దేశ రాజధాని ఢిల్లీలోని నిజాముద్దీన్ ప్రాంతంలో జరిగిన తబ్లిగి జమాత్ కార్యక్రమ నిర్వాహకుల పై తగిన చర్యలు తీసుకోవాల్సిందిగా ఢిల్లీ లెఫ్టినెంట్ గవర్నర్ కు ఆ రాష్ట్ర ముఖ్యమంత్రి అరవింద్ కేజ్రీవాల్ లేఖ రాశారు. వెంటనే స్పందించిన అధికారులు కార్యక్రమ నిర్వాహకులైన మౌలానా సాద్ తదితరులపై ‘అంటువ్యాధుల చట్టం 1897’ ప్రకారం ఎఫ్ఐఆర్ నమోదు చేశారు.
మార్చి 13,14,15 తేదీలలో నిజాముద్దీన్ కార్యక్రమానికి హాజరైన వారిలో 24 మందికి కరోనా వైరస్ పాజిటివ్ అని తేలింది. ఈ నేపథ్యంలో నిర్వాహకులను పోలీసులు అదుపులోకి తీసుకున్నారు. అంతేకాకుండా ఈ మర్కాజ్ కు హాజరైన 12 మంది విదేశీయులు సమాచారాన్ని దాచి ఉంచినందుకు జామా మసీదు వజీరాబాద్ ఇమామ్ పై కూడా కేసు నమోదు చేశారు.
అక్కడి ఉన్నవారిని తరలించేందుకు తొలుత నిర్వాహకుడు మౌలాన సాద్ సహకరించకపోవడంతో నేషనల్ సెక్యూరిటీ అడ్వైజర్ అజిత్ డొభాల్ రంగంలోకి దిగాల్సి వచ్చింది. ఆయన మార్చి 28వ తేదీ అర్ధరాత్రి రంగంలోకి దిగి అక్కడి మౌలానను ఒప్పించారు. దీంతో అక్కడి వారి తరలింపు మొదలైంది. వీరిలో చాలా మంది వీసా నిబంధనలను ఉల్లంఘించి ఇక్కడకు వచ్చినట్లు తేలింది.
ఈ సమావేశానికి భారీ సంఖ్యలో భక్తులు హాజరై ఉంటారని అధికారులు భావిస్తున్నారు. ఒక్క మంగళవారమే 146 కొత్త కేసుల నమోదుతో భారత్ లో కరోనా కేసులు 1397కు ఎగబాకాయి. ఇప్పటి వరకు 35 మంది కొవిడ్-19 సోకి మరణించగా.. 123 మంది చికిత్స అనంతరం డిశ్చార్జి అయినట్టు అధికారులు తెలిపారు.
2019 లో వన్ అఫ్ ది బ్లాక్ బస్టర్ మూవీ ఇస్మార్ట్ శంకర్. ఎనర్జీ స్టార్ రామ్ పోతినేని కెరీర్ లో ఇదే హైయెస్ట్ పెయిడ్ మూవీ కావడం విశేషం. కాగా ఇస్మార్ట్ శంకర్ వంటి భారీ హిట్ సినిమా తర్వాత తన సొంత బ్యానర్ లో `రెడ్` అనే తమిళ రీమేక్ చిత్రంలో రామ్ నటిస్తున్నాడు. ఈ సినిమా షూటింగ్ కూడా దాదాపు పూర్తయ్యింది.నిజానికి ఏప్రిల్ 9న ` రెడ్ ` సినిమా విడుదల కావాల్సింది. కానీ కరోనా ప్రభావంతో సినిమా విడుదల వాయిదా పడుతోంది. ఇక ఈ సినిమా తరవాత రామ్ హిట్ చిత్రాల దర్శకుడు మారుతి దర్శకత్వం లో ఒక సినిమా చేయనున్నాడని తెలుస్తోంది. దేశంలో లాక్ డౌన్ ఎత్తేయగానే మారుతి దర్శకత్వంలో సినిమా చేయడానికి రామ్ రెడీ అవుతాడని కూడా తెలుస్తోంది.
