Akhanda: నటసింహం నందమూరి బాలకృష్ణ హీరోగా బోయపాటి దర్శకత్వంలో తెరకెక్కిన సినిమా అఖండ. డిసెంబరు 2న ప్రపంచవ్యాప్తంగా విడుదలైన ఈ సినిమా అఖండ విజయాన్ని అందుకుని.. ప్రేక్షకుల మన్ననలను అందుకుంటోంది. థియేటర్లలో బాలయ్య స్టైల్ చూసి అభిమానులకు పూనకాలు వస్తున్నాయి. ఎక్కడ అరవాలో కూడా తెలియనంతగా.. ఎలివేషన్స్ అదిరిపోయాయని అంటున్నారు. దీంతో వీరిద్దరి కాంబినేషన్లో హ్యాట్రిక్ సినిమా వచ్చినట్లైంది.
అయితే, ఈ సినిమాను పలు చోట్ల నిలిపేయాల్సి వచ్చింది. ఏపీలో ఆంక్షలు ఉన్న నేపథ్యంలో బెనిఫిట్ షోలు నిలిపేసిన సంగతి తెలిసిందే. అయితే, కొన్ని థియేటర్లు మాత్రం ప్రభుత్వ ఆదేశాలను పట్టించుకోవడం లేదు. దీంతో ప్రభుత్వ ఆదేశాలు పాటించని థియేటర్లపై రెవెన్యూశాఖ చర్యలు తీసుకుంది. తాడేపల్లిలో నిబంధనలకు విరుద్ధంగా బెనిఫిట్ షోలు వేసిన రామకృష్ణ సినిమా థియేటర్ను రెవెన్యూ అధికారులు సీజ్ చేశారు. రెండు స్క్రీన్స్లో రూల్స్ బ్రేక్ చేసిన ఓ స్క్రీన్పై ఈ చర్యలు తీసుకున్నట్లు అధికారులు తెలిపారు. మరో స్క్రీన్ యథాతథంగా సాగుతుందని అధికారులు స్పష్టం చేశారు. కాగా, రోజుకు నాలుకు షోలకు మాత్రమే ప్రస్తుతం అనుమతి ఉందని వెల్లడించారు.
కాగా, ఈ సినిమాలో బాలయ్య రెండు విభిన్న పాత్రలు పోషించిన సంగతి తెలిసిందే. ఇందులో ప్రగ్యా జైస్వాల్ హీరోయిన్గా నటించింది. థమన్ స్వరాలు అందించారు. జగపతి బాబు, శ్రీకాంత్ కీలకపాత్రల్లో పోషించారు. మరోవైపు ఈ సినిమా తర్వాత అనిల్ రావిపూడితో కలిసి ఓ సినిమా తీయనున్నారు బాలయ్య. ఇందులో శ్రుతిహాసన్ హీరోయిన్గా కనిపించనుంది. ఇప్పటికే ఈ సినిమా షూటింగ్ లాంఛనంగా ప్రారంభమైంది.
