Bigg Boss Telugu 8: బుల్లితెర పై మోస్ట్ సక్సెస్ ఫుల్ రియాలిటీ షో బిగ్ బాస్. తెలుగు లో 2017లో ప్రారంభమైన బిగ్ బాస్ ఏడు సీజన్లను పూర్తి చేసుకుంది. తాజాగా సీజన్ 8 కోసం రంగం సిద్ధమవుతుంది. ఇప్పటికే ఇందుకు సంబంధించిన అన్ని పనులు శరవేగంగా జరుగుతున్నాయి. కంటెస్టెంట్ల ఎంపిక సైతం పూర్తయిందని వార్తలు వినిపిస్తున్నాయి. సినీ, సీరియల్ నటీనటులు, సోషల్ మీడియా స్టార్స్ ఇలా వివిధ రంగాల సెలెబ్రెటీలను బిగ్ బాస్ టీం సంప్రదించారట.
ఇక అనుకున్న దానికంటే ముందే సీజన్ 8 ప్రారంభం కానుందని సమాచారం. ఆగష్టు 4 లేదా 11వ తారీకుల్లో సీజన్ 8 లాంచింగ్ ఎపిసోడ్ ప్రసారం అవుతుందని తెలుస్తుంది. త్వరలోనే బిగ్ బాస్ 8 కి సంబంధించిన అఫీషియల్ అనౌన్సమెంట్ కూడా రానుంది అని సమాచారం. ఈసారి హౌస్ లోకి వచ్చే కంటెస్టెంట్లు వీళ్లే అంటూ కొందరి పేర్లు సోషల్ మీడియాలో వైరల్ అవుతున్నాయి. ఆ లిస్ట్ లో ఎవరూ ఊహించని పేరు ఒకటి వినిపిస్తుంది.
గత సీజన్ మాదిరిగానే ఈసారి కూడా సుమారు 19 లేదా 20 మంది సెలెబ్రెటీలను లోపలికి పంపిస్తారట. వీరిలో నటి హేమ, బర్రెలక్క, కిరాక్ ఆర్పీ, సురేఖ వాణి, హీరో రాజ్ తరుణ్, యాంకర్ రీతూ చౌదరి, కుమారీ ఆంటీ, యూట్యూబర్ బంచిక్ బబ్లు,సోనియా సింగ్, నేత్ర వంటి వారి పేర్లు ప్రధానంగా వినిపిస్తున్నాయి. అయితే వారితో పాటు అప్పట్లో పరువు హత్య ఉదంతంలో వార్తలకు ఎక్కిన అమృత ప్రణయ్ కూడా హౌస్ లోకి ఎంట్రీ ఇవ్వనుందని ఇండస్ట్రీ వర్గాల టాక్.
అలాగే వేణు స్వామి సైతం ఎంట్రీ ఇస్తున్నారట. సెలెబ్రిటీల జాతకాలు బహిరంగంగా చెబుతూ వేణు స్వామి పాపులర్ అయ్యాడు. అతడిని టాప్ హీరోయిన్స్ సైతం అనుసరిస్తారు. ప్రత్యేక పూజలు జరిపిస్తారు. వేణు స్వామికి పెద్ద మొత్తంలో రెమ్యూనరేషన్ ఇచ్చి బిగ్ బాస్ హౌస్ కి తీసుకొస్తున్నారని కథనాలు వెలువడుతున్నాయి. ఈ వార్తల్లో నిజం ఎంత ఉందో తెలియాల్సి ఉంది. ఫుల్ క్లారిటీ రావాలంటే లాంచింగ్ ఎపిసోడ్ వరకు ఎదురు చూడాలి. ఇక సీజన్ 8 కి కూడా కింగ్ నాగార్జున హోస్ట్ గా కొనసాగుతున్నారు.
