Railway
Railway : భారతదేశంలో ప్రతి రోజు కొన్ని కోట్ల మంది ప్రయాణికులు వివిధ ప్రాంతాలకు ప్రయాణిస్తుంటారు. రైలులో సీటు కన్ఫర్మ్ చేసుకోవాలంటే కొన్ని రోజుల ముందే టికెట్ బుక్ చేసుకోవాలి. పండుగలు, ప్రత్యేక సందర్భాల్లో నెలరోజుల ముందే టిక్కెట్లు బుక్ చేసుకుంటారు. అయితే, సుదీర్ఘ వెయిటింగ్ లిస్ట్ ఉంటుంది. ఇండియన్ రైల్వే క్యాటరింగ్ అండ్ టూరిజం (IRCTC) ఎప్పటికప్పుడు రైల్వే ప్రయాణికుల కోసం కొత్త సౌకర్యాలను తీసుకువస్తూనే ఉంది. అయినా రైలు టిక్కెట్లు బుక్ చేసుకునేందుకు ప్రయాణికులు ఇబ్బందులు పడుతున్నారు. వెయిటింగ్ లిస్ట్ ఎక్కువగా ఉండటంతో తత్కాల్ టిక్కెట్లపైనే ఆధారపడుతున్నారు. వాటిని కూడా ఒక రోజు ముందుగానే బుక్ చేసుకోవాలి. ధర కూడా ఎక్కువే. దీంతో అత్యవసరంగా వెళ్లాల్సిన వారు తీవ్ర ఇబ్బందులు పడుతున్నారు. అక్కడికక్కడే టిక్కెట్లు బుక్ చేసుకొని రైలు ప్రయాణం చేయలేక ఆందోళన చెందుతున్నారు.
ఆ సమస్యకు చెక్ పెట్టేందుకు ఇండియన్ రైల్వే క్యాటరింగ్ అండ్ టూరిజం (IRCTC) మరో కొత్త సదుపాయాన్ని తీసుకొచ్చింది. ప్రస్తుతం పండుగల సీజన్ నడుస్తుంది. ఎలాగో దసరా అయిపోయింది. తర్వాత దీపావళి నుండి ఛత్ వరకు సామాన్య ప్రజలు ప్రయాణిస్తుంటారు. రైల్వేలో టిక్కెట్ల కోసం వెయిటింగ్ పిరియడ్ చాలా ఎక్కువగా ఉంటుంది. దీనికి ప్రధాన కారణం ప్రస్తుత విధానంలో ప్రజలు 120 రోజుల ముందుగానే రైల్వే రిజర్వేషన్ టిక్కెట్లను బుక్ చేసుకోవడం. దీని వల్ల బ్లాక్ మార్కెట్లో రైల్వే టిక్కెట్లు హోల్డ్ లో ఉండిపోతున్నాయి. ఇప్పుడు రైల్వే బోర్డు ఒక పెద్ద నిర్ణయం తీసుకుంది. దీనితో ఎక్కువ వెయిటింగ్ పిరియడ్ సమస్యను తొలగించవచ్చు, రైల్వే రిజర్వేషన్ టిక్కెట్ల ముందస్తు బుకింగ్ 60 రోజుల ముందు మాత్రమే చేసుకోవాల్సి ఉంటుంది. వచ్చే నెల నుంచి కొత్త విధానం అమల్లోకి రానుంది.
నవంబర్ 1, 2024 నుండి రిజర్వేషన్ టిక్కెట్ల ముందస్తు బుకింగ్ 60 రోజుల ముందు మాత్రమే జరుగుతుందని రైల్వే బోర్డు అధికారిక ప్రకటనలో తెలిపింది. అయితే 120 రోజుల ముందుగా అడ్వాన్స్ టిక్కెట్లను బుక్ చేసుకునే సేవ 31 అక్టోబర్ 2024 వరకు కొనసాగుతుంది. ఒకే రోజులో ప్రయాణాన్ని ముగించే కొన్ని ప్రత్యేక ఎక్స్‌ప్రెస్ రైళ్లలో పాత రిజర్వేషన్ విధానం, అంటే అడ్వాన్స్ టిక్కెట్ల బుకింగ్ కోసం నిర్ణయించిన తక్కువ పరిమితి, మునుపటిలాగే వర్తిస్తుందని రైల్వే బోర్డు స్పష్టం చేసింది. ఈ రకమైన జాబితా రైళ్లలో తాజ్ ఎక్స్‌ప్రెస్, గోమతి ఎక్స్‌ప్రెస్ వంటి అనేక రైళ్లు ఉన్నాయి.
విదేశీ పౌరులకు 365 రోజుల పరిమితి
విదేశీ పౌరులు లేదా పర్యాటకులకు 365 రోజుల ముందుగానే రైల్వే రిజర్వేషన్ టిక్కెట్లను బుక్ చేసుకునే సదుపాయం మునుపటిలాగానే ఉంటుందని రైల్వే బోర్డు తెలిపింది. ఇందులో ఎలాంటి మార్పులు చేయలేదు. రైల్వే రిజర్వేషన్ టిక్కెట్లు కేవలం 60 రోజుల ముందుగానే బుక్ చేసుకుంటే, ప్రజలు నెలల ముందుగానే టిక్కెట్లు బుక్ చేసుకోలేరు. ఏజెంట్లు టిక్కెట్లు హోల్డ్ చేయడం పై కూడా నిషేధం ఉంటుంది. అడ్వాన్స్ బుకింగ్ సదుపాయం ద్వారా 60 రోజుల ముందుగానే టిక్కెట్లను బుక్ చేసుకోవడం వల్ల బ్లాక్ మార్కెటింగ్‌ను నిరోధించవచ్చు. అయితే, టిక్కెట్ల బ్లాక్ మార్కెటింగ్ నిరోధించడానికి ఇండియన్ రైల్వే క్యాటరింగ్ అండ్ టూరిజం (IRCTC) ఇప్పటికే అనేక చర్యలు తీసుకుంటోంది. ఇందులో టికెట్ బుకింగ్ పరిమితి కూడా ఉంటుంది.
