Tollywood: టాలీవుడ్ ఇండస్ట్రీలో ఒకసారి మంచి హిట్ కాంబినేషన్ అని పేరు తెచ్చుకుంటే చాలు.. మళ్లీ మళ్లీ ఆ కాంబోకి మంచి గిరాకీ ఉంటుంది. కానీ ఇది కేవలం హీరోహీరోయిన్ ల వరకు మాత్రమే కాదు. డైరెక్టర్ హీరోలకు కూడా చెందుతుంది. అదే విధంగా ఇప్పుడు మన టాలీవుడ్ ఇండస్ట్రీ రిపీట్ కాంబినేషన్ తో దూసుకొనిపోతుంది. ఇలాంటి కాంబోలకు క్రేజ్ కూడా పెరుగుతుంది. అయితే హిట్టైనా.. ఫ్లాపైనా దర్శకులను మాత్రం గుడ్డిగా నమ్మేస్తున్నారు మన హీరోలు. కథ నచ్చితే.. ట్రాక్ రికార్డ్ చూడకుండా ఛాన్స్ ఇచ్చేమంటున్నారు. దీంతో మన ఇండస్ట్రీలో ఈ రిపీట్ కాంబోలే ఎక్కువగా కనిపిస్తున్నాయి. ఇంతకీ ఆ హీరో ఎవరు ఏ డైరెక్టర్ తో మళ్లీ జతకడుతున్నారు అనే వివరాలు మీకోసం..
రవితేజ..
హిట్, ఫ్లాప్ లతో పనిలేకుండా వరుస సినిమాలతో బిజీ బిజీగా ఉంటారు రవితేజ. ప్రస్తుతం కూడా అదే దారి పాటిస్తున్నారు ఈ స్టార్ హీరో. టైగర్ నాగేశ్వరరావు విడుదలై వారం కాకముందే మరో సినిమా ప్రకటించారు. అది కూడా అలాంటిలాంటి సినిమా కాదు.. తనకు హ్యాట్రిక్ హిట్స్ ఇచ్చిన గోపీచంద్ మలినేనితో ప్రాజెక్ట్ ప్రకటించారు. దీంతో ఈ సినిమాపై ఇప్పుడే అంచనాలు పెంచుకున్నారు అభిమానులు. డాన్ శీను, బలుపు, క్రాక్ తర్వాత రవితేజ, గోపీచంద్ కాంబినేషన్ రిపీట్ అవుతుంది. మరోవైపు మైత్రి మూవీ మేకర్స్లో అమర్ అక్బర్ ఆంటోనీ, వాల్తేరు వీరయ్య తర్వాత రవితేజ చేస్తున్న మూడో సినిమా ఇది.
నాని
హీరో నాని ఎక్కువగా కొత్త డైరెక్టర్లను ప్రోత్సహిస్తుంటారు. ప్రస్తుతం ఈ హీరో సరిపోదా శనివారం అంటూ వివేక్ ఆత్రేయతో సినిమా చేస్తున్నారు. గ్యాంగ్ లీడర్ బ్యూటీ ప్రియాంక మోహన్ ఇందులో హీరోయిన్. అయితే రిపీట్ కాంబో సినిమా ఏంటి అనే విషయానికి వస్తే…అంటే సుందరానికి ఫ్లాపైనా కూడా వివేక్ టేకింగ్ నచ్చి ఆయనకు మరో ఛాన్స్ ఇచ్చారు నాని. మరి ముందు సినిమా ఫ్లాప్ అయింది.. ఈ సారి అయినా హిట్ అవ్వాలని కోరుకుంటున్నారు నాని అభిమానులు. ఈ సారి గనుక కాస్త నెగటివ్ టాక్ ను సంపాదిస్తే.. ఇక జీవితంలో నాని వివేక్ తో సినిమా చేయరు కావచ్చు..
మహేష్ బాబు..
మహేష్ బాబు, మాటల మాంత్రికుడు త్రివిక్రమ్ ఇద్దరు మూడో సారి కలిసి పని చేస్తున్నారు. అతడు, ఖలేజా ఆశించిన స్థాయిలో ఆడకపోయినా.. ఈ కాంబినేషన్లో వస్తున్న గుంటూరు కారం సినిమాపై భారీ అంచనాలు ఉన్నాయి. ఇక అల్లు అర్జున్తో త్వరలోనే 4వ సినిమా చేయబోతున్నారు గురూజీ. ఇలా మొత్తానికిప్పుడు రిపీట్ కాంబినేషన్స్ టైమ్ నడుస్తుంది. మరి ఇందులో హిట్ లు అందుకొని మరో సినిమా కోసం ఎవరు ప్లాన్ చేస్తారో? ఎవరు ఇక జీవితంలో కలిసి పనిచేయరో చూడాలి.
