Apple Foldable iPhone: యాపిల్ ప్రేమికులకు ఇది నిజంగానే ఒక అద్భుతమైన వార్త. టెక్ దిగ్గజం యాపిల్ తన మొట్టమొదటి ఫోల్డబుల్ ఐఫోన్ (Foldable iPhone) ను మార్కెట్లోకి తీసుకురావడానికి సర్వసిద్ధం అవుతోంది. ఇప్పటివరకు ఆండ్రాయిడ్ మార్కెట్లో శాంసంగ్, వన్ప్లస్, గూగుల్ వంటి సంస్థలు ఫోల్డబుల్ ఫోన్ల విభాగంలో దూసుకుపోతుండగా.. ఇప్పుడు యాపిల్ కూడా ఆ రేసులోకి అధికారికంగా అడుగుపెట్టబోతోంది. ఈ మేరకు కంపెనీ తన సప్లయర్లకు కీలక ఆదేశాలు జారీ చేసినట్లు మార్కెట్ వర్గాల సమాచారం. అదేంటంటే… ఇప్పటి వరకు ఈ ఫోల్డబుల్ ఫోన్లు కోటి వరకు ఆర్డర్ వచ్చాయి.. ఈ వివరాల్లోకి వెళితె..
యాపిల్ తన తొలి ఫోల్డబుల్ ఐఫోన్ను ఈ ఏడాదే మార్కెట్లోకి తీసుకురావడానికి సన్నాహాలు ముమ్మరం చేస్తున్నట్లు తాజా సమాచారం. మొదటి ఫోల్డబుల్ మోడల్ను ‘iPhone Fold’ లేదా ‘iPhone Ultra’ పేరుతో విడుదల చేసే అవకాశం ఉందని టెక్ వర్గాల సమాచారం. అయితే తన మొదటి ఫోల్డబుల్ ఐఫోన్ కోసం యాపిల్ పెద్ద ఎత్తున తయారీ లక్ష్యాన్ని పెట్టుకున్నట్లు తెలుస్తోంది. మొదటి దశలోనే ఏకంగా 1 కోటి (10 మిలియన్) ఫోల్డబుల్ ఫోన్లను ఉత్పత్తి చేసేందుకు సిద్ధంగా ఉండాలని యాపిల్ తన సప్లై చైన్ భాగస్వాములకు సూచించినట్లు తెలుస్తోంది.
సాధారణంగా ఏ కంపెనీ అయినా తమ సరికొత్త డిజైన్ ఫోన్లను తక్కువ సంఖ్యలో ప్రయోగాత్మకంగా విడుదల చేస్తుంది. కానీ యాపిల్ మాత్రం మొదటి ప్రయత్నంలోనే భారీ స్థాయిలో మార్కెట్ను ఆక్రమించాలని చూస్తోంది.ఫోల్డబుల్ సెగ్మెంట్లో ఇది అత్యంత కీలక అడుగుగా భావిస్తున్నారు, ఎందుకంటే యాపిల్ ఇప్పటివరకు ఈ రకమైన డిజైన్లో ఫోన్ను విడుదల చేయలేదు. అందుకే, డిమాండ్, ప్రీమియం ధర, సరఫరా సామర్థ్యం అన్నీ కలిసి ఈ ప్రాజెక్ట్పై భారీ అంచనాలను పెంచుతున్నాయి.
ఫోల్డబుల్ ఐఫోన్తో పాటు యాపిల్ తన అప్కమింగ్ ఫ్లాగ్షిప్ సిరీస్ అయిన iPhone 18 పై కూడా భారీ అంచనాలు పెట్టుకుంది. కంపెనీ సుమారు 7 కోట్ల (70 మిలియన్) యూనిట్ల ఐఫోన్ 18 ప్రో , ఐఫోన్ 18 ప్రో మ్యాక్స్ మోడళ్లను ఉత్పత్తి చేయాలని లక్ష్యంగా పెట్టుకుంది. దీనిని బట్టి ప్రీమియం, అల్ట్రా-ప్రీమియం స్మార్ట్ఫోన్ మార్కెట్ను పూర్తిగా శాసించాలని యాపిల్ వ్యూహాలు రచిస్తున్నట్లు స్పష్టమవుతోంది.
యాపిల్ ఉత్పత్తులు ఎప్పుడూ ప్రీమియం ధరలోనే ఉంటాయి, ఇక ఫోల్డబుల్ ఫోన్ అంటే ఆ ధర మరింత ఆకాశాన్ని తాకడం ఖాయం. ఈ సరికొత్త ఫోల్డబుల్ ఐఫోన్ అల్ట్రా ధర సుమారు 2,500 డాలర్లు ఉండవచ్చని మార్కెట్ విశ్లేషకులు అంచనా వేస్తున్నారు. భారత కరెన్సీలో దీని విలువ దాదాపు రూ. 2.38 లక్షల వరకు ఉంటుంది. టాక్స్ లు, ఇతర సుంకాలు కలిపితే భారత్లో దీని ధర ఇంకా ఎక్కువగానే ఉండే అవకాశం ఉంది.
