Pahalgam Attack: జమ్మూ కాశ్మీర్లోని పహల్గామ్లో గత మంగళవారం(ఏప్రిల్ 22న) జరిగిన ఉగ్రదాడి వాయవత్ దేశాన్ని కలిచివేసింది. ఈ దాడిలో 26 మంది పర్యాటకులు ప్రాణాలు కోల్పోయారు. అనేకమంది గాయపడ్డారు. అయితే, ఈ విషాద సంఘటన మధ్యలో కశ్మీరీ వస్త్ర వ్యాపారి నజాకత్ అలీ (Nazakat Ali) చూపిన సాహసంపై ప్రశంసలు కురుస్తున్నాయి.
Also Read: భారత్ సంచలన నిర్ణయం.. పాకిస్తాన్ కు భారీ షాక్
సరన్ మేడోస్లో రక్తపాతం
జమ్మూ కశ్మీర్లోని పహల్గామ్లో ‘మినీ స్విట్జర్లాండ్’గా పిలువబడే ప్రదేశంలో మంగళవారం మధ్యాహ్నం 2:50 గంటల సమయంలో ఏడుగురు ఉగ్రవాదులు సైనిక దుస్తుల్లో వచ్చి.. ఆటోమేటిక్ ఆయుధాలతో పర్యాటకులపై విచక్షణారహితంగా కాల్పులు జరిపారు. ఈ దాదాపు 26 మంది పర్యాటకులు మరణించారు. ఇందులో భారతీయులతోపాటు నేపాల్, యూఏఈకి చెందిన ఇద్దరు విదేశీయులు ఉన్నారు. దాడి బాధ్యతను లష్కర్–ఎ–తోయిబాతో అనుబంధం ఉన్న ‘ద రెసిస్టెన్స్ ఫ్రంట్ (టీఆర్ఎఫ్)’ వహించింది. ఉగ్రవాదులు పురుషులను వేరు చేసి, ఇస్లామిక్ శ్లోకాలు చదవమని ఆదేశించి, చదవలేని వారిని కాల్చి చంపినట్లు సాక్షులు తెలిపారు.
ఆపదలో ఆదుకున్న హీరో
ఈ దాడి సమయంలో, కశ్మీర్కు చెందిన వస్త్ర వ్యాపారి నజాకత్ అలీ చూపిన ధైర్యం అందరినీ ఆకర్షించింది. ఛత్తీస్గఢ్లోని చిర్మిరి ప్రాంతానికి చెందిన 11 మంది పర్యాటకులను ఆయన సురక్షితంగా కాపాడారు. నజాకత్ శీతాకాలంలో ఛత్తీస్గఢ్లో గొర్రెల ఉన్ని శాలువలు, జాకెట్లు అమ్ముతూ ఈ పర్యాటకులతో స్నేహం చేశారు. వారు కాశ్మీర్కు వస్తే తానే స్వయంగా గైడ్గా ఉంటానని మాట ఇచ్చారు. దాడి సమయంలో, గందరగోళం నడుమ పర్యాటకులు చెల్లాచెదురుగా పరుగులు తీస్తుండగా, నజాకత్ సమయస్ఫూర్తితో వారిని ఒకచోట చేర్చి, సమీపంలోని అడవుల్లోకి తీసుకెళ్లి, అక్కడి నుంచి సురక్షితంగా హోటల్కు చేర్చారు. ఈ 11 మంది పర్యాటకులు చిర్మిరి ప్రాంతానికి చెందిన యువకులు. వీరు కాశ్మీర్ అందాలను చూసేందుకు నజాకత్ సహాయంతో బయలుదేరారు. దాడి సమయంలో నజాకత్ వారిని శాంతింపజేస్తూ, భయపడకుండా తన వెంట రమ్మని సూచించారు. ఈ సంఘటనలో ఆయన చూపిన నాయకత్వం, ధైర్యం వారి ప్రాణాలను కాపాడాయి.
