Honda ZR-V India Launch: ప్రీమికం కార్ల కోసం ఎదురుచూసేవారి సంఖ్య పెరిగిపోతుంది. ఒకప్పుడు చిన్న కారు ఉంటే చాలనుకున్నవారు.. ఇప్పుడు లగ్జరీ కార్లలో తిరగాలని కోరుకుంటున్నారు. ఇలాంటి వారి కోసం కొన్ని కంపెనీలో ప్రత్యేకంగా మార్కెట్లోకి కొత్త మోడల్స్ తీసుకువస్తున్నాయి. ఇందులో భాగంగా Honda సంస్థ నుంచి భారత ఆటోమోబైల్ మార్కెట్లోకి ‘హోండా ZR-V’అడుగుపెట్టబోతోంది. ఇప్పటికే అంతర్జాతీయ మార్కెట్లలో మంచి విజయాన్ని అందుకున్న ఈ కారు, ఇప్పుడు ఇండియాలో తన అదృష్టాన్ని పరీక్షించుకోవడానికి సిద్ధమైంది. ఈ కారుకు సంబంధించిన ఇంజిన్, ఫీచర్లు లాంచింగ్ తేదీ తెలుసుకోవాలంటే ఈ కిందికి వెళ్లండి..
హైబ్రిడ్ ఇంజిన్:
హోండా ZR-V ప్రధానంగా పవర్ట్రెయిన్ ద్వారా ఆకట్టుకోనుంది. ఇందులో 2.0 లీటర్ల పెట్రోల్ ఇంజిన్ను ఉపయోగించారు. ఇది రెండు ఎలక్ట్రిక్ మోటార్లతో స్ట్రాంగ్ హైబ్రిడ్ సిస్టమ్తో పనిచేస్తుంది. ఈ ఇంజిన్ సుమారు 181 hp శక్తిని, 315 Nm టార్క్ను ఉత్పత్తి చేస్తుంది. ఈ హైబ్రిడ్ సాంకేతికతతో ఇది అద్భుతమైన మైలేజీని ఇస్తుంది. ఒక్కసారి ఫుల్ ట్యాంక్ చేస్తే దాదాపు 1000 కిలోమీటర్ల దూరం ప్రయాణించవచ్చని అంచనా.
అత్యాధునిక ఫీచర్లు:
ఈ SUV ఇంటీరియర్ చాలా ప్రీమియంగా ఉంటుంది. ఇందులో 10.25-అంగుళాల డిజిటల్ డ్రైవర్ డిస్ప్లే, 9 అంగుళాల ఫ్రీస్టాండింగ్ టచ్స్క్రీన్ ఇన్ఫోటైన్మెంట్ సిస్టమ్ ఉన్నాయి. వైర్లెస్ ఆండ్రాయిడ్ ఆటో, ఆపిల్ కార్ప్లే, 12-స్పీకర్ల బోస్ (Bose) ప్రీమియం ఆడియో సిస్టమ్, పనోరమిక్ సన్రూఫ్, వైర్లెస్ ఛార్జింగ్ వంటి హంగులు దీని సొంతం. భద్రత పరంగా హోండా సెన్సింగ్ (ADAS) టెక్నాలజీతో పాటు మల్టిపుల్ ఎయిర్బ్యాగ్స్, 360-డిగ్రీ కెమెరా వంటి ఫీచర్లు డ్రైవింగ్ను మరింత సురక్షితం చేస్తాయి.
డిజైన్:
డిజైన్ పరంగా ఇది సాంప్రదాయ SUVల వలె కాకుండా, స్పోర్టీ క్రాస్ఓవర్ లుక్ను కలిగి ఉంటుంది. ముందు భాగంలో హనీకోంబ్ గ్రిల్, స్లీక్ LED హెడ్ల్యాంప్స్ కనిపిస్తాయి. వాలుగా ఉండే రూఫ్లైన్ దీనికి ఆధునిక రూపాన్ని ఇస్తాయి. ఇది హోండా సివిక్ ప్లాట్ఫారమ్పై ఆధారపడి రూపొందించబడటంతో, రోడ్డుపై చాలా స్థిరంగా మరియు స్టైలిష్గా కనిపిస్తుంది.
భారత్లో విడుదల ఎప్పుడు?
తాజా సమాచారం ప్రకారం.. హోండా ZR-Vని 2026 మే 22న భారత మార్కెట్లో అధికారికంగా విడుదల చేసే అవకాశం ఉంది. ఇది విదేశాల నుంచి నేరుగా దిగుమతి చేసుకునే (CBU) మోడల్గా రానుంది. దీని ధర సుమారు రూ. 40 లక్షల నుంచి రూ. 50 లక్షల (ఎక్స్-షోరూమ్) మధ్య ఉండవచ్చని అంచనా. ఇది మార్కెట్లోకి వస్తే వోక్స్వ్యాగన్ టిగువాన్, స్కోడా కొడియాక్ వంటి కార్లకు గట్టి పోటీ ఇవ్వనుంది.
