Jagapathi Babu Peddi look: ప్రస్తుతం మన టాలీవుడ్ లో తెరకెక్కుతున్న పాన్ ఇండియన్ చిత్రాల్లో అభిమానులతో పాటు, ప్రేక్షకులు కూడా ఎంతో ఆతృతగా ఎదురు చూస్తున్న చిత్రం ‘పెద్ది'(Peddi Movie). గ్లోబల్ స్టార్ రామ్ చరణ్(Global Star Ram Charan) హీరో గా నటిస్తున్న ఈ సినిమా ఏప్రిల్ 30న విడుదల కాబోతుంది. ముందుగా ఈ చిత్రాన్ని మార్చి 27 న రామ్ చరణ్ పుట్టినరోజు సందర్భంగా గ్రాండ్ గా అన్ని భాషల్లోనూ విడుదల చేద్దామని అనుకున్నారు. కానీ షూటింగ్ చాలా వరకు బ్యాలన్స్ ఉండడంతో వాయిదా వేయాల్సి వచ్చింది. అభిమానులు రెండవ పాట కోసం ఎంతో ఆతృతగా ఎదురు చూస్తున్నారు . ఈ శివరాత్రికి విడుదల చేస్తారని అంతా అనుకున్నారు కానీ, మార్చి మొదటి వారానికి అది పోస్ట్ పోన్ అయ్యింది. ఇకపోతే ఈ చిత్రం లో జగపతి బాబు(Jagapathi Babu) ‘అప్పలసూరి’ అనే క్యారెక్టర్ చేస్తున్న సంగతి తెలిసిందే.
గత ఏడాది ఆయన క్యారెక్టర్ కి సంబంధించిన ఫస్ట్ లుక్ ని విడుదల చేశారు మేకర్స్. అందులో జగపతి బాబు లుక్ ని చూసి అందరూ ఒక్కసారిగా షాక్ కి గురయ్యారు. అసలు అది జగపతి బాబు అంటే నమ్మడం కష్టం, ఆ రేంజ్ లో మేకప్ చేశారు. నిన్న జగపతి బాబు పుట్టిన రోజు సందర్భంగా, ఈ చిత్రం లో ఆయన డైరెక్టర్ బుచ్చి బాబు తో కలిసి చర్చిస్తున్న వర్కింగ్ స్టిల్ ని ఒకటి విడుదల చేశారు. దీనిని చూసిన అభిమానులు ఎవరినో పట్టుకొని, జగపతి బాబు అంటారేంటి?, అసలు ఎవరైనా నమ్మేలాగా ఉందా ఆ లుక్? అంటూ ఫన్నీ కామెంట్స్ చేశారు. అయితే ఈ లుక్ పై రీసెంట్ గా జరిగిన ఒక ఇంటర్వ్యూ లో జగపతి బాబు ఒక ఆసక్తికరమైన అనుభవాన్ని పంచుకోగా, అది ఇప్పుడు సోషల్ మీడియా లో బాగా వైరల్ అయ్యింది.
ఆయన మాట్లాడుతూ ‘ఒక రోజు నేను పెద్ది చిత్రం షూటింగ్ ముగియగానే, అప్పలసూరి లుక్ తోనే బయటకు వెళ్లి ఒక టీ స్టాల్ వద్ద ఆగి టీ తాగాను. ఒక్కరు కూడా నేను జగపతి బాబు అనే విషయాన్నీ గుర్తు పట్టలేదు. దానిని మేము వీడియో కూడా షూట్ చేశాము. చాలా బాగా వచ్చింది. సినిమా విడుదలైన తర్వాత ఆ వీడియో ని సోషల్ మీడియా లో అప్లోడ్ చేస్తాను’ అంటూ చెప్పుకొచ్చాడు జగపతి బాబు. ఈ క్యారెక్టర్ తన కెరీర్ లోనే ఒక మైల్ స్టోన్ లాగా మిగిలిపోతుందని, ఇలాంటి పాత్ర పోషించే అవకాశం ఇచ్చినందుకు బుచ్చి బాబు కి ధన్యవాదాలు అంటూ ఆయన ఆ ఇంటర్వ్యూ లో చెప్పుకొచ్చాడు . అయితే ఈ క్యారెక్టర్ పాజిటివ్ గా ఉంటుందా?, లేదా నెగటివ్ గా ఉంటుందా అనేది ప్రస్తుతానికి సస్పెన్స్.
