Peddanna: సూపర్స్టార్ రజనికాంత్ హీరోగా సిరత్తై శివ దర్శకత్వంలో తెరకెక్కిన సినిమా అన్నాత్తై. తెలుగులో పెద్దన్న పేరుతో విడుదల చేసింది చిత్రబృందం. దీపావళి కానుగా ప్రేక్షకులను పలకరించిన ఈ సినిమా బాక్సాఫీసును బద్దలు కొడుతోంది. ఒక్క ఇండియాలోనే కాకుండా, ప్రపంచ వ్యాప్తంగా భారీ వసూళ్లు సాధిస్తోంది. మరోవైపు, తమిళనాడును వరదలు ముంచెత్తిన సంగతి తెలిసిందే. అయినప్పటికీ పెద్దన జోరు మాత్రం అసలు తగ్గడం లేదు. గురువారం నాటికి ఈ సినిమా ప్రపంచవ్యాప్తంగా రూ.225 కోట్లు మార్క్ను దాటేసినట్లు దర్శకనిర్మాతలు తెలిపారు. ఈ వారం చివరనాటికి రూ.250కోట్లు మార్క్ను అధిగమించే అవకాశం ఉందని ట్రేడ్ రిపోర్ట్స్ సూచిస్తున్నాయి.
దీపావళి నవంబరు 4న ప్రపంచవ్యాప్తంగా 1,000 స్క్రీన్స్లో విడుదలైంది అన్నాత్తై. సినిమా విడుదలైన తొలిరెండ్రోజులు ప్రతికూల స్పందన లభించింది. అయితే, మెల్లగా ఫ్యామిలీ ఆడియన్స్ పెద్దన్న సినిమాకు కనెక్ట్ అయ్యారు. దీంతో, వరుసగా రజనీ సినిమాకు క్యూ కట్టడం ప్రారంభించారు. విడుదలైనప్పటి నుంచి ఒక్క తమిళనాడులోనే రూ.150కోట్లకు పైగా వసూళ్లు సాధించింది. ఈ సినిమాలో రజనికాంత్ హీరో కాగా, కీర్తి సురేశ్ రజనీ చెల్లెలుగా నటించింది. ఇక మీనా, ఖుష్బు, ప్రకాశ్ రాజ్, సూరి, అభిమన్యు సింగ్, జగపతిబాబు సినిమాలో కీలకపాత్రలు పోషించారు. డి ఇమ్మాన్ ఈ సినిమాకు సంగీతం అందించారు.
రోబో తర్వాత పెద్దగా హిట్ అందుకోని రజనీ.. ఈ సినిమాతో కాస్త ఫర్వాలేదనిపించినట్లు తెలుస్తోంది. అయితే, రోబో2.0 సినిమా రజనీకి పెద్ద దెబ్బ వేసినట్లు తెలుస్తోంది. ఆ తర్వాత వచ్చిన పెటా, దర్బార్ వంటి సూపర్ హిట్ సినిమాలు కూడా ప్రేక్షకులను ఆకట్టుకోలేకపోయాయి. అయితే, పెద్దన్నగా రజనీ సత్తా చాటాడనే చెప్పాలి.
