మందగమనంలో సాగుతున్న ప్రపంచ ఆర్థిక వ్యవస్థకు ఓ వైపు కరోనా భయాలు వెంటాడుతుండగా మొత్తం ప్రపంచం ఖంగారు పడుతుంటే, ఇదే సమయంలో చమురు ఉత్పత్తి దేశాల మధ్య నెలకొన్న తీవ్రరూపం దాల్చడంతో ఆయిల్ ధరలు బాగా తగ్గుముఖం పట్టి, వీటిని అత్యధికంగా దిగుమతి చేసుకొంటూ ఉంటె భారత్, చైనా లకు మాత్రం భారీగా ఆయిల్ బోనాజా లభించినట్లు యింది.
వచ్చే నెల నుంచి 10 మిలియన్‌ బ్యారల్‌కు పైగా ముడిచమురును ఉత్పత్తి చేయాలని సౌదీ లక్ష్యంగా పెట్టుకోవడంతో ఇది ఈ రెండు దేశాలకు ఎంతో ఉపయోగకరం కానున్నది. ఈ ధరల పోటీలో భారత్ సహా పలు దేశాల స్టాక్‌ మార్కెట్లు సోమవారం కుప్పకూలాయి. సోమవారం స్టాక్‌ మార్కెట్ల పతనంతో ఆరున్నర లక్షల కోట్ల సంపద హరించుకపోయింది.
అంతర్జాతీయంగా ముడిచమురు ధరలు కూడా భారీగా పడిపోయాయి.
సోమవారం ట్రేడింగ్ ప్రారంభం నుంచే పతనం దిశగా కొనసాగుతున్న సెన్సెక్స్, నిఫ్టీ భారీ నష్టాల్లో కొనసాగుతున్నాయి. సౌదీ అరేబియా ఉత్పత్తి పెంచాలని నిర్ణయం తీసుకున్నట్లు తెలియడంతో అంతర్జాతీయ మార్కెట్లో 30 శాతానికి పైగా చమురు ధరలు పడిపోయాయి. 1990లో గల్ఫ్‌ యుద్ధం తర్వాత ఒకరోజులో ఆయిల్ ధరలు భారీగా పడిపోవడం ఇదే తొలిసారి.
తమ దేశంలో చమురు ఉత్పత్తి పెంచి.. తక్కువ ధరకు మార్కెట్లో విక్రయించాలని రియాద్‌ తీవ్ర ధరల పోరుకు సిద్ధమవడంతో సోమవారం అంతర్జాతీయ మార్కెట్లో బ్యారల్‌ ముడి చమురు అత్యల్పంగా 31.02డాలర్ల స్థాయికి పడిపోయింది. ఓపెక్‌ దేశాలకు నేతృత్వం వహిస్తున్న సౌదీ అరేబియా, రష్యా దేశాలు చమురు ఉత్పత్తిపై ఒక అవగాహనకు రాలేకపోయాయి.
దీంతో ఆగ్రహించిన సౌదీ ఉత్పత్తిని భారీ స్థాయిలో పెంచి..మంచి డిస్కౌంట్లతో తక్కువ ధరకే ముడిచమురును విక్రయించాలని నిర్ణయం తీసుకుంది. ఉత్పత్తిలో కోత విధించే ముందు చమురు డిమాండ్‌పై కరోనా వైరస్‌ పూర్తి ప్రభావాన్ని అంచనా వేయాలని తాము భావిస్తున్నట్లు రష్యా పేర్కొంది. చమురు ధర బ్యారల్‌కు 43 డాలర్ల కన్నా తగ్గితే రష్యా కూడా ఆర్థిక ఇబ్బందులు ఎదుర్కోవాల్సి వస్తుంది.