సైయద్ ఆదిల్ హుస్సేన్ షా బలిదానం
నజాకత్ అలీతోపాటు, స్థానిక షియా ముస్లిం సైయద్ ఆదిల్ హుస్సేన్ షా (Syed Adil Hussain Shah) కూడా ఈ దాడిలో వీరోచితంగా వ్యవహరించారు. ఆయన ఒక ఉగ్రవాది చేతిలోని రైఫిల్ను లాక్కునే ప్రయత్నంలో ప్రాణాలు కోల్పోయారు. సైయద్ ఆదిల్ ఈ ప్రయత్నం ద్వారా అనేక మంది ప్రాణాలను కాపాడేందుకు ప్రయత్నించారని సాక్షులు తెలిపారు. అలాగే, స్థానిక గుర్రపు బండ్ల సంఘం సభ్యులు 11 మంది గాయపడిన పర్యాటకులను గుర్రాలపై, తాత్కాలిక స్ట్రెచర్లపై సురక్షిత ప్రాంతాలకు తరలించారు.
దేశవ్యాప్త స్పందన..
ఈ దాడిని దేశవ్యాప్తంగా రాజకీయ నాయకులు, సామాజిక వేదికలు తీవ్రంగా ఖండించాయి. ప్రధానమంత్రి నరేంద్ర మోదీ, ఈ దాడిని ‘‘జఘన్యమైన చర్య’’గా అభివర్ణిస్తూ, దోషులను శిక్షిస్తామని ప్రకటించారు. జమ్మూ కాశ్మీర్ ముఖ్యమంత్రి ఒమర్ అబ్దుల్లా, ఈ దాడిని ‘‘కాశ్మీర్ ఆత్మపై గాయం’’గా వ్యాఖ్యానించారు. కాశ్మీరీ నాయకుడు మిర్వాజ్ ఉమర్ ఫరూఖ్, ఈ దాడిని ‘‘పిరికి చర్య’’గా ఖండిస్తూ, కాశ్మీర్ సంస్కతి పర్యాటకులను ప్రేమతో స్వాగతించే సంప్రదాయానికి విరుద్ధమని పేర్కొన్నారు.
అంతర్జాతీయ మద్దతు..
అంతర్జాతీయంగా కూడా అమెరికా, రష్యా, యూకే, నేపాల్ వంటి దేశాలు ఈ దాడిని ఖండించాయి. అమెరికా ఉపాధ్యక్షుడు జేడీ వాన్స్, భారత్లో పర్యటిస్తున్న సమయంలో ఈ దాడిని ‘‘విధ్వంసకరమైన ఉగ్రదాడి’’గా అభివర్ణించారు. రష్యా అధ్యక్షుడు వ్లాదిమిర్ పుతిన్, ఈ దాడిని ‘‘కిరాతక హత్య’’గా ఖండించారు.
నజాకత్ అలీకి ప్రశంసలు
నజాకత్ అలీ చూపిన ధైర్యాన్ని ఛత్తీస్గఢ్ ముఖ్యమంత్రి విష్ణు దేవ్ సాయ్ ప్రశంసించారు. ‘‘నజాకత్ అలీ మానవత్వానికి, సాహసానికి ప్రతీక. ఆయన చేసిన సహాయం మరువలేనిది,’’ అని ఆయన అన్నారు. స్థానిక మీడియా, సోషల్ మీడియా వేదికల్లో నజాకత్ను ‘‘నిజమైన హీరో’’గా కొనియాడారు. ఛత్తీస్గఢ్లోని చిర్మిరి ప్రజలు నజాకత్ను సత్కరించేందుకు ఏర్పాట్లు చేస్తున్నారు.
పహల్గామ్ ఉగ్రదాడి కాశ్మీర్లో శాంతి ప్రక్రియకు గట్టి దెబ్బతీసినప్పటికీ, నజాకత్ అలీ, సైయద్ ఆదిల్ హుస్సేన్ షా వంటి వ్యక్తుల చర్యలు కాశ్మీరీల ఆతిథ్య స్ఫూర్తిని, మానవత్వాన్ని చాటిచెప్పాయి. ఈ దాడి ద్వారా ఉగ్రవాదులు కాశ్మీర్ ఆర్థిక వ్యవస్థను, పర్యాటక రంగాన్ని దెబ్బతీయాలని ప్రయత్నించినప్పటికీ, స్థానికుల సాహసం, ఐక్యత వారి ఉద్దేశాలను వమ్ము చేశాయి. నజాకత్ అలీ సాహసం భారతీయులందరికీ స్ఫూర్తిదాయకం.
Also Read: పాకిస్తాన్ పై భగ్గుమన్న ఆ దేశ మాజీ క్రికెటర్.. ఇంత ఉలికిపాటు ఎందుకు?