లాక్ డౌన్ ప్రకటించి 7 రోజులు గడిచింది. అంటే మూడు వారాల్లో ఒక వారం అయ్యింది. మోడీ ఇచ్చిన పిలుపు కి దేశ ప్రజలు బాగా స్పందించారని చెప్పాలి. 130 కోట్ల మంది ప్రజలు ఒకే మాటమీద, బాట మీద నడవటం అంత సులువైన పనికాదు. సమస్య అటువంటిది. ఇంట్లో నుంచి కదిలితే ప్రాణానికి ముప్పొస్తుందనే విషయం అందరికీ అర్ధమయ్యే రీతిలో చెప్పటం లో మోడీ కృతకృత్యుడయ్యాడని చెప్పొచ్చు. ఇది మనమే కాదు ప్రపంచం మొత్తం చూసింది. అమెరికా, ఇటలీ , స్పెయిన్ , ఫ్రాన్స్ మిగతా ప్రజాస్వామ్య దేశాలతో పోలిస్తే భారత్ అమలుచేసిన తీరు అద్భుతం, అమోఘం. చైనా లాగా ముందుగా దాచిపెట్టి తర్వాత కఠినంగా వ్యవహరించినా మాట్లాడలేని నిరంకుశ వ్యవస్థ మన దగ్గరలేదు. ప్రజాస్వామ్య వ్యవస్థ లోనే పారదర్శకంగానే కఠినమైనా నచ్చచెప్పుకొని అమలుచేయాలి. ఇక్కడే యూరప్ , అమెరికా చేయలేని పని భారత్ చేసి చూపించింది. దీనికి మోడీ పై దేశ ప్రజల్లో వున్న చరిష్మా ఉపయోగపడింది. ముందుగా స్వచ్చందంగా జనతా కర్ఫ్యూ పెట్టటం తర్వాత ప్రజలూ , రాష్ట్ర ప్రభుత్వాలే దీన్ని పొడిగించాలనే కోరిక వెలిబుచ్చటం ఆ ఆవకాశాన్ని ఉపయోగించుకొని 21 రోజుల లాక్ డౌన్ ని పెట్టటం చక చకా జరిగిపోయాయి. లాక్ డౌన్ ఎందుకు అవసరమో ప్రజలకు వెలిబుచ్చిన తీరు అమితంగా ఆకట్టుకుంది. చేతులు జోడించి మీ కుటుంబ సభ్యుడిగా అభ్యర్ధిస్తున్నానని చెప్పిన పద్దతికి జనం ఫిదా అయ్యారు. ఎటువంటి ఇబ్బందులు లేకుండా ఒక వారం గడిచింది. దీనితో కొంతవరకు వైరస్ గొలుసు కట్టు ని కట్టడి చేయగలుగుతామనే ఆత్మవిశ్వాసం ప్రభుత్వంలో, ప్రజల్లో వస్తూ వుంది. అయితే మధ్యలో రెండు అపశ్రుతులు ఈ ఆత్మవిశ్వాసం పై దెబ్బతీశాయి.
దేశంలో కరోనా ఎఫెక్ట్ తో కేంద్రం లాక్డౌన్ చేపట్టింది. 21రోజులపాటు లాక్డౌన్ అమలుతో రవాణా వ్యవస్థ స్తంభించింది. వ్యాపార, వాణిజ్యం అన్ని బంద్ అవడంతో ప్రతీఒక్కరు ఇళ్లకే పరిమితమయ్యారు. లాక్డౌన్ కారణంగా లైసెన్సులు, పర్మిట్లు, ఇతర రవాణా పత్రాలను రెన్యువల్ చేయించుకోవడంలో వాహనదారులు ఇబ్బందులు పడుతున్నట్లు కేంద్రం దృష్టికి వచ్చింది. దీంతో డ్రైవింగ్ లైసెన్స్ ఇతర రవాణా పత్రాల కాలపరిమితిని జూన్ 30 వరకూ కేంద్రం పొడిగిస్తూ గుడ్ న్యూస్ చెప్పింది. ఈ మేరకు కేంద్ర రవాణా శాఖ మంగళవారం ఉత్తర్వులు జారీ చేసింది.
సినిమాల్లోనే ఇప్పటి వరకూ మోసాలను వెలుగులోకి తెచ్చేందుకు అధికారులు మారు వేషం వెయ్యడాన్ని చూశాం. కానీ ఇప్పుడు నిజ జీవితంలోనూ అలాంటి అధికారులు కనిపిస్తున్నారు. విజయనగరానికి చెందిన జాయింట్ కలెక్టర్.. మారు వేషంలో కూరగాయల మార్కెట్లను తనిఖీ చేశారు. జిల్లాలో లాక్డౌన్, 144 సెక్షన్ కారణంగా నిత్యావసర వస్తువులు, కొరగాయలు ప్రభుత్వం నిర్ణయించిన ధరకు కాకుండా అధిక ధరలకు అమ్ముతున్నారని ఫిర్యాదులు రావటంతో.. జాయింట్ కలెక్టర్ కిషోర్ కుమార్.. దీనిపై దృష్టి సారించారు. మంగళవారం ఉదయం జిల్లా కేంద్రంలో ఏర్పాటు చేసిన పలు కూరగాయల మార్కెట్లలో సామాన్య వ్యక్తిలా మారువేషంలో వెళ్లి ధరలను తెలుసుకున్నారు. ఇతర కొనుగోలు దారుల నుంచి ధరలకు సంబంధించిన విషయాలను అడిగి తెలుసుకున్నారు. కొన్ని చోట్ల రూ.5 ఎక్కువ అమ్ముతున్నట్లు గుర్తించారు. దీంతో ఎక్కడ తప్పు జరుగుతోందో అధికారులతో సమావేశమై ధరలు నియంత్రణ కోసం ప్రణాళికలు సిద్ధం చేస్తున్నారు. మారువేషంలో వచ్చింది జాయింట్ కలెక్టర్ అని తెలుసుకొని కొంత మంది వ్యాపారులు అవాక్కయ్యారు.
