Maruti Gypsy: మీరు మీ పాత పెట్రోల్ లేదా డీజిల్ కారును ఎలక్ట్రిక్గా మార్చాలని ఆలోచిస్తున్నారా..ఇది మీ ఫ్యూయెల్ ఖర్చులను తగ్గించడమే కాకుండా పర్యావరణాన్ని కూడా కాపాడుతుంది. కానీ, కేవలం 4 లక్షలకు కొన్న పాత మారుతి జిప్సీ మీ ఆదాయాన్ని రెట్టింపు చేస్తే ఎలా ఉంటుంది? మహారాష్ట్రలో సరిగ్గా ఓ వ్యక్తి ఇలాగే చేసి చూపించాడు.
Also Read: ఐపీఎల్ లో ప్లే ఆఫ్ వెళ్లే జట్లు ఇవే.. పది టీమ్ లకు అవకాశాలు ఎలా ఉన్నాయంటే..
మారుతి జిప్సీ ఒకప్పుడు అత్యుత్తమ ఆల్-వీల్ డ్రైవ్ వాహనాలలో ఒకటి. మహారాష్ట్రలోని తడోబా-అంధారి టైగర్ రిజర్వ్లో పనిచేసే ఒక యువకుడు కేవలం 4 లక్షల రూపాయలకు పాత మారుతి జిప్సీని కొనుగోలు చేశాడు. ఆ తర్వాత దానిని ఎలక్ట్రిక్గా మార్చాడు. ఇప్పుడు అది అతని ఆదాయాన్ని రెట్టింపు చేస్తోంది. ఇది ఎలా సాధ్యమైందో ఈ కథనంలో తెలుసుకుందాం.
సాహిల్ బేగ్ అనే ప్రకృతి ప్రేమికుడు ఆర్మీకి చెందిన పాత వాహనాల వేలంలో మారుతి జిప్సీని కొనుగోలు చేశాడు. 4 లక్షలకు కొన్న ఈ కారును 4 ఏళ్లు ఉపయోగించిన తర్వాత 2023లో పాత కారు ఎక్కువగా శబ్దం చేయడం కారణంగా దానిని ఎలక్ట్రిక్గా మార్చాలని నిర్ణయించుకున్నాడు. అతను టూరిస్టులను జంగిల్ సఫారీకి తీసుకెళ్లేటప్పుడు కొన్నిసార్లు మంచి ఫోటోలు ఆ శబ్దం వల్ల చెడిపోయేవి.
పెట్రోల్ వాహనంలో ఎలక్ట్రిక్ పవర్ట్రెయిన్ను అమర్చడానికి 9 లక్షల రూపాయలు ఖర్చయ్యాయి. ఇందులో కారును ఢిల్లీకి తీసుకెళ్లడం, తిరిగి మహారాష్ట్రకు తీసుకురావడం వంటి ఖర్చులు కూడా ఉన్నాయి. అతని ప్రయత్నాన్ని చూసిన అటవీ శాఖ అతనికి 4.5 లక్షల రూపాయల రుణం కూడా ఇచ్చింది. అతను ఢిల్లీలో ఈ కారును ఎలక్ట్రిక్గా మార్చి దానితో సఫారీలు నిర్వహించడం ప్రారంభించాడు.
సాహిల్ బేగ్కు తన జిప్సీని ఎలక్ట్రిక్గా మార్చడం వల్ల కలిగిన ప్రయోజనం ఏమిటంటే.. సాధారణంగా ఇతర డ్రైవర్లకు జంగిల్ సఫారీ కోసం ఒక రౌండ్ మాత్రమే అనుమతి ఉంటుంది. కానీ ఎలక్ట్రిక్ జిప్సీ నిశ్శబ్దంగా వెళ్లడం వల్ల 2 రౌండ్లు వేయడానికి అనుమతి లభించింది. దీంతో అటవీ శాఖ ఒకే వాహనం నుండి ఆదాయం రెట్టింపు అయింది.
జిప్సీని ఎలక్ట్రిక్గా మార్చడం వల్ల మరో ప్రయోజనం కూడా ఉంది. అది నిశ్శబ్దంగా ఉండటం వల్ల అడవి జంతువుల మధ్యకు సులభంగా వెళ్లవచ్చు. దాని వల్ల అడవి జంతువులు భయపడవు. పులులు, జింకలు, చిరుతలను పర్యాటకులు చాలా దగ్గరగా చూడగలుగుతున్నారు. సాహిల్ బేగ్ ఈ విజయాన్ని చూసిన టైగర్ రిజర్వ్ అడ్మినిస్ట్రేషన్ అక్కడ తిరిగే ఇతర వాహనాలను కూడా ఎలక్ట్రిక్గా మార్చడానికి దృష్టి సారిస్తోంది.
సాహిల్ బేగ్ మాట్లాడుతూ.. అతను ఒక నెలలో 52 సఫారీలు పూర్తి చేస్తానని తెలిపాడు. దీని ద్వారా అతని రోజువారీ ఆదాయం 5,400 రూపాయల వరకు ఉంటుంది. ఈ విధంగా అతను కారును ఎలక్ట్రిక్గా మార్చడానికి అయిన ఖర్చును ఇప్పటికే సంపాదించాడు. విద్యుత్ ఖర్చు తీసివేసిన తర్వాత కూడా అతను ప్రతిరోజూ 4,000 నుండి 5,000 రూపాయలు ఆదా చేస్తున్నాడు.
Also Read: కేఎల్ రాహుల్ కాంతారా స్టెప్ వేసి టీజ్ చేసిన కోహ్లీ: వీడియో వైరల్
