Amazon tribe tradition: నిజంగా అక్కడ మగాడిగా పుట్టడం కంటే.. అడవిలో చెట్టుగా పుట్టడం నయం అనుకుంటా. ఎందుకంటే మగ పుట్టుక పుట్టిన తర్వాత అక్కడ ప్రతిరోజు ఒక పరీక్షనే. ఆ పరీక్షలను తట్టుకుంటూ.. బాధలను భరించుకుంటూ ముందుకు సాగిపోవాలి. నావల్ల కాదు అంటే.. ఇక అప్పుడు ఉంటది నా సామిరంగా.. ప్రతిరోజు సినిమానే. అందువల్లే అక్కడ మగాళ్లుగా పుట్టిన వారంతా ప్రతిరోజు పరీక్షలు ఎదుర్కొంటూనే ఉంటారు.
ఆదిమ కాలంలో ఇటువంటి విధానాలు ఉండేవి అనుకుంటా. ఇప్పటి ఆధునిక కాలంలో కూడా అటువంటి పరీక్షలు కొనసాగుతూనే ఉన్నాయి. అయితే వాటిని ఎదుర్కొంటు మగాళ్లు ముందుకెళ్తుండడం నిజంగా ఆశ్చర్యమే. అమెజాన్ అడవుల్లో సతేరే మావే అనే తెగ జీవిస్తూ ఉంటుంది. ఈ తెగలో పుట్టిన మగాళ్లు.. తాము మగాళ్లమని గుర్తింపు పొందాలంటే కచ్చితంగా బుల్లెట్ పరీక్షా ఎదుర్కోవాలి. ఇక్కడ బుల్లెట్ అనగానే ఎవరూ తుపాకులతో కాల్చరు. బుల్లెట్ ఆంట్స్(చీమలు) తో కుట్టించుకోవాలి. బుల్లెట్ చీమలతో నిండిన గ్లోవ్స్ ధరించాలి. ఆ చీమల కుట్టినప్పుడు కలిగే నొప్పి బుల్లెట్ తగిలిన దానికంటే ఇబ్బందిగా ఉంటుందట. ఈ పరీక్షను ధైర్యానికి, సహనానికి ప్రతీకగా భావిస్తుంటారు. ఈ పరీక్షను వారు అనేక సందర్భాల్లో ఎదుర్కోవాలి. చీమలు కుట్టినప్పుడు మగవాళ్ళు దారుణంగా ఏడుస్తారు. కొన్ని సందర్భాలలో విపరీతమైన గాయాలు కూడా అవుతుంటాయి. అయినప్పటికీ వారు ఓర్చుకుంటారు. దీనిని ప్రపంచంలోనే అత్యంత బాధాకరమైన ఆచారంగా చెబుతుంటారు.
చీమలలో విష పదార్థం ఉంటుంది. కాకపోతే అది మనుషులను చంపే స్థాయిలో ఉండదు. అయినప్పటికీ ఆ చీమలు కుట్టినప్పుడు విపరీతమైన నొప్పి ఉంటుంది. పైగా ఒక్కోసారి దద్దుర్లు కూడా ఏర్పడుతుంటాయి. కొన్ని బలమైన చీమలు గాయాలు కూడా చేస్తుంటాయి. ఆ సమయంలో రక్తాలు కూడా కారుతూ ఉంటాయి. అయినప్పటికీ మగవాడిగా గుర్తింపు పొందాలంటే వారు బుల్లెట్ పరీక్షను ఎదుర్కొంటారు. బుల్లెట్ పరీక్షలో విజయవంతమైన వారు వివాహానికి యోగ్యులని అక్కడి పెద్దలు చెబుతుంటారు. ఆ తర్వాత వారికి వివాహాలు చేస్తుంటారు.
