సిద్ధూ జొన్నలగడ్డ…టాలెంట్ ఉన్నా.. పెద్దగా పేరు సంపాదించుకోలేకపోయిన యంగ్ హీరో. నటనా జీవితాన్ని మొదలుపెట్టి.. దశాబ్దం దాటుతున్నా, హీరోగా మార్కెట్ క్రియేట్ చేసుకోలేకపోయాడు. కానీ, ఇటీవలే “కృష్ణ అండ్ హిస్ లీల” చిత్రంతో మనోడి టైం మొదలైనట్లు ఉంది. ఆ సినిమాకి అద్భుతమైన టాక్ ఏమి రాకపోయినా సిద్ధూకి మాత్రం వరుస సినిమాలు వస్తున్నాయి. “కృష్ణ అండ్ హిస్ లీల”తో మరోసారి తానేంటో ప్రూవ్ చేసుకున్న ఈ టాలెంటెడ్ హీరోకి ఇప్పుడు ఓ భారీ సంస్థ పిలిచి మరీ సినిమా ఇవ్వడం ఆసక్తిని రేకెత్తిస్తోంది. ఇప్పటికే ఎన్నో చిత్రాల్లో కనిపించిన ఈ యువ నటుడికి గతంలో ఎప్పుడూ ఇలాంటి పెద్ద అవకాశం రాలేదు. ప్రముఖ నిర్మాణ సంస్థ సితార ఎంటర్టైన్మెంట్స్ లో ఓ క్రేజీ సినిమా చేయబోతున్నాడు.
Also Read: దడపుట్టించిన ‘లక్ష్మీబాంబ్’ ట్రైలర్.. అదరగొట్టిన అక్షయ్..!
కాగా తాజాగా ఈ ప్రాజెక్ట్ కు సంబంధించిన టైటిల్ అండ్ కాన్సెప్ట్ పోస్టర్ ను చిత్ర యూనిట్ అధికారికంగా విడుదల చేసింది. నూతన దర్శకుడు విమల్ కృష్ణ ఈ చిత్రాన్ని క్రైమ్ కామెడీ థ్రిల్లర్ గా ప్లాన్ చేస్తున్నాడట. విమల్ కృష్ణకి గతంలోనే నాని సినిమా ఛాన్స్ ఇచ్చాడని, కానీ కొన్ని కారణాల వల్ల ఆ సినిమా సెట్స్ పైకి వెళ్లలేదు అని.. ఇన్నాళ్లు తరువాత సిద్ధూ హీరోగా ఈ సినిమా ఇప్పుడు మొదలవుతుందని తెలుస్తోంది. కాగా ఈ చిత్రానికి “నరుడి బ్రతుకు నటన” అనే ఆసక్తికర టైటిల్ ను పెట్టడం మాత్రం అందర్నీ ఆకట్టుకుంటుంది. పైగా ఇంతకుముందే సిద్ధూతో హీరోయిన్ గా చేసిన శ్రద్దా శ్రీనాథ్ నే మరోసారి సిద్ధూతో ఈ సినిమాలో కలిసి నటించబోతుంది. మొత్తానికి ఈ చిత్రం పేరు, లోగో సినిమా పై ఉత్సుకతను పెంచుతున్నాయి.
Also Read: ఆర్జీవీ ‘మిస్సింగ్’ గోడు ఎవరికీ పట్టడం లేదా?
ఇక చిత్రబృందం వదిలిన ప్రచార చిత్రాన్ని నిశితంగా గమనిస్తే.. సంగీతం ప్రధానాంశంగా ఈ సినిమా నేపథ్యం సాగుతున్నట్లు అనిపిస్తుంది. మేకర్స్ పోస్టర్ లో హెడ్ ఫోన్స్, హృదయం రూపంలో ఓ జంట లోకాన్ని మైమరచి ఒకరి కోసం ఒకరు అన్నట్లుగా ఉండటం ఆసక్తిని పెంచింది. సహజంగా హార్ట్ సింబల్ రెడ్ కలర్ లో ఉంటుంది కానీ ఈ పోస్టర్ లో మాత్రం బ్లూ కలర్ లో పెట్టారు. అదేమిటో తెలియాలంటే మరికొంత కాలం ఆగాల్సిందే. యంగ్ టాలెంట్ కాల భైరవ సంగీతం అందిస్తుండగా సూర్య దేవర నాగవంశీ నిర్మాణం వహిస్తున్నారు. ఈ దీపావళి నుంచి ఈ సినిమా షూటింగ్ ప్రారంభించనున్నారు. ఇక ఈ సినిమాకి దర్శకుడు విమల్ కృష్ణతో పాటు హీరో సిద్ధూ కూడా రచయితగా పని చేస్తున్నాడు.
