Pahalgam Terrorists: జమ్మూ కశ్మీర్లోని పహల్గాంలో ఏప్రిల్ 22న ఉగ్రవాదులు జరిపిన దాడుల్లో 26 మంది పర్యాటకులు చనిపోయారు. ఈ ఘటన భారత్తోపాటు, ప్రపంచం ఉలిక్కిపడింది. దీనికి కారణమైన వారిని గుర్తించి.. అందుకు బాధ్యులైన పాకిస్తాన్ ఉగ్రస్థావరాలపై భారత్ ఆపరేషన్ సిందూర్ పేరుతో దాడిచేసింది. అయితే పహల్గాం దాడికి పాల్పడినవారిని పట్టుకోవడానికి చాలా సమయం తీసుకుంది. దీనిని కూడా విపక్షాలు తప్పుపడుతున్నాయి. ఇంత సమయం ఎందుకు పట్టిందని కేంద్రాన్ని ప్రశ్నిస్తున్నాయి. అయితే జమ్మూ కశ్మీర్లోని డచిగామ్ నేషనల్ పార్కులో ముగ్గురు ఉగ్రవాదులను భారత భద్రతా బలగాలు మట్టుపెట్టిన ఘటన, దేశ భద్రతా వ్యవస్థల సమర్థతను, సంకల్పాన్ని చాటిచెబుతోంది. ఈ ఆపరేషన్ వెనుక ఉన్న సంక్లిష్టతలు, సవాళ్లను పరిశీలిస్తే ఈ విజయం ఎంతటి ప్రాముఖ్యమైనదో స్పష్టమవుతుంది.
భౌగోళిక, వ్యూహాత్మక సవాళ్లు
డచిగామ్ నేషనల్ పార్కు 120 చదరపు కిలోమీటర్ల విస్తీర్ణంలో విస్తరించి, దట్టమైన అడవులు, కొండలు, లోయలు, గుహలతో కూడిన భౌగోళిక సంక్లిష్టతను కలిగి ఉంది. ఈ ప్రాంతంలో ఉగ్రవాదులు దాక్కున్నప్పుడు, వారు డిజిటల్ లాకౌట్ను పాటించడం, సెల్ఫోన్లు లేదా ఇతర టెక్నాలజీని ఉపయోగించకపోవడం వల్ల గుర్తించడం కష్టతరమైంది. అయినప్పటికీ, వారికి ఆహారం, సమాచారం అందడం, స్థానిక గుజ్జర్ గుడిసెలలో దాక్కోవడం వంటి అంశాలు భద్రతా బలగాలకు మరింత సవాలుగా మారాయి. అయినా భారత సైన్యం మే 22న ఉగ్రవాదులు డచిగామ్లో ఉన్నట్లు గుర్తించినప్పటికీ, వారి కచ్చితమైన స్థానాన్ని నిర్ధారించడానికి సమయం పట్టింది. జూలై 22న ఉగ్రవాదులు శాటిలైట్ ఫోన్ను ఉపయోగించడంతో వారి స్థావరం గుర్తించబడింది. ఈ కీలక సమాచారం ఆధారంగా, ఆర్మీ ఆపరేషన్ మహదేవ్ను జూలై 28న చేపట్టి, కేవలం ఆరు గంటల్లో ముగ్గురు ఉగ్రవాదులను హతమార్చింది.
ఆపరేషన్ విజయం వెనుక వ్యూహం
ఈ ఆపరేషన్ విజయం వెనుక భద్రతా బలగాల శ్రమ, కచ్చితమైన ఇంటెలిజెన్స్, వ్యూహాత్మక ప్రణాళిక ఉన్నాయి. ఉగ్రవాదులు దాక్కున్న డోక్ను గుర్తించడం, వారికి సహకారం అందించిన వ్యక్తులను గుర్తించడం, మహల్గాం దాడికి వారే బాధ్యులని నిర్ధారించడం.. ఈ అంశాలన్నీ ఆర్మీ యొక్క సమర్థతను సూచిస్తాయి. పహల్గాం నుంచి కేవలం 40 కిలోమీటర్ల దూరంలో ఈ ఆపరేషన్ జరగడం, ఈ ప్రాంతంలో ఉగ్రవాద కార్యకలాపాలను అరికట్టడంలో భద్రతా బలగాలు సాధించిన విజయాన్ని స్పష్టం చేస్తుంది.
గత సంఘటనలతో పోలిస్తే..
విపక్షాలు మూడు నెలల సమయాన్ని ఆలస్యంగా భావిస్తున్నప్పటికీ, గత సంఘటనలతో పోల్చితే ఈ విజయం అత్యంత వేగవంతమైనది. అమెరికా ట్విన్ టవర్స్ దాడికి కారణమైన ఒసామా బిన్ లాడెన్ను పట్టుకోవడానికి దాదాపు పదేళ్లు పట్టింది. అలాగే, రాజీవ్ గాంధీ హత్య కేసులో శివరాసన్ను గుర్తించి హతమార్చడానికి కూడా గణనీయమైన సమయం తీసుకుంది. ఈ నేపథ్యంలో, డచిగామ్లో మూడు నెలల్లో ఉగ్రవాదులను హతమార్చడం భద్రతా బలగాల సామర్థ్యాన్ని సూచిస్తుంది.
