Electric Vehicles : ఎలక్ట్రిక్ వాహనాల వినియోగాన్ని ప్రోత్సహించేందుకు ప్రభుత్వం ప్రారంభించిన సబ్సిడీ పథకం ఊహించని విధంగా ముగింపుకు వచ్చే సూచనలు కనిపిస్తున్నాయి. ఫేమ్ (FAME) పథకం మొదటి, రెండో దశల తర్వాత ప్రస్తుతం అమల్లో ఉన్న పీఎం ఈ-డ్రైవ్ (PM E-Drive) పథకం నిధులు త్వరగా అయిపోతుండడంతో గడువు కంటే ముందే ఆగిపోయే ప్రమాదం ఉంది. పీఎం ఈ-డ్రైవ్ సబ్సిడీ పథకం వాస్తవానికి 2026 మార్చి 31 వరకు అమలులో ఉండాలి. కానీ, తాజా సమాచారం ప్రకారం ఈ పథకం ఈ ఏడాది జూలై-ఆగస్టు నాటికే లేదా అత్యంత ఎక్కువ ఆలస్యమైనా 2026 జనవరి నాటికి ముగిసే అవకాశం ఉంది.
Also Read : క్రెటా, విటారాకు ఇక కష్టకాలం.. సరికొత్తగా వస్తున్న రెనాల్ట్ డస్టర్
పేరు వెల్లడించడానికి ఇష్టపడని ఓ సీనియర్ ప్రభుత్వ అధికారి ఈ విషయం మీద స్పష్టమైన సంకేతాలు ఇచ్చారు. పీఎం ఈ-డ్రైవ్ అనేది పరిమిత నిధులతో కూడిన పథకమని, దేశంలో ఎలక్ట్రిక్ వాహనాల కొనుగోళ్లు ఊహించిన దానికంటే ఎక్కువగా ఉండడంతో ఈ పథకం కోసం కేటాయించిన ప్రభుత్వ నిధులు త్వరగా ఖాళీ అయ్యే అవకాశం ఉందని ఆయన తెలిపారు.
పీఎం ఈ-డ్రైవ్ పథకం కింద ప్రభుత్వం మొత్తం రూ.10,900 కోట్ల బడ్జెట్ను కేటాయించింది. ఈ నిధులను ప్రధానంగా 2-వీలర్, 3-వీలర్ ఎలక్ట్రిక్ వాహనాలకు (ఈ-రిక్షాలు, ఈ-కార్ట్లతో సహా) సబ్సిడీ అందించడానికి ఉద్దేశించారు. ఈ పథకం కింద ప్రభుత్వం బ్యాటరీ కెపాసిటీ ఆధారంగా సబ్సిడీని అందిస్తుంది. ఇది ప్రతి కిలోవాట్-గంటకు (kWh) రూ.5,000 చొప్పున నిర్ణయించారు.
పథకం ప్రారంభమైన మొదటి సంవత్సరంలో, ప్రతి ద్విచక్ర వాహనానికి గరిష్టంగా రూ.10,000 సబ్సిడీ ఇవ్వాలని నిర్ణయించారు. అయితే, పథకం రెండవ సంవత్సరం అయిన ఈ ఏడాది (2025-26) నుండి ఈ సబ్సిడీ సగానికి తగ్గించబడింది. ప్రస్తుతం ఇది ప్రతి kWhకి రూ.2,500 చొప్పున ఇవ్వబడుతోంది. ఈ సంవత్సరం గరిష్టంగా లభించే సబ్సిడీ మొత్తం రూ. 5,000 కంటే ఎక్కువ ఉండదు.
వాస్తవానికి, ఈ ఏడాది ఏప్రిల్ 1, 2025 తర్వాత రిజిస్టర్ చేసుకునే వాహనాలకు 2026 మార్చి 31 వరకు ఈ పథకం కింద సబ్సిడీ అందించాల్సి ఉంది. కానీ, నిధులు త్వరగా అయిపోతున్న కారణంగా ఈ సబ్సిడీ పథకాన్ని త్రిచక్ర ఎలక్ట్రిక్ వాహనాలకు జూలై-ఆగస్టు 2025 నాటికి, ద్విచక్ర వాహనాలకు జనవరి 2026 నాటికి నిలిపివేయవలసి వచ్చే అవకాశం ఉంది. ఇది ఎలక్ట్రిక్ వాహనం కొనుగోలు చేయాలనుకునే వారికి ఒక బ్యాడ్ న్యూస్ గా చెప్పొచ్చు.
Also Read : ఫైవ్ స్టార్ సేఫ్టీ.. తక్కువ ధర.. అమ్మకాల్లో ఇది రికార్డ్
