Delhi Election : ఢిల్లీ ప్రభుత్వంలో మాగ్జిమమ్ ఎంత మంది మంత్రులు ఉండవచ్చు? ఇందుకు సంబంధించిన నియమమేంటో తెలుసా ?

Delhi Election : రాజధాని ఢిల్లీ ఎన్నికలు పూర్తయ్యాయి. దాదాపు 27ఏళ్ల తర్వాత బీజేపీ అధికారంలోకి రాబోతుంది. దీంతో ఆ పార్టీ ముఖ్యమంత్రి అభ్యర్థి ఎవరంటూ రాజకీయ వర్గాల్లో తీవ్ర చర్చ నడుస్తుంది. ముఖ్యమంత్రితో పాటు మంత్రుల పేర్లకు సంబంధించిన అనేక వార్తలు వైరల్ అవుతున్నాయి.. ఇప్పటివరకు బిజెపి హైకమాండ్ ఏ పేరును ఆమోదించలేదు. అందువల్ల, ముఖ్యమంత్రి పేరు గురించి కేవలం ఊహాగానాలు మాత్రమే జరుగుతున్నాయి. కానీ ఢిల్లీ ప్రభుత్వంలో గరిష్టంగా ఎంత మంది మంత్రులు ఉండవచ్చో తెలుసా.. ఈ రోజు మనం దాని వెనుక ఉన్న నియమాలను ఈ కథనంలో తెలుసుకుందాం.

ఢిల్లీ ముఖ్యమంత్రి ఎవరు అవుతారు?
2025 ఢిల్లీ అసెంబ్లీ ఎన్నికల్లో భారతీయ జనతా పార్టీ చారిత్రాత్మక విజయాన్ని నమోదు చేసింది. 70 అసెంబ్లీ స్థానాలకు గాను బిజెపి 48 సీట్లు గెలుచుకోగా, ఆమ్ ఆద్మీ పార్టీకి కేవలం 22 సీట్లు మాత్రమే వచ్చాయి. కాంగ్రెస్ సహా ఇతర పార్టీల ఖాతాలు కూడా తెరవలేదు. ఇప్పుడు 27 సంవత్సరాల తర్వాత ఢిల్లీలో బిజెపి ప్రభుత్వాన్ని ఏర్పాటు చేయబోతున్న తరుణంలో ముఖ్యమంత్రి, మంత్రుల పేర్లపై చర్చ తీవ్రమైంది. అయితే, పార్టీ అగ్ర కమాండ్ ఇంకా ఎవరి పేరును ప్రకటించలేదు.

ఎంతమంది మంత్రులు ఉండవచ్చు?
ఇప్పుడు ప్రశ్న ఏమిటంటే ఢిల్లీ ప్రభుత్వంలో ఎంత మంది మంత్రులు ఉండవచ్చు.. దీనికి ఏ ఫార్ములా పని చేస్తుంది. ఏ రాష్ట్రంలోనైనా అసెంబ్లీ సీట్ల సంఖ్యలో 15 శాతం మందిని మంత్రులుగా చేయవచ్చు. కానీ కేంద్రపాలిత ప్రాంతమైన ఢిల్లీలో దాని నియమాలు భిన్నంగా ఉంటాయి. సమాచారం ప్రకారం.. ఢిల్లీలోని అసెంబ్లీ సీట్లలో 10 శాతం మందికి మాత్రమే మంత్రులుగా అవకాశం ఉంది.

మంత్రుల సంఖ్య ఇంతే
ఢిల్లీలో మొత్తం 70 అసెంబ్లీ నియోజకవర్గాలు ఉన్నాయి, అంటే, 10 శాతం ఫార్ములాను దానికి వర్తింపజేసినప్పుడు ఈ సంఖ్య 7కే సరిపోతుంది. ఢిల్లీలో ఒక ముఖ్యమంత్రితో సహా మొత్తం ఏడుగురు క్యాబినెట్ మంత్రులు ఉండవచ్చు. అంటే ముఖ్యమంత్రి కాకుండా ఆరుగురు నాయకులకు మాత్రమే క్యాబినెట్ మంత్రి హోదా లభిస్తుంది. ముఖ్యమంత్రితో పాటు మంత్రుల పేర్లకు సంబంధించి ఢిల్లీలో చర్చలు కూడా ముమ్మరం అయ్యాయని వర్గాలు తెలిపాయి.

48 మంది ఎమ్మెల్యేలు ఆరుగురికి పదవులు?
ఢిల్లీలో 48 మంది బిజెపి ఎమ్మెల్యేలు గెలిచి అసెంబ్లీకి చేరుకున్నారు. ఢిల్లీలో మంత్రి పదవికి పోటీ చేసేవారి జాబితా చాలా పెద్దది. ఇప్పుడు ఈ 48 మంది ఎమ్మెల్యేలలో ఒకరు ముఖ్యమంత్రి అవుతారు. ఇది కాకుండా ఆరుగురు ఎమ్మెల్యేలకు కేబినెట్ మంత్రి పదవి లభిస్తుంది. ఇది మాత్రమే కాదు, మరో ఇద్దరు ఎమ్మెల్యేలకు అసెంబ్లీ స్పీకర్, డిప్యూటీ స్పీకర్ పదవులు కూడా లభిస్తాయి. ఇప్పుడు ఎవరు ముఖ్యమంత్రి అవుతారో, ఎవరు క్యాబినెట్ మంత్రి అవుతారో చూడాలి.