Fertility: భారత దేశంలో ప్రస్తుతం చాలా మంది దంపతులు ఉన్నత చదువులు, ఉద్యోగాల్లో స్థిరపడటం, ఆర్థిక భద్రత, వ్యక్తిగత లక్ష్యాలు వంటి కారణాలతో పిల్లలను కనడాన్ని వాయిదా వేస్తున్నారు. అయితే కుటుంబ ప్రణాళికను చాలా ఆలస్యం చేయడం వల్ల భవిష్యత్తులో సంతానోత్పత్తికి సంబంధించిన సమస్యలు ఎదురయ్యే అవకాశం ఉందని ఫెర్టిలిటీ నిపుణులు హెచ్చరిస్తున్నారు. ముఖ్యంగా 35 ఏళ్లు, పురుషులు 40 ఏళ్ల తరువాత ఫెర్టిలిటీ క్రమంగా తగ్గడం ప్రారంభమవుతుందని చెబుతున్నారు. అంతేకాకుండా ఈ వయసు దాటిన తరువాత సంతానం జరిగినా.. అనేక సమ్యలు ఎదుర్కోవాల్సి వస్తుంది. అసలేం జరగుతుందంటే?
ముఖ్యంగా మహిళల్లో 35 ఏళ్లు దాటిన తర్వాత ఫెర్టిలిటీ సమస్యను ఎదుర్కొంటారు. మహిళలు పుట్టుకతోనే నిర్దిష్ట సంఖ్యలో అండాలను (Eggs) కలిగి ఉంటారు. వయసు పెరిగే కొద్దీ ఈ అండాల సంఖ్య మాత్రమే కాకుండా వాటి నాణ్యత కూడా తగ్గిపోతుంది. 35 ఏళ్ల తర్వాత ఈ ప్రక్రియ వేగంగా జరుగుతుంది. దీనివల్ల గర్భం ధరించే అవకాశాలు తగ్గడమే కాకుండా గర్భస్రావం, క్రోమోజోమ్ లోపాలు, శిశువులో జన్యుపరమైన సమస్యలు వచ్చే ప్రమాదం కూడా పెరుగుతుంది.
పురుషుల్లోనూ 40 ఏళ్లు దాటిన వీర్యకణాల (Sperm) సంఖ్య, చురుకుదనం, నాణ్యత క్రమంగా తగ్గుతాయి. దీంతో గర్భధారణ ఆలస్యం కావడం, గర్భస్రావం ప్రమాదం పెరగడం, కొన్ని జన్యుపరమైన సమస్యల అవకాశాలు కూడా అధికమవుతాయని వైద్యులు చెబుతున్నారు.
వయసు పెరిగిన తర్వాత గర్భం దాల్చడం వల్ల గర్భధారణ సమయంలో అధిక రక్తపోటు, గర్భకాల మధుమేహం, ప్రీమెచ్యూర్ డెలివరీ, సిజేరియన్ అవసరం పెరగడం వంటి సమస్యలు వచ్చే అవకాశం ఉంటుంది. అలాగే IVF వంటి ఫెర్టిలిటీ చికిత్సల అవసరం కూడా పెరగవచ్చు. వయసు పెరిగేకొద్దీ ఈ చికిత్సల విజయావకాశాలు కూడా తగ్గుతాయని నిపుణులు చెబుతున్నారు.
వివాహం ఆలస్యమైనా లేదా పిల్లలను కొన్ని సంవత్సరాలు వాయిదా వేయాలని భావిస్తున్న జంటలు 35 ఏళ్లు వచ్చేలోపే ఫెర్టిలిటీ హెల్త్ చెక్ చేయించుకోవాలని వైద్యులు సూచిస్తున్నారు. మహిళల్లో అండాశయాల సామర్థ్యాన్ని అంచనా వేసే పరీక్షలు, హార్మోన్ పరీక్షలు, అల్ట్రాసౌండ్ ద్వారా పరిస్థితిని తెలుసుకోవచ్చు. పురుషులు వీర్యపరీక్ష చేయించుకోవడం ద్వారా ఫెర్టిలిటీ స్థితిని తెలుసుకోవచ్చు.
కేవలం వయసు మాత్రమే కాదు, జీవనశైలి కూడా ఫెర్టిలిటీపై ప్రభావం చూపుతుంది. ధూమపానం, మద్యం సేవించడం, అధిక బరువు, ఒత్తిడి, సరైన నిద్ర లేకపోవడం, పోషకాహార లోపం వంటి అంశాలు పురుషులు, మహిళలు ఇద్దరిలోనూ సంతానోత్పత్తి సామర్థ్యాన్ని దెబ్బతీస్తాయి. క్రమం తప్పకుండా వ్యాయామం చేయడం, సమతుల్య ఆహారం తీసుకోవడం ద్వారా ఫెర్టిలిటీని మెరుగుపరచుకోవచ్చు.
