Vaibhav Suryavanshi: నిజమే ఇలాంటి పరిస్థితి ఎదురవుతుందని వైభవ్ సూర్య వంశీ కనీసం కలలో కూడా ఊహించి ఉండడు.. తన పట్ల సోషల్ మీడియాలో ఈ స్థాయిలో నెగిటివ్ ప్రచారం జరుగుతుందని అంచనా వేసి ఉండడు. నిన్నటిదాకా తనమీద పూలు చల్లిన అభిమానులు ఇలా రాళ్లు కూడా వేస్తారని భావించి ఉండడు. కానీ ఇప్పుడు తలచుకొని బాధపడడం తప్ప వైభవ్ సూర్య వంశీ చేసేదేమీ లేదు.
ఐరిష్ సిరీస్ కోసం వైభవ్ సూర్య వంశీని ఎంపిక చేశారు. అతడు మైదానంలోకి దిగే అవకాశం రాలేదు. దీనికి తోడు ఆ సిరీస్ టీమిండియా కోల్పోయింది. ఆ తర్వాత సూర్య వంశీకి ఇంగ్లాండ్ సిరీస్లో ఆడే అవకాశం వచ్చింది. గతంలో అతడు అండర్ 19 వరల్డ్ కప్ జరిగినప్పుడు ఇంగ్లాండ్ గడ్డమీద ఆడాడు. ఇంగ్లాండ్ జట్టుపై సూపర్ ఇన్నింగ్స్ ఆడాడు. ఇంగ్లాండ్ సిరీస్లో ఇప్పుడు కూడా సూర్య వంశీ అదరగొడతాడని.. దుమ్ము రేపు తాడని సగటు అభిమాని ఆశించాడు. కానీ అది సాకారం కాలేదు. పైగా సూర్యవంశీ ఆటతీరు ఏమాత్రం ఆశాజనకంగా లేదు.
పదేపదే షార్ట్ పిచ్ బంతులు ఎదుర్కోలేక ఇబ్బంది పడ్డాడు. ఒక సిక్సర్ లేదా ఫోర్ కొట్టి ఊపు తీసుకురావడం.. ఆ తర్వాత అవుట్ కావడం.. ఇలా సాగిపోయింది సూర్య వంశీ ఆట తీరు.. అసలు అలా ఎందుకు ఆడుతున్నాడు.. అలా ఎందుకు అవుట్ అవుతున్నాడు.. బ్యాటింగ్లో ఏమాత్రం మార్పు లేదు.. బంతులను ఎదుర్కొనే విధానంలో కొత్త తీరు కనిపించడం లేదు. ఇలా అయితే ఎలా అంటూ సోషల్ మీడియాలో విమర్శలు వినిపిస్తున్నాయి.
సూర్య వంశీ ఐపీఎల్ లో అదరగొట్టాడు. ఆకాశమే హద్దుగా చెలరేగిపోయాడు. ఇటీవల ట్రై సిరీస్ లో కూడా ఫైనల్ మ్యాచ్లో శ్రీలంకపై అద్భుతమైన ఇన్నింగ్స్ ఆడాడు. దీంతో అతడి దూకుడు మామూలుగా ఉండదని.. అతడు టీమిండియాలోకి వస్తే రికార్డులు మొత్తం బ్రేక్ అవుతాయని అందరు అనుకున్నారు. కానీ అతడు ఆశించిన స్థాయిలో ఆట తీరు కొనసాగించడం లేదు. ఐపీఎల్ మాదిరిగా పరుగుల ప్రవాహాన్ని సృష్టించడం లేదు. ఇలా వస్తున్నాడు.. అలా వెళ్ళిపోతున్నాడు. కాకపోతే ఒక ఫోర్ లేదా సిక్సర్ కొట్టి.. అభిమానుల్లో ఉత్సాహాన్ని నింపుతున్నాడు. ఆ తర్వాత పేలని చిచ్చుబుడ్డి మాదిరిగా.. కాంతి విహీనంగా మారిపోతున్నాడు.
మొన్నటిదాకా అతని నామస్మరణ చేసింది సోషల్ మీడియా. అతడు అడుగుపెడితే మాస్.. బంతిని గట్టిగా కొడితే మాస్.. సిక్సర్ కొడితే మాస్ అన్నట్టుగా ఉపమానాలు రూపొందించింది. కానీ ఇప్పుడు అతని పరిస్థితి బై బై వైభవ్ సూర్యవంశీ.. కేవలం నువ్వు ప్లాట్ మైదానాల మీద మాత్రమే ఆడతావు.. బౌన్సీ మైదానాల మీద ఆడే సత్తా నీకు లేదు అంటూ సోషల్ మీడియాలో అభిమానులు విమర్శలు వ్యక్తం చేస్తున్నారు. మరి ఈ విమర్శలకు సూర్య వంశీ ఎలాంటి సమాధానం చెప్పాడు.. ఐదో టి20 మ్యాచ్ లో తన సత్తా చూపిస్తాడా.. లేకుంటే తన దూకుడు పాలపొంగు అని సరిపెట్టుకుంటాడా.. ఈ ప్రశ్నలకు కాలమే సమాధానం చెప్పాలి.
