ఏ ముహూర్తంలో అయితే రాజస్థాన్ రాయల్స్ నుంచి చెన్నై జట్టులోకి అడుగు పెట్టాడో .. సంజు శాంసన్ రాత ఒక్కసారిగా మారిపోయింది. చెన్నై జట్టు తరఫున అతడు అద్భుతమైన ఇన్నింగ్స్ ఆడుతున్నాడు. ఇప్పటికే రెండు సెంచరీలు తన ఖాతాలో వేసుకున్నాడు. సూపర్ ఫాం కంటిన్యూ చేస్తున్నాడు. ఓపెనర్ గా వస్తున్న అతడు జట్టు భారాన్ని సాధ్యమైనంతవరకు మోస్తున్నాడు. జట్టుకు భారీ స్కోరు అందిస్తున్నాడు. ఫలితంగా చెన్నై జట్టు వరుస విజయాలు సాధించి.. ప్లే ఆఫ్ మీద ఆశలు పెంచుకుంది.
సంజు అద్భుతంగా ఆడుతున్న నేపథ్యంలో.. అతడిని చెన్నై అభిమానులు ధోని వారసుడిగా కీర్తిస్తున్నారు. ధోని లాగా వికెట్ల వెనుక అడ్డుగోడలాగా నిలబడుతున్నాడని.. పరుగులను ఆపుతున్నాడని.. క్షణకాలంలోనే స్టంప్ ఔట్ చేస్తూ అదరగొడుతున్నాడని చెన్నై అభిమానులు వ్యాఖ్యానిస్తున్నారు. చెన్నై అభిమానులు తనమీద చూపిస్తున్న ప్రేమకు ఆనంద పరవసుడిగా సంజు ఉబ్బి తబ్బిబవుతున్నాడు.
సంజు చెన్నై అభిమానులకు ఇటీవల ఒక అదిరిపోయే గిఫ్ట్ ఇచ్చాడు.. తను కారులో వెళ్తుండగా.. చెన్నైలోని ఓ ప్రాంతంలో క్రికెట్ ఆడుతున్న అభిమానులను సంజు కలిశాడు. వారు బ్యాటింగ్ చేస్తుంటే సంబరపడ్డాడు. ఆ తర్వాత వారితో సంజు కలిసిపోయాడు. వారితోపాటు క్రికెట్ ఆడాడు. ఈ సందర్భంగా సంజు కొట్టిన బంతి అమాంతం గాల్లోకి ఎగిరింది. ఈ వీడియో ఇప్పుడు సామాజిక మాధ్యమాలలో విస్తృతంగా కనిపిస్తోంది..
సంజు ఆట తీరు చూసి అభిమానులు మైదానంలో కేరింతలు కొట్టడం సహజం. కానీ తమ మధ్య.. తమతో సంజు క్రికెట్ ఆడటాన్ని అభిమానులు సరికొత్తగా ఆస్వాదించారు. సంజు డౌన్ టు ఎర్త్ అని.. అతడు ఆడుతుంటే ఆశ్చర్యంగా ఉందని.. అతడు తన జోరు ఇలానే కొనసాగించాలని.. తమను ఆశ్చర్యపరచే విధంగా వ్యవహరించాలని అభిమానులు సోషల్ మీడియాలో కోరుతున్నారు.