బూతులు తిట్టేందుకే కొడాలి నానిని మంత్రిగా పెట్టుకున్నారా అనే విషయంపై సీఎం జగన్ రాష్ట్ర ప్రజలకు సమాధానం చెప్పాలని మాజీ మంత్రి దేవినేని ఉమామహేశ్వరరావు అన్నారు. గొల్లపూడిలోని కార్యాలయంలో మంగళవారం సాయంత్రం మాట్లాడుతూ, బాధ్యతలు మరచి సంస్కార హీనులుగా అసహనంతో పశువులు కూడా మాట్లాడని బాష ముఖ్యమంత్రి జగన్ కేబినేట్ లోని మంత్రులు మాట్లాడుతున్నారని, మంత్రి కొడాలి నానిని వెంటనే కేబినేట్ నుండి బర్తరఫ్ చేయాలని దేవినేని ఉమా డిమాండ్ చేసారు. రైతు వద్ద బస్తా ధాన్యం రూ.900లకే దళారీలు దోపిడి చేస్తుంటే, సీఎం జగన్ మంత్రి కొడాలి నాని ఏం చేస్తున్నారని ప్రశ్నించారు. ధాన్యం ప్రభుత్వం ఎందుకు కొనుగోలు చేయటం లేదో ప్రజలకు సమాధానం చెప్పకపోతే పంటలు పండించిన రైతులే తగిన బుద్ధి చెప్తారన్నారు. సంచులు లేక బియ్యాన్ని పంపిణీ చేయలేకపోతున్నామని మంత్రులు చెప్పటం ప్రభుత్వ వైఫల్యానికి నిదర్శనమన్నారు. కొడాలి నాని.. చంద్రబాబు వద్ద చేతులు కట్టుకుని, కంచికచర్ల నా కార్యాలయంలో ఎన్నిసార్లు వచ్చి కూర్చున్నావో మర్చిపోయావా ? అని ఈ సందర్భంగా గుర్తు చేశారు. పక్క రాష్ట్రాల్లో రెండు నెలలకు సరిపోయే విధంగా నిత్యవసరాలు అందజేస్తుంటే, ఏపీలో గంటల కొద్దీ మహిళలను, వృద్ధులను క్యూలైన్లలో నిలబెడుతున్నారని, ఆ దృశ్యాలను ఎలక్ట్రానిక్ ప్రింట్ మీడియా చూపించటం తప్పెలా అవుతుదన్నారు. వాస్తవాలను చూపెడుతున్న మీడియా కోరలు పీకుతామనటం ఎంత వరకు సమంజసమన్నారు. మెట్ట ప్రాంతాల్లో మల్లె రైతులు నష్టపోతున్నారని, వారిని ఏ విధంగా ఆదుకుంటారో ప్రభుత్వం సమాధానం చెప్పాలన్నారు. వేలకోట్లు వాలంటీర్లకు జీతాలు చెల్లిస్తూ, ఈ రోజు ఈ సంక్షోభ పరిస్థితుల్లో ఎందుకు వైఫల్యం చెందుతున్నామోనని, వాలంటీర్ల వ్యవస్థ పనితీరు పట్ల ప్రజల అసంతృప్తి వ్యక్తం చేస్తున్నరాని తెలిపారు. విజయసాయి రెడ్డి చాలా బాధ్యతరాహిత్యంగా ట్వీట్లు పెడుతుంటే, సీఎం జగన్ తాడేపల్లి రాజప్రసాదం పబ్జీ గేమ్ లు ఆడుకుంటూ పరిపాలన పట్ల బాధ్యత రహితంగా వ్యవహిరిస్తున్నారని, ఢిల్లీకి ఏ జిల్లా నుండి ఎంత మంది వెళ్లారో ఇప్పటి వరకు ప్రభుత్వం వివరాలు చెప్పలేకపోయిందని దేవినేని ఉమా ఆవేదిక వ్యక్తం చేసారు.
దేశంలో కరోనా మహమ్మరిని ఎదుర్కొనేందుకు పలువురు సెలబ్రెటీలు తమ మద్దతు ప్రకటిస్తున్నారు. క్రికెటర్లు, బ్మాడ్మింటన్, ఫుల్ బాల్, టెన్నిస్, అథ్లెటిక్స్ తదితర క్రీడాకారులు కరోనా పోరుకు సిద్ధమవుతున్నారు. తమవంతుగా కేంద్ర, రాష్ట్ర ప్రభుత్వాలకు విరాళాలను ప్రకటిస్తూ అండగా నిలుస్తున్నారు. సినీ స్టార్లకు తోడుగా క్రీడాకారులు విరాళాలు ప్రకటిస్తుండటంతో పలువురు హర్షం వ్యక్తం చేస్తున్నారు.