Vijay And Rahul Gandhi: సాధారణంగా ఎన్నికల్లో ఏ పార్టీకి పూర్తిస్థాయిలో మెజారిటీ రానప్పుడు.. కొన్ని స్థానాలు సాధించిన చిన్న పార్టీలకు బంపర్ ఆఫర్ లభిస్తూ ఉంటుంది. తంతే గారెల బుట్టలో పడ్డట్టు.. చిన్న పార్టీలు ఆ సందర్భాన్ని పండగ చేసుకొంటాయి. కానీ దురదృష్టవశాత్తు మనదేశంలో కాంగ్రెస్ పార్టీ చిన్న సైజు పార్టీగా మారిపోయింది. ఒకప్పుడు దేశాన్ని అప్రతిహతంగా పరిపాలించిన ఆ పార్టీ.. ప్రాంతీయ పార్టీలకంటే దిగజారిపోయింది. ఆ పార్టీ అగ్ర నాయకత్వం లో సత్తా లేకపోవడంతో రోజురోజుకు దిగజారి పోతుంది.
తమిళనాడు ఎన్నికల్లో డీఎంకేతో జట్టు కట్టి పోటీ చేసిన కాంగ్రెస్ పార్టీ.. కొన్ని స్థానాలను గెలుచుకుంది. ఇప్పుడు విజయ్ పార్టీకి మ్యాజిక్ ఫిగర్ లభించలేదు. కాంగ్రెస్ సపోర్ట్ ఇవ్వాలని విజయ్ పార్టీలోని ముఖ్య నాయకులు కోరారు. దానికి కాంగ్రెస్ పార్టీ నాయకులు సానుకూల స్పందన ఇచ్చారు. కాంగ్రెస్ పార్టీ అగ్ర నాయకుడు రాహుల్ గాంధీ టీవీకేకు సపోర్ట్ చేస్తామని ప్రకటించారని జాతీయ మీడియాలో వార్తలు వస్తున్నాయి. ఇదే గనుక నిజమైతే తమిళనాడులో కొత్త రాజకీయ శకాన్ని చూడాల్సి ఉంటుంది. అంతేకాదు టీవీకే అధినేత విజయ్ బుధవారం గవర్నర్ ను కలుస్తారు. ప్రభుత్వం ఏర్పాటుపై చర్చిస్తారు. గురువారం ఆయన ముఖ్యమంత్రిగా ప్రమాణస్వీకారం చేసే అవకాశం ఉంది. ప్రభుత్వ ఏర్పాటుకు మద్దతు ఇవ్వాలని కాంగ్రెస్ పార్టీ నిర్ణయించిన నేపథ్యంలో.. విజయ్ కి రాజకీయంగా ఎటువంటి ఇబ్బంది లేకుండా పోతుంది. మరోవైపు సపోర్ట్ చేస్తున్నందుకు కాంగ్రెస్ పార్టీ రెండు మంత్రి పదవులను అడిగినట్లు తెలుస్తోంది.. విజయ్ ప్రమాణ స్వీకారానికి రాహుల్ గాంధీ కూడా హాజరవుతారని జాతీయ మీడియాలో వార్తలు వస్తున్నాయి.
విజయ్ కాంగ్రెస్ వైపు చూసేందుకు ప్రధాన కారణం.. డీఎంకే కూటమిలో ఆ పార్టీ ప్రధాన భాగస్వామి. డీఎంకే కూటమి నుంచి కాంగ్రెస్ పార్టీని బయటికి లాగితే.. ఇండియా కూటమిలో డీఎంకే ఉండదు. అప్పుడు డిఎంకె రాజకీయంగా ఒంటరి అయిపోతుంది. విజయ్ టార్గెట్ కూడా అదే. ఎందుకంటే ఇప్పటికిప్పుడు కేంద్రంతో గోక్కోవలసిన అవసరం విజయ్ కి లేదు. పైగా అన్నా డీఎంకే మెరుగైన సీట్లు సాధించినప్పటికీ.. ఒకప్పటితో పోల్చి చూస్తే అంత బలంగా లేదు. అందువల్లే ఆ పార్టీ నుంచి చాలామంది నాయకులు టీవీకేలో చేరిపోయారు. ఈ ఐదు సంవత్సరాలలో అన్నా డీఎంకే నుంచి టీవీ కేకు వలసలు ఉంటూనే ఉంటాయి. విజయ్ దాని గురించి దృష్టి పెట్టంది కూడా అందువల్లే.
డీఎంకేను ఎంత బలహీనపరిస్తే టీవీ కేకు తమిళనాడులో అంత బలం పెరుగుతుంది. అందువల్లే విజయ్ ఈ ఆలోచన చేసి కాంగ్రెస్ పార్టీతో మంతనాలు జరపడం మొదలుపెట్టారు. అవి విజయవంతం కావడంతో ఆయన మొదటి టార్గెట్ ఈజీగానే ఫినిష్ చేయగలిగారు. విజయ్ చెప్పినట్టుగానే రాహుల్ సమ్మతి ఇస్తున్న నేపథ్యంలో.. ఈ ఐదు సంవత్సరాలు రాహుల్ గాంధీ విజిల్ ఊదాల్సిందే.
