Women Period: పీరియడ్స్ అనేది దాదాపు ప్రతి స్త్రీ ప్రతి నెలా అనుభవించాల్సిన సహజమైన జీవ ప్రక్రియ. ఈ సమయంలో, వారు అనేక సమస్యలను ఎదుర్కోవలసి ఉంటుంది. వాటి గురించి నేటికీ చాలామంది బహిరంగంగా మాట్లాడటానికి వెనుకాడతారు. ఇప్పటికీ కూడా చాలా మందిలో ఈ పీరియడ్స్ కు సంబంధించిన అపోహలు, అనుమానాలు ఉన్నాయి. అమ్మాయిలే కాదు, అబ్బాయిలు కూడా దీనికి సంబంధించిన కొన్ని విషయాలు తెలుసుకోవాలి. తద్వారా వారు మహిళల అవసరాలు, సమస్యలను అర్థం చేసుకుంటారు. అంతేకాకుండా ఇద్దరూ దీని గురించి ఒకరితో ఒకరు మాట్లాడుకోవచ్చు. ఈ టాపిక్ కు సంబందించి డాక్టర్ మనన్ వోరా సోషల్ మీడియాలో ఒక వీడియోను పంచుకున్నారు. ఇంతకీ ఏమన్నారంటే?
పీరియడ్స్ సమయంలో గర్భం దాల్చవచ్చా?
అవును, పీరియడ్స్ సమయంలో కూడా గర్భం దాల్చే అవకాశం ఉంది. నిజానికి, స్పెర్మ్ చాలా రోజులు జీవించగలదు. కాబట్టి పీరియడ్స్ సమయంలో గర్భం దాల్చే అవకాశాలు ఉంటాయి కానీ తక్కువ అన్నారు.
బొప్పాయి తినడం వల్ల పీరియడ్స్ త్వరగా వస్తాయా?
కాదు, ఇది అపోహ మాత్రమే. డాక్టర్ ప్రకారం, దీనికి ఎటువంటి శాస్త్రీయ రుజువు లేదు. ఇది మీ జీర్ణక్రియను మెరుగుపరుస్తుంది. కానీ ఇది ఋతుచక్రాన్ని ప్రేరేపించదు.
శీతల పానీయాలు పీరియడ్స్ ఆపుతాయా?
ఇది పూర్తిగా తప్పు అంటున్నారు నిపుణులు. ఏ ఉష్ణోగ్రత లేదా పానీయాలు మీ ఋతుచక్రాన్ని నియంత్రించలేవు.
ఋతుస్రావం ఆగితే గర్భం దాలుస్తారా?
ఇది చాలా సాధారణ ప్రశ్న, దీని గురించి ఒక సాధారణ అపోహ కూడా ఉంది. గర్భం వల్ల పీరియడ్స్ ఆగిపోవచ్చు. కానీ ఇది మాత్రమే కారణం అని చెప్పలేము అన్నారు. ఎందుకంటే ఒత్తిడి, థైరాయిడ్, PCOS, బరువు సమస్యల వల్ల కూడా పీరియడ్స్ ఆగిపోతాయి అంటున్నారు డాక్టర్.
పీరియడ్స్ సమయంలో ఊరగాయలు లేదా పుల్లని పదార్థాలు తినకూడదా?
ఇది పీరియడ్స్ కి సంబంధించిన ఒక విషయం. దాదాపు ప్రతి అమ్మాయి తన అమ్మమ్మ లేదా తల్లి ద్వారా ఈ మాటలు వినే ఉంటారు. ఇది కూడా తప్పు. డాక్టర్ ప్రకారం, ఆహారాలు మీ ఋతు ప్రవాహంపై ఎటువంటి ప్రభావం చూపవు.
పీరియడ్స్ సమయంలో స్నానం, తలస్నానం చేయవద్దా?
ఇది అస్సలు నిజం కాదని, పీరియడ్స్ సమయంలో పరిశుభ్రత (పీరియడ్స్ హైజీన్ టిప్స్) పాటించడం చాలా ముఖ్యం అని డాక్టర్ తెలిపారు. ఇది నొప్పుల నుంచి ఉపశమనం ఇస్తుంది. ఇన్ఫెక్షన్ ప్రమాదాన్ని కూడా తగ్గిస్తుంది.
శానిటరీ ప్యాడ్లు క్యాన్సర్‌కు కారణమవుతాయా?
డాక్టర్ మనన్ ప్రకారం, ఇది కూడా తప్పేనట. కానీ మీరు ఎప్పటికప్పుడు ప్యాడ్ మార్చకపోతే, అది దద్దుర్లు, ఇన్ఫెక్షన్లకు దారితీస్తుంది. 4 నుంచి 5 గంటలకు ప్యాడ్ మార్చాలి
పీరియడ్స్ సమయంలో వ్యాయామం చేయడం వల్ల ఏదైనా హాని ఉందా?
ఖచ్చితంగా కాదు. వైద్యుల అభిప్రాయం ప్రకారం, పీరియడ్స్ సమయంలో శారీరకంగా చురుకుగా ఉండటం వల్ల తిమ్మిర్లు తగ్గుతాయి. మానసిక స్థితి కూడా మెరుగుపడుతుంది.
Disclaimer : ఈ సమాచారం కేవలం అవగాహన కోసం మాత్రమే అందిస్తున్నాము. దీన్ని Oktelugu.com నిర్ధారించదు. ఈ సూచనలు పాటించే ముందు నిపుణుల సలహాలు తీసుకోగలరు.
