దేశంలో లక్షల సంఖ్యలో ఉద్యోగులు కరోనా విజృంభణ వల్ల గతేడాది ఉద్యోగాలను కోల్పోయిన సంగతి తెలిసిందే. కొత్త ఉద్యోగాల కోసం ఎదురు చూస్తున్న వారికి స్టాఫ్ సెల‌క్ష‌న్ క‌మిష‌న్ శుభవార్త చెప్పింది. మల్టీ టాస్కింగ్ (నాన్-టెక్నికల్) స్టాఫ్ ఉద్యోగ ఖాళీల భర్తీ కోసం నోటిఫికేషన్ విడుదల చేసింది. గతేడాది 9,069 ఉద్యోగ ఖాళీల భర్తీ జరగగా ఈ సంవత్సరం అంతకంటే ఎక్కువ ఉద్యోగ ఖాళీల భర్తీ జరగనుందని సమాచారం అందుతోంది.
ఇప్పటికే ఈ ఉద్యోగాలకు దరఖాస్తు ప్రక్రియ ప్రారంభం కాగా మార్చి 21వ తేదీ ఉద్యోగాలకు దరఖాస్తు చేయడానికి చివరి తేదీగా ఉంది. ఆన్ లైన్ ద్వారా మాత్రమే ఈ ఉద్యోగాలకు దరఖాస్తు చేసుకునే అవకాశం ఉంటుంది. ఆన్ లైన్ లో ఫీజు చెల్లించడానికి మార్చి 23వ తేదీ చివరి తేదీగా ఉంది. చలానా ద్వారా ఫీజు చెల్లించడానికి 2021 సంవత్సరం మార్చి 29 చివరి తేదీగా ఉంది. https://ssc.nic.in/ వెబ్ సైట్ ద్వారా ఈ ఉద్యోగాలకు సంబంధించిన పూర్తి వివరాలను తెలుసుకోవచ్చు.
కంప్యూటర్ బేస్డ్ ఎగ్జామినేష‌న్ (టైర్‌-1) 2021 సంవత్సరం జులై నెల 1వ తేదీ నుంచి 2021 సంవత్సరం జులై 20వ తేదీ వరకు జరగనుండగా టైర్‌-2 ప‌రీక్ష తేది (డిస్క్రిప్టివ్ పేపర్) 2021 సంవత్సరం నవంబర్ నెలలో జరగనుంది. గుర్తింపు పొందిన బోర్డు నుంచి పదో తరగతి పాసైన వాళ్లు ఈ ఉద్యోగాల కొరకు దరఖాస్తు చేసుకోవచ్చు. ఉద్యోగ ఖాళీలను బట్టి 18 – 27 సంవత్సరాల మధ్య వయస్సులో ఉన్నవాళ్లు ఈ ఉద్యోగాల కోసం దరఖాస్తు చేసుకోవచ్చు.
ఎస్సీ, ఎస్టీ, ఓబీసీలకు వయో సడలింపులు ఉంటాయి. కంప్యూటర్ బేస్డ్ రాత ప‌రీక్ష (పేపర్-1, పేపర్-2) ఆధారంగా ఈ ఉద్యోగాలకు ఎంపిక ప్రక్రియ ఉంటుంది. కేంద్ర ప్రభుత్వ ఉద్యోగాలు కావడంతో ఈ ఉద్యోగాలకు పోటీ ఎక్కువగా ఉంటుందని చెప్పవచ్చు.