ఆంధ్రప్రదేశ్‌ లో తొలి కరోనా కేసు నెల్లూరులో నమోదు కాగా రెండో కరోనా పాజిటివ్ కేసు ఒంగోలులో నమోదైంది. ఒంగోలు ప్రభుత్వాస్పత్రిలోని ఐసోలేషన్‌ వార్డులో చికిత్స పొందుతున్న ఒక వ్యక్తికి వైరస్‌ సోకినట్లు నిర్ధారణ అయింది. దీంతో ఇప్పటి వరకూ రాష్ట్రంలో నమోదైన పాజిటివ్ కేసుల సంఖ్య రెండుకు చేరింది.
ఈనెల (మార్చి) 12న లండన్‌ నుంచి ఒంగోలుకు వచ్చిన ఒక వ్యక్తికి జలుబు, దగ్గు, జ్వరం ఉండటంతో కరోనా అనుమానంతో జిల్లా ప్రభుత్వాస్పత్రిలో చేశారు. వెంటనే శాంపిల్స్‌ తీసుకున్న వైద్యులు తిరుపతిలోని వైరాలజీ ల్యాబ్‌ కు పంపించారు. నిన్న రాత్రి వచ్చిన రిపోర్టుల్లో ఆయనకు పాజిటివ్ వచ్చింది.
బాధితుడి వివరాలను అధికారులు గోప్యంగా ఉంచారు. రాష్ట్రంలో మరో పాజిటివ్ కేసు నమోదవడంతో అప్రమత్తమైన ఆరోగ్యశాఖ అధికారులు ఒంగోలు ప్రభుత్వాస్పత్రి వైద్యులను అలర్ట్‌ చేశారు. భాధితున్ని ప్రభుత్వాస్పత్రిలోని ఐసోలేషన్‌ లో చికిత్స అందిస్తున్నారు.
రాష్ట్రంలో ఇప్పటివరకూ 105 మంది శాంపిల్స్‌ పరిశీలించగా 96 నెగిటివ్‌ రిపోర్టులు వచ్చాయి. రెండు పాజిటివ్ రాగా, మరో ఏడుగురి రిపోర్టు రావాల్సి ఉంది. శుక్రవారం సాయంత్రానికి మిగిలిన కేసులకు సంబంధించిన రిపోర్టులు రానున్నాయి.
ప్రపంచ వ్యాప్తంగా 2లక్షలకు పైగా కరోనా కేసులు నమోదు అయ్యాయి. భారత్ లో ఈ కేసుల సంఖ్య 175 చేరగా అందులో ముగ్గురు చనిపోయారు.